រាជធានីភ្នំពេញ ៖ ទីក្រុងរណបជ្រោយចង្វា ដែលមានតម្លៃទុនវិនិយោគប្រមាណ៣.០០០លានដុល្លារ បានចាប់ផ្តើមសកម្មភាពនៃការអភិវឌ្ឍរបស់ខ្លួនហើយ បន្ទាប់ពីហេដ្ឋារចនាសម្ព័ន្ធនានាបានបញ្ចប់ និងមួយចំនួនទៀតបាននិងកំពុងស្ថាបនា ។
បច្ចុប្បន្ន បានបញ្ចប់ការស្ថាបនាផ្លូវមេ ដែលមានបំពាក់អំពូលបំភ្លឺសាធារណៈនៅចំកណ្ដាលទ្រូងផ្លូវ លាតសន្ធឹងកាត់ចំកណ្តាលទីក្រុងនេះ និងកំពុងស្ថាបនារង្វង់មូល និងផ្លូវមួយទៀតស្ថិតនៅក្បែរផ្លូវជាតិលេខ៦អា ព្រមទាំងហេដ្ឋារចនាសម្ព័ន្ធផ្សេងៗទៀត ។
អគ្គនាយកក្រុមហ៊ុន OCIC លោក ទូច សំណាង បានថ្លែងតាមទូរស័ព្ទកាលពីពេលថ្មីៗនេះថា ពេលនេះ ក្រុមហ៊ុនកំពុងចាប់ផ្តើមបុកគ្រឹះសាងសង់ការិយាល័យកណ្តាលរបស់ខ្លួនកម្ពស់២០ជាន់ ហើយនៅដើមឆ្នាំក្រោយ ក្រុមហ៊ុននឹងចាប់ផ្តើមសាងសង់ផ្ទះល្វែង និងមជ្ឈមណ្ឌលពាណិជ្ជកម្ម រួមមាន ផ្សារទំនើប អគារការិយាល័យនៅក្នុងទីក្រុងនេះផងដែរ ។
លោកបន្តថា ៖« រហូតមកទល់ពេលនេះ ក្រុមហ៊ុនបានចាប់ផ្តើមលក់ផ្ទះល្វែងបណ្តើរៗហើយ ដោយផ្ទះនីមួយៗមានតម្លៃចាប់ពីជាង២០ម៉ឺនដុល្លារអាមេរិកឡើងទៅ » ។
លោក ទូច សំណាង បានបន្តថា គម្រោងក្នុងដំណាក់កាលទី១នេះ មានផ្ទៃដីជាង៣ហិកតា ប៉ុន្តែយើងមិនទាន់គណនាពីតម្លៃនៃការវិនិយោគនៅឡើយទេ ។ លោកបន្តថា ទោះជាយ៉ាងណា បើគិតពីតម្លៃនៃអគារការិយាល័យកណ្តាលរបស់គម្រោងនេះ មានទឹកប្រាក់២០លានដុល្លារអាមេរិក ។
តំបន់ជ្រោយចង្វា និងតំបន់ស្ថិតនៅតាមបណ្តោយផ្លូវជាតិលេខ៦A មានសកម្មភាពអភិវឌ្ឍន៍ខ្លាំង បន្ទាប់ពីស្ពានជ្រោយចង្វាទី២ បានសាងសង់រួច និងដាក់ឲ្យដំណើរការ ។ តំបន់នេះមានបុរីធំៗជាច្រើនកំពុងសាងសង់ ដូចជា បុរីប៉េង ហួត, បុរី The Mekong Royal, បុរីអ័រគីដេ, បុរីបុរីឌឹ ផ្លារ៉ា និងបុរីវិមានភ្នំពេញ ដែលកំពុងមានសកម្មភាពសាងសង់លំនៅឋានទាំងតម្លៃមធ្យម និងខ្ពស់ ។
ដើម្បីឲ្យតំបន់នេះកាន់តែទាក់ទាញការវិនិយោគ និងមានសកម្មភាពសេដ្ឋកិច្ចថែមទៀតនោះ បច្ចុប្បន្ន ក្រុមហ៊ុន OCIC កំពុងសាងសង់ស្ពានចំនួន២ ភ្ជាប់ទៅកាន់តំបន់ជ្រោយចង្វាផងដែរ ដូចជា ស្ពានបាឡេ ដែលគ្រោងចំណាយពេលសាងសង់៦ខែ និងស្ពានយោងដោយខ្សែកាប គ្រោងចំណាយរយៈពេលសាងសង់២៤ខែ ។
នាយកគ្រប់គ្រងទូទៅនៃក្រុមហ៊ុន Cambodia Angkor Real Estate លោក ពឹង សេរី បានថ្លែងថា ការអភិវឌ្ឍទីក្រុងរណបថ្មីនេះជារឿងល្អ ព្រោះវានឹងជួយធ្វើឲ្យតម្លៃដីធ្លី និងសកម្មភាពសេដ្ឋកិច្ចនៅតំបន់នោះកាន់តែមានភាពរីកចម្រើន ពិសេសការកសាងទីក្រុងរណបបែបនេះ ក៏ជួយសម្រួលបញ្ហាចរាចរណ៍ និងពង្រាយប្រជាពលរដ្ឋកាន់តែទៅតំបន់ផ្សេងៗច្រើន ដើម្បីកុំឲ្យពួកគេប្រមូលផ្តុំតែមួយកន្លែង ធ្វើឲ្យមានការកកស្ទះចរាចរណ៍ និងបំពុលបរិស្ថាន ។
លោកបន្តថា ៖« កម្ពុជាត្រូវការទីក្រុងរណបកាន់តែច្រើន ដើម្បីពង្រីកការអភិវឌ្ឍផង និងជំរុញកុំឲ្យប្រជាពលរដ្ឋប្រមូលផ្តុំតែនៅមួយកន្លែងផង ពិសេសវាជួយធ្វើឲ្យវិស័យអចលនទ្រព្យកាន់តែមានភាពរីកចម្រើន » ។
លោកបន្ថែមថា ៖« ខ្ញុំគិតថា គម្រោងនេះនឹងទទួលបានជោគជ័យ ព្រោះវាជាតំបន់មានលក្ខខណ្ឌអាកាសធាតុល្អ ដោយសារមានទន្លេ២ អមសងខាង » ។
លោក ច្រឹក សុខនីម អគ្គនាយកក្រុមហ៊ុនCentury21 Cambodia បានថ្លែងថា ទីក្រុងរណបជ្រោយចង្វា ជាទីក្រុងស្ថិតនៅកៀករាជធានីភ្នំពេញជាងគេ និងមានលក្ខខណ្ឌភូមិសាស្ត្រ និងអាកាសធាតុអំណោយផលបំផុត ដោយសារវានៅជាប់នឹងដងទន្លេ ដែលអំណោយផលដល់ការរស់នៅ ។ លោកបន្តថា បច្ចុប្បន្ន តំបន់នេះមិនទាន់មានមនុស្សរស់នៅច្រើននៅឡើយទេ ប៉ុន្តែនាពេលអនាគត បន្ទាប់ពីគម្រោងអភិវឌ្ឍន៍នានាបានសាងសង់រួច ចំនួនប្រជាពលរដ្ឋចូលទៅរស់នៅទីក្រុងនេះ នឹងកើនឡើងខ្លាំង ។
លោកបន្តថា ៖« គម្រោងនេះនឹងទទួលបានជោគជ័យ ហើយខ្ញុំជឿជាក់ថា ប្រជាជនចាប់អារម្មណ៍ចង់រស់នៅតំបន់នេះច្រើននាពេលអនាគតឆាប់ៗនេះ » ៕
ចែករំលែកព័តមាននេះ