រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថា រាជរដ្ឋាភិបាលកម្ពុជានឹងសាងសង់គិលានដ្ឋាន (ពេទ្យបង្អែក) ធំមួយនៅតំបន់រោងចក្រ 7NG ដើម្បីផ្តល់នូវកិច្ចគាំពារសុខុមាលភាពដល់បងប្អូនកូនក្មួយកម្មករដែលកំពុងធ្វើការនៅក្នុងរោងចក្រទីនោះ។
សម្តេចតេជោបានប្រកាសដំណឹងល្អនេះនៅព្រឹកថ្ងៃទី ១៩ វិច្ឆិកា ឆ្នាំ២០១៧នេះថា៖ «នៅពេលដែលសាងសង់រួចហើយ គឺកូនក្មួយកាន់តែងាយស្រួលក្នុងការពិនិត្យសុខភាព និងទទួលបាននូវការព្យាបាលភ្លាមៗទាន់ពេលវេលានៅហ្នឹងកន្លែងតែម្តង។ កូនក្មួយត្រូវមានជំនឿទុកចិត្តលើការខិតខំដោះស្រាយរបស់ពូ ដែលតែងតែគិតគូអំពីសុខទុក្ខរបស់ក្មួយៗផ្ទាល់ ជាពិសេសកូនក្មួយដែលមានផ្ទៃពោះ»។
សម្រាប់រយៈពេលប៉ុន្មានខែចុងក្រោយនេះសម្តេចតេជោតែងតែចុះជួបកម្មករ កម្មការិនីធ្វើការនៅវិស័យវាយនភណ្ឌ កាត់ដេរសម្លៀកបំពាក់ ក៏រោងចក្រផលិតនូវគ្រឿងបំលាស់ផ្សេងៗនៅតាមតំបន់រោងចក្រនានា ជាពិសេសថ្នាក់ដឹកនាំបានសម្រេចផ្តល់ជូនទឹកប្រាក់ឧបត្ថម្ភដល់កម្មការិនីឆ្លងទន្លេ ក៏ដូចជាមន្ត្រីរាជការផងដែរ ក្នុងកិច្ចខិតខំពង្រឹងកិច្ចគាំពារសុខុមាលភាពស្ត្រីខ្មែរ៕
ចែករំលែកព័តមាននេះ