រាជធានីភ្នំពេញ ៖ គូស្នេហ៍មួយគូចេញក្លឹបកម្សាន្តជិះម៉ូតូត្រលប់ទៅផ្ទះវិញ លុះដល់ពាក់កណ្តាលផ្លូវក៏ស្រាប់តែមានបុរសពីរនាក់ទៀត បានជិះម៉ូតូដេញវាយ ធ្វើឲ្យគូរស្នេហ៍ទាំងពីរនាក់ភ័យពេក បានជិះម៉ូតូរត់គេចជ្រុលទៅបុកនឹងចិញ្ចើមផ្លូវ បណ្ដាលរងការខូចខាតម៉ូតូ ភ្លាមៗនោះដែរ ជនបង្កក៏ត្រូវសមត្ថកិច្ចឃាត់ខ្លួនបាន២នាក់ផងដែរ ហេតុការណ៍នេះបានកើតឡើងនៅវេលាម៉ោង០២និង៣០នាទីរំលងអធ្រាត្រ ឈានចូលថ្ងៃទី២៤ ខែមករា ឆ្នាំ២០១៨ ទុលមុខនឹងមន្ទីពេទ្យមិត្តភាពខ្មែរសូវៀត ហើយឃាត់ខ្លួននៅផ្លូវ២៧១កែងនឹងផ្លូវ៤៣២ សង្កាត់បឹងទំពុន១ ខណ្ឌមានជ័យ ។
ភាគីខាងគូស្នេហ៍រងគ្រោះមិនបានឲ្យស្គាល់អត្តសញ្ញាណនោះទេ គ្រាន់តែដឹងថា ជិះម៉ូតូម៉ាកសង់ប៊ិច ពណ៌ខៀវ ពាក់ស្លាកលេខ ភ្នំពេញ ១BD-៨២២១ ។ ចំណែកភាគីខាងបង្កក៏មិនបានឲ្យស្គាល់អត្តសញ្ញាណដូចគ្នា គ្រាន់តែដឹងថា ជិះម៉ូតូស្កុបពី ពណ៌ខ្មៅលាយផ្កាឈូក ពាក់ស្លាកលេខ ភ្នំពេញ ១FE-៦៦២៤ ។
តាមសម្តីខាងរងគ្រោះ បានឲ្យដឹងថា មុនពេលកើតហេតុ ពួកគេទាំងពីរនាក់គូស្នេហ៍ បានជិះម៉ូតូម៉ាកសង់ប៊ិច ពណ៌ខៀវ ចេញពីក្លឹបកម្សាន្តយីហោ ផ្លេក្លឹប ស្ថិតនៅផ្លូវ២០១៤ សង្កាត់អូរបែកក្អម ខណ្ឌសែនសុខ គោលបំណង ត្រលប់ទៅផ្ទះវិញនៅម្តុំទួលសង្កែ ខណ្ឌឬស្សីកែវ ខណៈធ្វើដំណើរតាមផ្លូវ ២៧១ ក្នុងទិសដៅពីជើងទៅត្បូង មកដល់ចំណុចមុខមន្ទីរពេទ្យមិត្តភាពខ្មែរសូវៀត ក៏ស្រាប់តែមានបុរស៤នាក់ បានជិះម៉ូតូ២គ្រឿងម៉ាកស្កុបពីមួយគ្រឿង និងមួយគ្រឿងទៀតម៉ាក XR បាមជិះដេញតាមពីក្រោយ ប្រដាប់ដោយខ្សែក្រវាត់ដេញវាយពួកគាត់ ហើយភ្លាមៗនោះដែរ ពួកគាត់ភ័យពេកបានជិះម៉ូតូរត់គេចខ្លួនជ្រុលទៅបុកនឹងចិញ្ចើមផ្លូវ បណ្ដាលឲ្យម៉ូតូបាក់ខ្នងក្រោយទៅមុខលែង តែមិនរងរបួសនោះទេ ។
ប្រភពព័ត៌មានបានបន្តទៀតថា នៅពេលនោះដែរ សមត្ថកិច្ចប៉ុស្តិ៍នគរបាលទំនប់ទឹក ដែលកំពុងល្បាតឆ្លងកាត់ទីនោះ បានឃើញហេតុការណ៍ក៏បានជិះម៉ូតូដេញតាមក្រុមជនបង្កចាប់បាន២នាក់ ម៉ូតូមួយគ្រឿង និងខ្សែក្រវាត់មួយយកមកសាកសួរ ហើយបក្ខពួក២នាក់ទៀតបានរត់គេខ្លួនបាត់ស្រមោល ។
ដោយឡែកខាងម៉ូតូបង្កវិញបានបដិសេធថា ពួកគេមិនបានដេញវាយជនរងគ្រោះនោះទេ ហើយមុនពេលកើតហេតុ ពួកគេមានគ្នាពីរនាក់បានជិះម៉ូតូម៉ាកស្កុបពីចេញក្លឹបកម្សាន្តយីហោ ប្លូឡាញ នៅផ្លូវ២៧១ សង្កាត់បឹងទំពន់១ ខណ្ឌមានជ័យ គោលបំណងត្រលប់ទៅផ្ទះវិញ លុះជិះមកដល់ចំណូចកើតហេតុ ក៍ត្រូវសមត្ថកិច្ចឃាត់ខ្លួនតែម្តងទៅ ។
បន្ទាប់ពីសាកសួរឃើញថា ករណីនេះមិនមែនកើតហេតុនៅទឹកដីទំនប់ទឹកខណ្ឌចំការមននោះទេ គឺកើតហេតុនៅទឹកដីសង្កាត់បឹងទំពុន១ ខណ្ឌមានជ័យ ចឹងហើយភាគីទាំសងខាងត្រូវបានសមត្ថកិច្ចប៉ុស្តិ៍ទំនប់ទឹកបានប្រគល់ឲ្យប៉ុស្តិ៍នគរបាលបឹងទំពន់១ ខណ្ឌមានជ័យ ធ្វើការសាកសួរបន្ត ៕
ចែករំលែកព័តមាននេះ