រាជធានីភ្នំពេញ ៖ គោទាំងហ្វូងត្រូវបានគេលែងឲ្យដើររុករាន ពេញភូមិនានាក្នុងសង្កាត់ចោមចៅ ខណ្ឌពោធិ៍សែនជ័យ ទាំងយប់ទាំងថ្ងៃ និងតែងតែបង្កគ្រោះថ្នាក់ដល់អ្នកដំណើរទៅពេលយប់ ហើយពុំត្រូវបានអាជ្ញាធរមានវិធានការឡើយ។ តាមប្រជាពលរដ្ឋ ដែលរស់នៅម្តុំវិហារអីស្លាម…
រាជធានីភ្នំពេញ ៖ គោទាំងហ្វូងត្រូវបានគេលែងឲ្យដើររុករាន ពេញភូមិនានាក្នុងសង្កាត់ចោមចៅ ខណ្ឌពោធិ៍សែនជ័យ ទាំងយប់ទាំងថ្ងៃ និងតែងតែបង្កគ្រោះថ្នាក់ដល់អ្នកដំណើរទៅពេលយប់ ហើយពុំត្រូវបានអាជ្ញាធរមានវិធានការឡើយ។ តាមប្រជាពលរដ្ឋ ដែលរស់នៅម្តុំវិហារអីស្លាម បានឲ្យដឹងថា សត្វ គោត្រូវបានគេលែងឲ្យដើរទាំងហ្វូងៗទាំងយប់ទាំងថ្ងៃយ៉ាងអនាធិបតេយ្យបំផុត ជាហេតុធ្វើឲ្យគ្រោះថ្នាក់ដល់អ្នកដំណើរ ព្រមទាំងបំផ្លិចបំផ្លាញដល់របស់របរ និងផលដំណាំនានាដែលគេដាំ និងទុកមុខផ្ទះ មិនតែប៉ុណ្ណោះគោទាំងនោះបានជុះអាចម៍ ធ្លាក់ពេញផ្លូវ ប៉ះពាល់ដល់បរិស្ថានផងដែរ។
តាមព័ត៌មានឲ្យដឹងទៀតថាគោទាំងនោះមានច្រើនហ្វូង បានដើរកណ្តាលផ្លូវ ទាំងយប់ទាំងថ្ងៃកាត់ពីភូមិមួយទៅភូមិមួយ និងពេលខ្លះដេកនៅកណ្តាលផ្លូវតែម្តង។ នៅពេលខ្លះគោទាំងនោះបង្កឲ្យស្ទះចរាចរណ៍ផងដែរ។ តាមសម្ដីអ្នកស្រុកឲ្យដឹងទៀតថា មានមនុស្សជាច្រើនដែលបានរងគ្រោះថ្នាក់ដោយសារតែសត្វគោ ហើយរាយការណ៍ទៅអាជ្ញាធរសង្កាត់ ខណ្ឌ ដើម្បីមានវិធានការ តែគេឃើញគោទាំងនោះនៅតែបង្កអនាធិបតេយ្យ រុករានដល់ភូមិ អ្នកស្រុកដដែល។
តាមមន្ត្រីនគរបាលប៉ុស្តិ៍ចោមចៅបានឲ្យដឹងថា កន្លងមក មានអ្នកធ្វើដំណើរ ដោយម៉ូតូជាច្រើននាក់បានរងគ្រោះថ្នាក់ដោយសាតែហ្វូងគោទាំងនោះ ដើរពេញផ្លូវ និងដេកនៅកណ្តាលពេលយប់។ តាមមន្ត្រីសង្កាត់ម្នាក់ បានឲ្យដឹងដែរថា កន្លងមកអាជ្ញាធរ បានឃាត់គោទាំងនោះយកមកទុកសាលាសង្កាត់ ហើយបានហៅម្ចាស់មកធ្វើកិច្ចសន្យាអប់រំឲ្យឈប់លែងគោអនាធិបតេយ្យទៀត តែម្ចាស់នៅតែមិនស្តាប់តាមការណែនាំ នៅតែចិញ្ចឹមគោលែងឲ្យដើរពេញផ្លូវ និងបង្កគ្រោះថ្នាក់ដដែល៕
ចែករំលែកព័តមាននេះ