លោកជេកគី ចាន់ ហៅ ឈិនឡុង កំពូល តារាភាពយន្តចិនល្បីឈ្មោះជាច្រើនទសវត្សរ៍បានបង្ហាញខ្លួនក្នុងសន្និសីទកាសែតមួយកាលពីថ្ងៃទី២៧ សីហា ឆ្នាំ២០១២ នៅទីក្រុងប៉េកាំង ប្រទេសចិន ដើម្បីផ្សព្វផ្សាយពីចំណងដៃខ្សែភាពយន្តថ្មីសន្លាងមួយទៀតក្នុងឆ្នាំ២០១២នេះ គឺរឿង «CZ12» ។ នេះបើយោងតាមប្រភពគេហទំព័រ សិល្បៈចិន ចេញផ្សាយថ្ងៃទី៣០ សីហា ឆ្នាំ២០១២ ។
ប្រភពព័ត៌មានបន្តថា ខ្សែភាពយន្តនេះអាចជាការសម្តែងចុងក្រោយរបស់កំពូលតារាក្បាច់គុនកុងហ៊្វូ រូបនេះ ប៉ុន្តែមិនមែនជាទីបញ្ចប់នៃអាជីពរបស់លោកទេ ខណៈដែលពេលនេះលោកកំពុងកាន់អត្ថបទភាពយន្តចំនួន៤ទៅ៥រឿងនៅក្នុងដៃ ។
តារាភាពយន្តវ័យ៥៨ឆ្នាំរូបនេះបានធ្វើដំណើរទៅធ្វើសន្និសីទកាសែតតាមរថយន្តស្ព័រដ៏ទំនើបមួយគ្រឿងជាមួយតារាភាពយន្តស្រីពីរដួងទៀតគឺនាង Yao Xingtong និងនាង Zhang Lanxin ដែលពួកនាងទាំងពីរសុទ្ធតែមានកេរ្តិ៍ឈ្មោះបោះសំឡេងចេញពីផលិតកម្មភាពយន្តរបស់លោក ។
ក្នុងឱកាសនោះ លោកឈិន ឡុង បានកោតសរសើរនាង Yao Xington ថា នាងបានចំណាយពេលស្ទើរ២៤ម៉ោងជារៀងរាល់ថ្ងៃក្នុងការថតខ្សែភាពយន្តនេះ ហើយអាចរៀនភាសាបារាំងចេះយ៉ាងល្អប្រសើរក្នុងរយៈពេលតែ៣ខែប៉ុណ្ណោះ ។ ដោយឡែកនាង Zhang Lanxin ដែលជាអតីតកីឡាការិនីតៃក្វាន់ដូ បានឈានជើងចូលប្រឡូកក្នុងវិស័យសិល្បៈវិញនោះ លោកឈិន ឡុង បានសរសើរពីក្បាច់គុនកុងហ៊្វូរបស់នាង ដែលរៀនឆាប់ចេះ និងសម្តែងបានយ៉ាងល្អឥតខ្ចោះ ។ នាង Zhang Lanxin ធ្លាប់ឈ្នះជើងឯកជម្រើសជាតិ ក្នុងវិញ្ញាសាតៃក្វាន់ដូនារី ក្នុងឆ្នាំ២០០៤ ក្នុងទម្ងន់៥៥គីឡូក្រាម ។
ប្រភពព័ត៌មានបន្តថា នៅក្នុងអំឡុងពេលធ្វើសន្និសីទកាសែត តារាភាពយន្តទាំងបីដួងត្រូវបានទទួលស្វាគមន៍យ៉ាងកក់ក្តៅពីតារាភាពយន្តជើងចាស់ជាច្រើនរូប ។
ប្រភពបានឱ្យដឹងទៀតថា ខ្សែភាពយន្តរឿង CZ12 នេះនឹងត្រូវដាក់បញ្ចាំងជូនទស្សនានៅក្នុងរោងមហោស្រពទូទាំងប្រទេសចិន នៅថ្ងៃទី២០ ខែធ្នូ ឆ្នាំ ២០១២ ខាងមុខ ៕
ចែករំលែកព័តមាននេះ