អ្នកដែលមានជំងឺរលាកសន្លាក់មានហានិភ័យខ្ពស់ក្នុងការកើតជំងឺសួតដ៏មានគ្រោះថ្នាក់។ នេះបើតាមក្រុមអ្នកវិទ្យាសាស្ត្របានព្រមាន ។
យោងតាមលទ្ធផលនៃការស្រាវជ្រាវថ្មីបានឲ្យដឹងថា មនុស្សជាង៤០០.០០០នាក់មានជំងឺរលាកសន្លាក់រ៉ាំរ៉ៃនៅចក្រភពអង់គ្លេស និងមានមនុស្សជាង៥០លាននាក់ក្នុងសហរដ្ឋអាមេរិកមានហានិភ័យជិត៥០%ក្នុងការវិវឍ្ឍជាជំងឺស្ទះសួតរ៉ាំរ៉ៃហៅកាត់ថា COPD។
ជំងឺរលាកសន្លាក់រ៉ាំរ៉ៃគឺជាជំងឺដែលមានរយៈពេលយូរនៅពេលប្រព័ន្ធភាពស៊ាំបំផ្លាញខ្លួនឯងដែលបណ្តាលឲ្យមានការឈឺចាប់ ហើម និងស្ពឹកសន្លាក់ ។ ប៉ុន្តែបញ្ហាបន្ថែមកើតចេញពីការរលាកដែលវាទៅរលាកសន្លាក់ទាំងនោះ ។ វាគឺជាការរលាកដែលត្រូវបានគេគិតថានាំឲ្យមានជំងឺ COPD ។
អ្នកដែលមានជំងឺរលាកសន្លាក់រ៉ាំរ៉ៃមានហានិភ័យខ្ពស់ក្នុងការកើតជំងឺសួតចំនួន៤៧%។ ស្ត្រីដែលមានជំងឺនេះប្រឈមនឹងការកើតជំងឺសួតរហូតដល់៦១% ។ ទាំងនេះគឺជាការរកឃើញនៃការស្រាវជ្រាវលើមនុស្សជិត២៥.០០០នាក់ដែលមានជំងឺរលាកសន្លាក់ដែលត្រូវបានតាមដានអស់រយៈពេលជាង១ទសវត្សដោយក្រុមអ្នកស្រាវជ្រាវកាណាដា ។
វេជ្ជបណ្ឌិត Diane Lacaille អ្នកដឹកនាំការស្រាវជ្រាវពីសាកលវិទ្យាល័យ British Columbia បាននិយាយថា ៖«ការរកឃើញទាំងនេះគឺជារឿងថ្មីព្រោះវាទើបតែត្រូវបានគេទទួលស្គាល់ថាការរលាកមាន នាទីក្នុងការអភិវឌ្ឍជាជំងឺ COPD ហើយគ្រូពេទ្យព្យាបាលអ្នកដែលមានជំងឺរលាកសន្លាក់មិនដឹងទេថា អ្នកជំងឺរបស់ពួកគេមានហានិភ័យខ្ពស់ក្នុងការវិវឍ្ឍទៅរកជំងឺ COPD » ។
ការស្រាវជ្រាវនេះសង្កត់ធ្ងន់ទៅលើសារសំខាន់នៃការគ្រប់គ្រងរលាកឲ្យបានឆាប់តាមដែលអាចធ្វើទៅបាន ៕
ចែករំលែកព័តមាននេះ