រាជធានីភ្នំពេញ ៖ កម្លាំងនគរបាលផ្នែកនគរបាលប្រឆាំងបទល្មើសគ្រឿងញៀន និងនគរបាលព្រហ្មទណ្ឌស្រុកអង្គស្នួល បានធ្វើការស្រាវជ្រាវ និងចាប់ខ្លួនបុរសអ្នកជួញដូរគ្រឿងញៀនម្នាក់តាមដីការបស់សាលាដំបូងខេត្តកណ្ដាល ដែលជននេះបានធ្វើសកម្មភាពជួញយ៉ាងសកម្ម និងបានគេចខ្លួនចេញពីការតាមប្រមាញ់របស់កម្លាំងនគរបាលរយៈពេលជាង១ឆ្នាំកន្លងមកហើយ រហូតសាលាដំបូងខេត្តចេញដីកាបង្គាប់ឲ្យចាប់ខ្លួនតែម្ដង ។ ការចាប់ខ្លួននោះបានធ្វើឡើងកាលពីវេលាម៉ោង០១និង២០នាទីរសៀល ថ្ងៃទី២៧ ខែវិច្ឆិកា ឆ្នាំ២០១៧ នៅក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនសង្ស័យខាងលើឈ្មោះ ផុន ប៊ុនណេង អាយុ២៩ឆ្នាំ ជនជាតិខ្មែរ មុខរបរកម្មករសំណង់ មានទីលំក្នុងនៅភូមិកណ្តោស ឃុំលំហាច ស្រុកអង្គស្នួល ខេត្តកណ្តាល ។ ត្រូវចាប់ខ្លួនតាមដីកាលេខ២២០ ដ.ក.ច.ខ ចុះថ្ងៃទី០៥ ខែមេសា ឆ្នាំ២០១៧ របស់លោក គឹម ម៉េង ចៅក្រមជំនុំជម្រះ នៃសាលាដំបូងខេត្តកណ្តាល ។
នគរបាលបានឲ្យដឹងថា នៅក្នុងដីកាបានចោទប្រកាន់ជននេះ ពីបទជួញដូរគ្រឿងញៀន ដែលបានប្រព្រឹត្តកាលពីថ្ងៃទីកាលពីថ្ងៃទី០១ ខែសីហា ឆ្នាំ២០១៦ នៅក្នុងភូមិកណ្ដោស ឃុំលំហាច ស្រុកអង្គស្នួល ខេត្តកណ្តាល ។ ដែលកាលនោះជនខាងលើបានធ្វើសកម្មភាពយ៉ាងសកម្មនៅតំបន់នោះ ហើយត្រូវបានកម្លាំងនគរបាលស្រុកស៊ើបដឹង និងកំណត់បានមុខសញ្ញាច្បាស់លាស់ និងបានតាមរកចាប់ខ្លួនដើម្បីផ្តន្ទាទោស ប៉ុន្តែចាប់មិនបាន ដោយគេបានគេចខ្លួនរួចរហូត ។ ក្រោយមកកម្លាំងបានរាយការណ៍ជូនតុលាការរហូតចេញដីកាបង្គាប់ឲ្យចាប់ខ្លួន បន្ទាប់មកកម្លាំងនគរបាលស្រុកបានស្វែងរករហូតដល់ពេលនេះ ទើបជួប និងចាប់ខ្លួនបានបញ្ជូនទៅកាន់សាលាដំបូងខេត្តកណ្ដាល ដើម្បីចាត់ការតាមច្បាប់ ៕
ចែករំលែកព័តមាននេះ