រាជធានីភ្នំពេញ ៖ បន្ទាប់ពីកម្ពុជាមានឡចំហាយទឹកក្តៅសម្រាប់កម្ចាត់សត្វល្អិត ឬបាក់តេរីដែលជាប់ផ្លែស្វាយ កម្ពុជារំពឹងថា ចិនជាទីផ្សារគោលដៅសំខាន់បំផុតសម្រាប់នាំចេញ ក៏ដូចជាជួយលើកតម្កើងគុណតម្លៃនៃផ្លែស្វាយរបស់កម្ពុជា ។ រោងចក្រនេះ ត្រូវបានបើកការដ្ឋានសាងសង់ហើយដែលមានទីតាំងនៅខេត្តកំពង់ស្ពឺ…
រាជធានីភ្នំពេញ ៖ បន្ទាប់ពីកម្ពុជាមានឡចំហាយទឹកក្តៅសម្រាប់កម្ចាត់សត្វល្អិត ឬបាក់តេរីដែលជាប់ផ្លែស្វាយ កម្ពុជារំពឹងថា ចិនជាទីផ្សារគោលដៅសំខាន់បំផុតសម្រាប់នាំចេញ ក៏ដូចជាជួយលើកតម្កើងគុណតម្លៃនៃផ្លែស្វាយរបស់កម្ពុជា ។
រោងចក្រនេះ ត្រូវបានបើកការដ្ឋានសាងសង់ហើយដែលមានទីតាំងនៅខេត្តកំពង់ស្ពឺ និងគ្រោងដាក់ឲ្យដំណើរការឆាប់ៗនេះ ។
លោក អ៊ិន ឆៃវ៉ាន ប្រធានសមាគមស្វាយកំពង់ស្ពឺ បានឱ្យដឹងថា នៅពេលកម្ពុជាមានរោងចក្រឡចំហាយទឹកក្តៅសម្រាប់កម្ចាត់សត្វល្អិត ឬពងរុយជាប់នៅលើផ្លែស្វាយបានហើយនោះ រាល់ការនាំចេញទៅទីផ្សារអន្តរជាតិ វានឹងជួយលើកកម្ពស់តម្លៃស្វាយកម្ពុជាបានមួយកម្រិត ។
លោកថ្លែងថា ៖« ចិនជាទីផ្សារអាចជួយលើកតម្លៃផ្លែស្វាយកម្ពុជាពិតប្រាកដក្នុងចំណោមទីផ្សារដទៃ ដូចជា ថៃ វៀតណាម និងកូរ៉េជាដើម ។ អីចឹង ក្នុងនាមសមាគម ខ្ញុំសំណូមពរដល់ប្រមុខថ្នាក់ដឹកនាំ និងក្រសួងជំនាញ មេត្តាយកចិត្តទុកដាក់លើផ្នែកភូតគាមអនាម័យ ដើម្បីក្លាយជាផ្លែស្វាយស្របច្បាប់១០០% សម្រាប់នាំចេញទៅទីផ្សារអន្តរជាតិ » ។
បើតាមអគ្គនាយកកសិកម្ម នៃក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា នៅពេលកម្ពុជាមានឡចំហាយទឹកក្តៅអាចដំណើរការបាននោះ តម្លៃផ្លែស្វាយ និងផលិតកម្មស្វាយកម្ពុជា នឹងរីកចម្រើនបន្ថែមទៀត ហើយផ្អែកលើរោងចក្រឡចំហាយទឹកក្តៅនេះ ក៏អាចនឹងប្រហែលនាំចេញទៅបានផងដែរ ដោយសារ ឡចំហាយទឹកក្តៅនេះ ជាវិធានការមួយដែលអន្តរជាតិទទួលស្គាល់ ។
លោកបណ្ឌិត ហ៊ាន វណ្ណហន ថ្លែងថា ៖«នៅពេលរោងចក្រប្រើឡចំហាយទឹកក្តៅ នៅខេត្តកំពង់ស្ពឺកើតឡើង សង្ឃឹមថា តម្លៃផ្លែស្វាយរបស់ប្រជាកសិករ និងផលិតកម្មស្វាយកម្ពុជា ក៏នឹងរីកចម្រើនជាងមុន ។ ពេលធ្វើឡចំហាយទឹកក្តៅនេះសាងសង់រួចហើយ ម្ចាស់ក្រុមហ៊ុនត្រូវសហការជាមួយអគ្គនាយកដ្ឋានកសិកម្មដើម្បីធ្វើការពិសោធន៍ យើងនឹងអញ្ជើញភាគីប្រទេសកូរ៉េមកពិនិត្យវាយតម្លៃពីប្រសិទ្ធភាព ដើម្បីអាចនាំចេញទៅប្រទេសនេះ ហើយចំពោះប្រទេសចិនក៏មិនខុសគ្នាដែរ ព្រោះឡចំហាយទឹកក្តៅនេះ ជាវិធានការមួយដែលអន្តរជាតិគេទទួលស្គាល់ ។ អីចឹង វាមិនពិបាកទេ ឱ្យតែយើងមានឡចំហាយទឹកក្តៅនេះហើយ » ។
តាមប្រធានសមាគមស្វាយកំពង់ស្ពឺ កាលពីឆ្នាំ២០១៦ ប្រទេសជិតខាងមិនអនុញ្ញាតឱ្យកម្ពុជានាំចូលផ្លែស្វាយទៅកាន់ប្រទេសគេទេ ធ្វើឱ្យផ្លែស្វាយកម្ពុជាប្រឈមបញ្ហា ដោយសារកម្ពុជាពុំទាន់ទទួលបានភាពស្របច្បាប់នៃការនាំចេញផ្លែស្វាយទៅប្រទេសទាំងនោះ ជាពិសេសប្រទេសចិន ។
កាលពីឆ្នាំ២០១៦-២០១៧ សម្រាប់តែខេត្តកំពង់ស្ពឺ អាចផលិតស្វាយបានជិតកន្លះលានតោន ប៉ុន្តែនាំចេញតាមរយៈសមាគមបានប្រមាណតែ១ម៉ឺនតោនទៅកាន់ទីផ្សារថៃ វៀតណាម និងចិន ៕
ចែករំលែកព័តមាននេះ