ខេត្តកំពង់ឆ្នាំង ៖ ជនសង្ស័យដែលជាមុខសញ្ញាចាស់ ធ្លាប់ធ្វើសកម្មភាពកាច់.កម៉ូតូលួចយកពីខេត្តកំពង់ឆ្នាំងជាច្រើនដង ត្រូវបាននគរបាលក្រុងកំពង់ឆ្នាំង សហការណ៍ជាមួយនគរបាលខេត្ត បានដេញស្ទាក់ចាប់បាននៅវេលាម៉ោង១០និង២០នាទីព្រឹក ថ្ងៃទី២៤ ខែមករា ឆ្នាំ២០១៨ នៅចំណុចភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខណៈជនសង្ស័យរូបនោះបានធ្វើសកម្មភាពកាច់.កលួចយកម៉ូតូមួយគ្រឿង ពីចំណុចសាលារៀនភាសាកូរ៉េកាបែង ស្ថិតក្នុងភូមិដំរីកូន ឃុំអញ្ចាញរូង ស្រុកបរិបូរណ៌ ។
លោក ពេជ្រ រ៉ី ប្រធានការិយាល័យនគរបាលព្រហ្មទ័ណ្ឌកម្រិតស្រាល នៃស្នងការដ្ឋាននគរបាលខេត្តកំពង់ឆ្នាំង បានបញ្ជាក់ថា ជនសង្ស័យដែលជាមុខសញ្ញាចាស់ ធ្លាប់ធ្វើសកម្មភាពកាច់.កម៉ូតូលួចយកជាច្រើនដង មានឈ្មោះ ហេង វ៉ាន់ អាយុ៣២ឆ្នាំ មានទីលំនៅភូមិអណ្តូង ឃុំត្នោត ស្រុកមេសាង ខេត្តព្រៃវែង ។
លោកបានបញ្ចាក់ថា មុនពេលកើតហេតុនៅវេលាម៉ោងជាង៨ព្រឹក ជនសង្ស័យរូបនោះបានធ្វើសកម្មភាពលួចកាច់.កម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១GQ-៩៩១៣ ជាកម្មសិទ្ធរបស់ឈ្មោះ ហ៊ុយ សុខន ភេទស្រី អាយុ៣០ឆ្នាំ ខណៈ គាត់មករៀនភាសារកូរ៉េ នៅសាលាកាបែង ស្ថិតក្នុងភូមិដំរីកូន ឃុំពេជចង្វា ស្រុកបរិបូរណ៌ ។
ក្រោយពេលលួចម៉ូតូចេញបាត់ ភា្លមៗនោះ ម្ចាស់ម៉ូតូបានដឹង ហើយបានរាយការណ៍ជូនសមត្ថកិច្ច បន្ទាប់មកសមត្ថកិច្ចក៏បានដាក់កម្លាំងចាំស្ទាក់គ្រប់ទីកន្លែង ។ លុះដល់ម៉ោងប្រហែល១០ព្រឹកថ្ងៃដដែល សមត្ថកិច្ចបានឃើញជនសង្ស័យបានជិះម៉ូតូដែលលួចបានចូលមកក្នុងវត្តខ្សាម ស្ថិតក្នុងភូមិទី១ សង្កាត់ខ្សាម ក្រុងកំពង់ឆ្នាំង ហើយក៏ដេញស្ទាក់ចាប់ តែពេលនោះជនសង្ស័យបានជិះម៉ូតូគេចត្រលប់ក្រោយវិញ ទៅតាមបណ្ដោយផ្លូវជាតិលេខ៥ រហូតដល់ភូមិត្រពាំងអញ្ចាញ ទើបជិះចូលក្នុងព្រៃ រួចទុកម៉ូតូចោល ហើយរត់ទៅដេកពួនដោយយកធាងត្នោតគ្របពីលើ បន្លំភ្នែកសមត្ថកិច្ច តែសមត្ថកិច្ចនៅតែតាមរកឃើញ និងចាប់ខ្លួននាំមកស្នងការដ្ឋាន ដើម្បីសាកសួរចម្លើយ ។
នៅចំពោះមុខសមត្ថកិច្ចជនសង្ស័យបានសារភាពថា រូបគេធ្លាប់ធ្វើសកម្មភាពតែពីរលើកប៉ុណ្ណោះក្នុងក្រុងកំពង់ឆ្នាំង ប៉ុន្តែសមត្ថកិច្ចបានដឹងច្បាស់ណាស់ ធ្លាប់ធ្វើសកម្មភាពច្រើនហើយដូចជានៅផ្ទះសំណាក់លីហូវ និងផ្ទះសំណាក់សុខថៃសាន្ត ជាដើម តែចាប់មិនដែលបាន បានតែរូបភាពយកពីកាំមេរាសុវត្ថិភាព តាមផ្ទះសំណាក់ទុកធ្វើជាឯកសារប៉ុណ្ណោះ ។
ជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅតុលាការតាមផ្លូវច្បាប់ដោយចោទពីបទ “លួចមានស្ថានទម្ងន់ទោស” ។ គួរបញ្ជាក់ថា នៅស្នងការដ្ឋាននគរបាលខេត្តមានប្រជាពលរដ្ឋជាច្រើននាក់ ដែលធ្លាប់បាត់ម៉ូតូបានមកចោមរោមមើលមុខជនដៃដល់ និងបានសំណូមពរដល់តុលាការសូមមេត្តាដាក់ទោសជនដៃដល់ឲ្យបានខ្លាំងបំផុត ៕
ចែករំលែកព័តមាននេះ