រាជធានីភ្នំពេញ ៖ យុវជនម្នាក់រួមជាមួយស្ត្រី២នាក់ទៀត បាននាំគ្នាធ្វើដំណើរទៅកាន់ប៉ុស្ដិ៍ចោមចៅ២ កាលពីវេលាម៉ោង២និង៣០នាទីរសៀលថ្ងៃទី១៩ ខែធ្នូ ឆ្នាំ២០១៧ ដើម្បីដាក់ពាក្យបណ្ដឹងសុំឲ្យនគរបាលជួយអន្តរាគមន៍ដោយបានប្រាប់ថា ពួកខ្លួនបានចូលទៅដេកនៅក្នុងផ្ទះសំណាក់មួយកន្លែង ។
ហេតុការណ៍បាត់ម៉ូតូខាងលើនោះបានកើតឡើងកាលពីវេលាម៉ោង៨ព្រឹកថ្ងៃទី១៨ ខែធ្នូ ឆ្នាំ២០១៧នៅចំណុចផ្ទះសំណាក់យីហោ《ត្រពាំងថ្លឹងមនោរម្យ》ដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
ម៉ូតូដែលបាត់នោះពណ៌សលាយលឿង ស៊េរី២០១៣ ស្លាកលេខ ភ្នំពេញ១CB-៩៦២០ ជាកម្មសិទ្ធិរបស់យុវជនម្នាក់ឈ្មោះប៉ែន វិបុល អាយុ២២ឆ្នាំ មុខរបរកម្មកររោងចក្រ ស្នាក់នៅផ្ទះជួលភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ។ មានស្រុកកំណើតនៅក្នុងភូមិតាហ៊រ ឃុំថ្កូវ ស្រុកកំពង់ត្របែក ខេត្តព្រៃវែង ដោយឡែកស្ត្រី២នាក់ទៀត ដែលអះអាងថា ជាម្ចាស់ម៉ូតូមិនត្រូវបានស្គាល់ឈ្មោះទេ ។
ចំណែកម្ចាស់ផ្ទះសំណាក់មិនត្រូវបានស្គាល់ឈ្មោះទេ ប៉ុន្តែសន្តិសុខយាមនៅទីនោះឈ្មោះខុប វុទ្ធា អាយុ២៨ឆ្នាំ មានស្រុកកំណើតនៅក្នុងភូមិពុកឫស្សីក្រោម ឃុំពុកឫស្សី ស្រុកខ្សាច់កណ្ដាល ខេត្តកណ្ដាល ។
ព័ត៌មានបានឲ្យដឹងថា កាលពីវេលាយប់ថ្ងៃទី១៧ ខែធ្នូនេះ ស្ត្រី២នាក់ដែលអះអាងថា ជាម្ចាស់ម៉ូតូបានចូលទៅដេកនៅផ្ទះសំណាក់ខាងលើ លុះដល់វេលាម៉ោងជាង២យប់រំលងអធ្រាត្រឈានចូលថ្ងៃទី១៨ ទើបយុវជនដែលជាម្ចាស់ម៉ូតូបានជិះម៉ូតូចូលទៅកាន់ផ្ទះសំណាក់នោះ ។ ពេលទៅដល់បានប្រាប់សន្តិសុខថា សុំជួបចែខ្ញុំ២នាក់ ដែលដេកនៅខាងក្នុងពេលនោះសន្តិសុខបានអនុញ្ញាតឲ្យចូល ហើយយុវជននោះបានផ្ញើម៉ូតូសន្តិសុខត្រឹមត្រូវថែមទៀតផង រួចទើបចូលទៅដេករហូតដល់ព្រឹកឡើងទើបចេញមកវិញ ស្រាប់តែបាត់ម៉ូតូទើបមានការភ្ញាក់ផ្អើល ហើយមិនបានប្ដឹងនគរបាលភ្លាមៗនោះទេ ដោយបានសម្របសម្រួលគ្នា ប៉ុន្តែដោយសារតែខាងម្ចាស់ផ្ទះសំណាក់ និងសន្តិសុខមិនព្រមទទួលខុសត្រូវទើប២ថ្ងៃក្រោយ គឺនៅថ្ងៃទី១៩ ខែធ្នូ ម្ចាស់ម៉ូតូបានទៅដាក់ពាក្យបណ្ដឹងឲ្យនគរបាលជួយអន្តរាគមន៍ ហើយនៅមិនទាន់ដឹងថា តើត្រូវរ៉ូវគ្នាបែបណាឡើយ ៕
ចែករំលែកព័តមាននេះ