រាជធានីភ្នំពេញ ៖ ក្នុង១ឆ្នាំៗ កម្ពុជាបាននាំចូលសាច់គោពីបរទេសរាប់រយតោនមកផ្គត់ផ្គង់លើទីផ្សារ ខណៈទីសត្តឃាតលំដាប់អន្តរជាតិក្នុងស្រុកដ៏ធំមួយដែលមានទីតាំងនៅខេត្តព្រះសីហនុ ត្រូវបានបិទទ្វារលែងធ្វើអាជីវកម្មយ៉ាងស្ងៀមស្ងាត់ ។
បើតាមរបាយការណ៍ពីកាំកុងត្រូលកាលពីឆ្នាំ២០១៧ កម្ពុជាបាននាំចូលសាច់គោពីទីផ្សារសំខាន់ៗចំនួន៩ប្រទេសរួមមាន បារាំង, ហ្វ៊ីលីពីន, អូទ្រីស, ម៉ាឡេស៊ី, សិង្ហបុរី, អាល្លឺម៉ង់, នូវែលសេឡង់, សហរដ្ឋអាមេរិក និងអូស្ត្រាលី មកផ្គត់ផ្គង់លើទីផ្សារដែលកំពុងមានតម្រូវការ ស្របពេលជីវភាពប្រជាពលរដ្ឋកាន់តែប្រសើរឡើង ជាពិសេសកំណើននៃភ្ញៀវទេសចរអន្តរជាតិមកទស្សនាកម្ពុជា ។
របាយការណ៍បញ្ជាក់ថា កាលពីឆ្នាំ២០១៧ កម្ពុជាបាននាំសាច់គោមកពីបរទេសសរុបចំនួនជាង៣០៩,៧តោន មានតម្លៃទឹកប្រាក់ប្រមាណជាង១,០៦លានដុល្លារ ក្នុងនោះនាំចូលពីប្រទេសអូស្ត្រាលី ច្រើនជាងគេ មានចំនួនជាង១៣៨តោន ស្មើនឹងទឹកប្រាក់ជាង៤៦,៧ម៉ឺនដុល្លារអាមេរិក ។ បើធៀបនឹងឆ្នាំ២០១៦ ការនាំចូលស្មើប្រមាណជាង៣៣២តោន មានតម្លៃទឹកប្រាក់ជាង១,១០លានដុល្លារ ។
កម្ពុជាក៏មានក្រុមហ៊ុនសត្តឃាតលំដាប់អន្តរជាតិមួយដែរឈ្មោះ អេស អិល អិន ដែលបានបោះទុនប្រមាណ៥០លានដុល្លារដើម្បីកសាងហេដ្ឋារចនាសម្ព័ន្ធ និងរោងចក្រផលិតសាច់គោដ៏ទំនើបដំបូងគេនៅកម្ពុជា និងធំជាងគេនៅក្នុងតំបន់ ដែលមានទីតាំងនៅភូមិព្រែកទាល ឃុំទឹកថ្លា ស្រុកព្រៃនប់ ខេត្តព្រះសីហនុ ប៉ុន្ដែក្រុមហ៊ុននេះបានបិទទ្វារយ៉ាងស្ងាត់ស្ងៀមអស់រយៈពេលជិត១ឆ្នាំទៅហើយ ។
ការបិទទីសត្តឃាតមួយនេះ បើតាមមន្ត្រីទំនាក់ទំនងព័ត៌មាននៅក្រុមហ៊ុននេះ បានថ្លែងប្រាប់អ្នកយកព័ត៌មានកោះសន្ដិភាព ប្រចាំខេត្តព្រះសីហនុ កាលពីរសៀលថ្ងៃទី១៣ កុម្ភៈថា ទីសត្តឃាតនេះ ចាប់ផ្ដើមដំណើរការសង្វាក់ផលិតកម្មរបស់ខ្លួនបានរយៈពេលត្រឹម១ឆ្នាំគត់ គឺចាប់ពីខែកក្កដា ឆ្នាំ២០១៦ ដល់ខែកក្កដា ឆ្នាំ២០១៧ ។ ចាប់តាំងពីពេលនោះមក ក៏ផ្អាកលែងមានសកម្មភាពកាប់គោដើម្បីផ្គត់ផ្គង់សាច់ តែម្ដង ។
ទោះបីយ៉ាងនេះក្ដី មន្ត្រីទំនាក់ទំនងរូបនេះពុំបានបញ្ជាក់ពីមូលហេតុដែលឈានដល់ការបិទទ្វារទីសត្តឃាតនេះទេ ក៏ប៉ុន្ដែបើផ្អែកតាមរយៈការវាយតម្លៃមួយក្នុងដំណើរចុះត្រួតពិនិត្យពីថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ កាលពីអំឡុងខែមីនា ឆ្នាំ២០១៧ បានបង្ហាញថា ក្រុមហ៊ុនមានជួបបញ្ហាប្រឈមទៅនឹងការខ្វះខាតការសហការពេញលេញ ពីបណ្តាក្រសួងពាក់ព័ន្ធ ពុំមានការបញ្ជាទិញពីបណ្តាប្រទេសគោលដៅដែលត្រូវនាំចេញ និងពុំមានការគាំទ្រពីភ្នាក់ងារអនាម័យ និងភូតគាមអនាម័យនៃបណ្តាប្រទេសនោះ ដែលទាមទារឲ្យក្រសួងពាក់ព័ន្ធត្រូវជួយអន្តរាគមន៍ជាបន្ទាន់ ។
លោក វេង សាខុន រដ្ឋមន្ត្រីក្រសួងកសិកម្ម បានថ្លែងក្នុងដំណើរចុះត្រួតពិនិត្យនោះថា ៖ «រោងចក្រនេះនឹងអាចឈានទៅបិទទ្វារ និងបញ្ឈប់កម្មកររាប់រយនាក់ ប្រសិនបើពុំមានការដោះស្រាយបានទាន់ពេលវេលាទេ » ។
ការបិទទ្វារទីសត្តឃាតនេះ អាចពាក់ព័ន្ធនឹងបញ្ហាខាងលើនេះ តែបើតាមលោក ហោ ស៊ឹមលាង អគ្គនាយកក្រុមហ៊ុនបានលើកឡើងកន្លងមកថា បញ្ហាប្រឈមជាច្រើនរបស់ក្រុមហ៊ុន គឺពាក់ព័ន្ធនឹងការនាំចូលសត្វគោមកកម្ពុជាមានជាប់ពន្ធខ្ពស់ ដែលធ្វើឲ្យការកែច្នៃសាច់មិនអាចប្រកួតប្រជែងលើទីផ្សារបាន ។
ការបិទទ្វារទីសត្តឃាតដ៏ធំ និងទំនើបនេះ ក៏បានធ្វើឲ្យប្រជាពលរដ្ឋខ្មែរប្រមាណជិត៥០០នាក់ដែលបានបម្រើការក្នុងសង្វាក់ផលិតកម្មបាត់បង់ការងារធ្វើផងដែរ ។
គួររំឭកថា ទីសត្តឃាតនេះបាននាំចូលគោរស់ពីប្រទេសអូស្ត្រាលី ចំនួនជាង២.៧៦១ក្បាល ដោយមានផែនការកាប់ក្នុង១ថ្ងៃ១០០ក្បាល ស្មើនឹងសាច់៥០តោនដើម្បីផ្គត់ផ្គង់ទីផ្សារក្នុងស្រុក និងមានផែនការនាំចេញទៅទីផ្សារអន្តរជាតិផ្សេងៗទៀត ប៉ុន្ដែគួរឲ្យស្ដាយ ទីសត្តឃាតនេះត្រូវបានបិទទ្វារដោយស្ងាត់ៗទៅវិញ ៕
ចែករំលែកព័តមាននេះ