ខេត្តកោះកុង ៖ នៅវេលាម៉ោង១២និង០០នាទីយប់រំលងអធ្រាត្រឈានចូលថ្ងៃទី០២ ខែវិច្ឆិកា ឆ្នាំ២០១៧ ដែលជាវេលាបញ្ចប់ឱសានវាទនៃការបង់ថ្លៃឆ្លងស្ពានកោះកុងតាមអនុសាសន៍ដ៏ខ្ពង់ខ្ពស់របស់សម្តេចតេជោប្រមុខរាជរដ្ឋាភិបាល លោកជំទាវ មិថុនា ភូថង អភិបាលនៃគណៈអភិបាលខេត្តបានដឹកនានាំមន្ត្រីរាជការកងកំលាំងប្រដាប់អាវុធសិស្សានុសិស្ស និងប្រជាពលរដ្ឋយ៉ាងច្រើនកុះករដោយមានទាំងព្រះសង្ឃចូលរួមផងបានប្រារព្ឋពិធីដឹងគុណ និងថ្លែងអំណរគុណចំពោះទឹកចិត្តសន្តោសប្រណីកាត់បន្ថយភាពទុកលំបាកក្រីក្ររបស់ពលរដ្ឋខេត្តកោះកុងទាំងមូលក៏ដូចជាពលរដ្ឋទូទាំងប្រទេសដែរឱ្យបញ្ឈប់ការបង់ប្រាក់ថ្លៃឆ្លងស្ពានចាប់ពីពេលនេះតទៅ ។
ការថ្លែងអំណរគុណចំពោះសម្តេចតេជោនេះត្រូវបានធ្វើឡើងនៅទីតាំងបញ្ជាលក់សំបុត្រស្ថិតនៅចុងស្ពានខាងលិច ហើយត្រូវបានបញ្ចប់នៅពាក់កណ្តាលអធ្រាត្រវិញដោយក្តីសោមនស្សរីករាយក្រៃលែង ។ លុះដល់ព្រឹកឡើងនៅវេលាម៉ោង៦និង៣០នាទី ពិធីថ្លែងងអំណរគុណនេះត្រូវបានប្រារព្ឋឡើងម្តងទៀតនៅទីតាំងដដែលដោយមានការសាទរ និងចូលរួមពីមន្ត្រីរាការកងកំលាំងប្រដាប់អាវុធ ព្រះសង្ឃ សិស្សានុសិស្ស ប្រជាពលរដ្ឋ និងអ្នកធ្វើដំណើរតាមដងផ្លូវចូលរួមយ៉ាងសប្បាយរីករាយ ។
នាឱកាសនោះដែរតំណាងគ្រប់ស្ថាប័នដែលបានចូលរួមនីមួយៗសុទ្ធតែបានលើកឡើងនូវទស្សនៈរបស់ខ្លួនដោយក្តីរំភើបត្រេកអរដូចៗគ្នាថា សូមថ្លែងអំណរគុណយ៉ាងជ្រាលជ្រៅបំផុតគ្មានអ្វីប្រៀបផ្ទឹមបានចំពោះកាដូរបស់សម្តេចតេជោដែលបានទិញស្ពានកោះកុងនេះឡើងពីក្រុមហ៊ុន លី យ៉ុងផាត់ មកប្រគល់ឱ្យពលរដ្ឋធ្វើដំណើឆ្លងកាត់ដោយមិនបាច់បង់ប្រាក់ចាប់ពីពេលនេះតទៅ និងសូមគាំទ្រ និងជូនពរឱ្យសម្តេចទទួលបាននូវជ័យជំនះក្នុងពេលបោះឆ្នោតឆ្នាំ២០១៨ខាងមុខបន្តដឹកនាំរាជរដ្ឋាភិបាលជារៀងរហូត ៕
ចែករំលែកព័តមាននេះ