រាជធានីភ្នំពេញ ៖ ដោយមើលឃើញថា ការទិញសំបុត្រឡានក្រុងនៅមានរូបភាពជាលក្ខណៈប្រពៃណីនៅឡើយ គឺទិញនៅតាមស្ថានីយផ្ទាល់តែម្តង ។ ហើយការទិញតាមប្រព័ន្ធអេឡិចត្រូនិចក៏នៅមានកម្រិត សម្រាប់ប្រជាពលរដ្ឋខ្មែរ ។ ហេតុដូចនេះក្រុមហ៊ុនទ្រូម៉ាន់នី និងក្រុមហ៊ុន BookMeBus ដែលជាក្រុមហ៊ុនទទួលលក់សំបុត្ររថយន្តបានចាប់ដៃគ្នាបង្កើតនូវសេវាកម្មទិញសំបុត្រឡានក្រុងតាមភ្នាក់ងារទ្រូម៉ាន់នី ។
ក្នុងពិធីចុះហត្ថលេខាលើអនុស្សរណៈកាលពីពេលថ្មីៗនេះ លោក គង់ មាន អគ្គនាយកក្រុមហ៊ុនទ្រូម៉ាន់នីបានមានប្រសាសន៍ថា ក្រុមហ៊ុនទាំងពីរបានសហការគ្នា ក្នុងគោលបំណងរួមគឺផ្តល់ភាពងាយស្រួលដល់ប្រជាពលរដ្ឋខ្មែរ ក្នុងការទិញសំបុត្រឡានក្រុង ។
ក្នុងនោះអ្នកដំណើរ ពុំចាំបាច់ចំណាយពេលទៅទិញសំបុត្រនៅស្ថានីយឡានក្រុងនីមួយៗនោះទេ ហើយក៏មិនចាំបាច់ទៅរង់ចាំយកសំបុត្រមុនពេលចេញដំណើរបន្ទាប់ពីកក់សំបុត្រតាមទូរស័ព្ទនោះដែរ ។
លោកបន្តថា ក្រុមហ៊ុនទ្រូម៉ាន់នី តែងតែគិតគូរដល់ភាពងាយស្រួលរបស់អតិថិជនខ្លួន ជានិច្ច ជាក់ស្ដែងកន្លងមកនេះ ក្រុមហ៊ុនបានសហការជាមួយបណ្ដាគ្រឹះស្ថានហិរញ្ញវត្ថុ និងបណ្ដាក្រុមហ៊ុនជាច្រើន ដើម្បីឱ្យប្រជាពលរដ្ឋងាយស្រួលក្នុងការប្រើប្រាស់សេវាកម្មរបស់ទ្រូម៉ាន់នី ។ ម្យ៉ាងវិញទៀតដើម្បីលើកទឹកចិត្តដល់អតិថិជនដែលប្រើប្រាស់សេវាកម្មរបស់ទ្រូម៉ាន់នី ក្រុមហ៊ុនក៏បានរៀបចំអោយមានការឈ្នះរង្វាន់ជាប្រចាំផងដែរ ។
លោក ជា ឡង់ដា នាយកប្រតិបត្តិក្រុមហ៊ុន BookMeBus បានឱ្យដឹងថា កន្លងមក វាមានភាពពិបាកសម្រាប់អ្នកដំណើរ តាមរថយន្តក្រុង ព្រោះពួកគាត់ត្រូវ ទៅកាន់ស្ថានីយ៍លក់សំបុត្រ ដើម្បីទិញសំបុត្រទុក ហើយនៅថ្ងៃចេញដំណើរត្រូវទៅកាន់ស្ថានីយរថយន្តក្រុងម្ដងទៀត ដូចនេះអ្នកដំណើរត្រូវការទៅកាន់ស្ថានីយច្រើនដង មុននឹងបានចេញដំណើរទៅកាន់គោលដៅ ។ អ្វីដែលសំខាន់នោះ ដោយសារតែចរាចរណ៍នៅកម្ពុជា ជាពិសេសនៅរាជធានីភ្នំពេញ មានការកកស្ទះស្ទើររាល់ថ្ងៃ ដែលធ្វើឱ្យអ្នកដំណើរត្រូវ ចំណាយពេលច្រើន រាល់ពេលធ្វើដំណើរម្ដងៗនៅក្នុងក្រុង ។
ចែករំលែកព័តមាននេះ