រាជធានីភ្នំពេញ ៖ ប្រជាពលរដ្ឋខ្មែររាប់ម៉ឺននាក់មកពីគ្រប់ទិសទីទូទាំងប្រទេសបានទទួលផលប្រយោជន៍យ៉ាងច្រើនពីកិច្ចសហប្រតិបត្តិការលើការងារសង្គមរួមគ្នា រវាងក្រុមហ៊ុនទូរស័ព្ទមិត្តហ្វូន និងសមាគមគ្រូពេទ្យស្ម័គ្រចិត្តយុវជនសម្ដេចតេជោ ហៅកាត់ថា TYDA ដែលផ្ដល់សេវាពិនិត្យ និងព្យាបាលសុខភាពដោយឥតគិតថ្លៃដល់ប្រជាជនកម្ពុជា។ នេះបើតាមការឲ្យដឹងពីតំណាងក្រុមហ៊ុន មិត្តហ្វូន។
មិត្តហ្វូន ជាក្រុមហ៊ុនទូរស័ព្ទចល័តឈានមុខគេនៅកម្ពុជា បានចូលរួមសហការជាមួយសមាគមគ្រូពេទ្យស្ម័គ្រចិត្តយុវជនសម្ដេចតេជោ តាំងពីឆ្នាំ២០១៥មកម្ល៉េះ ដើម្បីផ្ដល់សេវាពិនិត្យសុខភាព និងព្យាបាលជំងឺដោយឥតគិតថ្លៃដល់ប្រជាជនកម្ពុជា។
ក្នុងឆ្នាំ២០១៧នេះ ប្រជាជនកម្ពុជាប្រមាណ៦ម៉ឺននាក់ មកពីគ្រប់ទិសទីនៅទូទាំងប្រទេសបានទទួលផលប្រយោជន៍ពីកិច្ចការសង្គមរួមគ្នារបស់មិត្តហ្វូន និង TYDA ហើយក្រុមហ៊ុនពិតជាមានមោទនភាពដែលបានចួលរួមចំណែកក្នុងកិច្ចការសង្គមដ៏មានតម្លៃមិនអាចកាត់ថ្លៃបាន។ នេះបើតាមការឱ្យដឹងរបស់មន្ត្រីក្រុមហ៊ុន ។
លោក ញ៉ុង ឌិនថន អគ្គនាយករងក្រុមហ៊ុន មិត្តហ្វូន មានប្រសាសន៍ថា៖ «ប្រជាជន ៦ម៉ឺននាក់ ទទួលប្រយោជន៍ពីកិច្ចការសង្គមដែលយើងធ្វើរួមគ្នាជាមួយ TYDA ចំនួននេះពិតជាគួរឲ្យអស្ចារ្យ។ មិត្តហ្វូន នឹងប្ដេជ្ញាចូលរួមជាមួយបេសកកម្មរបស់ TYDA បន្តទៀត នៅឆ្នាំក្រោយ ដើម្បីផ្ដល់ការពិនិត្យសុខភាព និងព្យាបាលជំងឺដោយឥតគិតថ្លៃដល់ប្រជាជន»។
ក្រុមហ៊ុន មិត្តហ្វូន បាននិងកំពុងប្រតិបត្តិការក្នុងទីផ្សារទូរស័ព្ទចល័តនៅកម្ពុជា ចាប់តាំងពីឆ្នាំ២០០៩ ហើយក្រុមហ៊ុនស្ថិតក្នុងចំណោមក្រុមហ៊ុនធំៗបំផុតជាច្រើននៅកម្ពុជា ដែលគាំទ្រដល់សកម្មភាពសង្គម និងមនុស្សធម៌នៅក្នុងប្រទេសនេះ។ បច្ចុប្បន្ន បានក្លាយជាក្រុមហ៊ុនឈានមុខគេ ដែលមានអតិថិជនជិត ៩៧% នៃចំនួនប្រជាជនសរុបរបស់ប្រទេសកម្ពុជា។
លោក ញ៉ុង ឌិនថន មានប្រសាសន៍បន្តថា៖ «ចំពោះ មិត្តហ្វូន យើងតែងតែជឿជាក់ថា ការអភិវឌ្ឍមុខជំនួញត្រូវតែដើរទន្ទឹមគ្នានឹងទំនួលខុសត្រូវសង្គម ហើយយើងបាននិងកំពុងធ្វើកិច្ចការដែលរួមចំណែកដល់សង្គមអស់រយៈពេលជិត១០ឆ្នាំមកហើយ»។
ក្រៅពីសហការលើកិច្ចការសង្គមជាមួយក្រុមគ្រូពេទ្យស្ម័គ្រចិត្តយុវជនសម្ដេចតេជោ TYDA ក្រុមហ៊ុន មិត្តហ្វូន ក៏បាននិងកំពុងអនុវត្តសកម្មភាពជួយសង្គមជាច្រើនទៀតនៅក្នុងវិស័យនានា ដូចជា វេជ្ជសាស្ត្រ អប់រំ កីឡា និងមនុស្សធម៌។ កម្មវិធីទាំងនេះ រួមមាន «វាមិនមែនជាសុបិន», ការប្រកួតបាល់ទាត់លីកកំពូលកម្ពុជាពានរង្វាន់ មិត្តហ្វូន អ៊ិនធើរណិតដល់សាលារៀន និងយុទ្ធនាការស្អាត៕
ចែករំលែកព័តមាននេះ