រាជធានីភ្នំពេញ ៖ បន្ទាប់ពីលេចឮនូវព័ត៌មានជាបន្តបន្ទាប់ស្តីពីការប្រេះឆាក្នុងគ្រួសាររបស់លោកសាពូន មីដាដា និងភរិយានាង សឿ សុធារ៉ា នោះ តារាចម្រៀងប្រចាំផលិតកម្មរស្មីហង្សមាស លោកសាពូន មីដាដា បានបដិសេធរឿងនេះ ហើយថាផ្កាស្នេហ៍នៅតែរីកស្រស់ប៉ប្រិមដដែល ។
រាជធានីភ្នំពេញ ៖ បន្ទាប់ពីលេចឮនូវព័ត៌មានជាបន្តបន្ទាប់ស្តីពីការប្រេះឆាក្នុងគ្រួសាររបស់លោកសាពូន មីដាដា និងភរិយានាង សឿ សុធារ៉ា នោះ តារាចម្រៀងប្រចាំផលិតកម្មរស្មីហង្សមាស លោកសាពូន មីដាដា បានបដិសេធរឿងនេះ ហើយថាផ្កាស្នេហ៍នៅតែរីកស្រស់ប៉ប្រិមដដែល ។
ឆ្លើយតបជាមួយកោះសន្តិភាពតាមទូរស័ព្ទ លោកសាពូន មីដាដា បញ្ជាក់ថា បច្ចុប្បន្នលោកនិងភរិយានៅតែមានភាពល្អូកល្អិននឹងគ្នាដដែល ពោលគឺមិនមានការថ្នាំងថ្នាក់ណាមួយដូចដែលសារព័ត៌មានមួយចំនួនបានចុះផ្សាយឡើយ ។ ការលេចឮថា លោកនិងភរិយាបែកបាក់គ្នានោះលោកមិនដឹងថាគេបានព័ត៌មាននោះមកពីណាទេ ហើយជារឿយៗលោកតែងតែបានបដិសេធ ។
ព័ត៌មាននៃការបាក់បែករបស់លោកសាពូន មីដាដា និងអ្នកនាងសឿ សុធារ៉ា បានកើតមានឡើងនៅពេលនាងសឿ សុធារ៉ា វិលត្រឡប់មកចាប់អាជីពសិល្បៈវិញ ដើម្បីស្តារមុខមាត់ បន្ទាប់ពីបាក់ស្រុតក្រោយពេលរៀបការរួច និងចំណាយពេលមើលថែកូន ។ ការវិលមកចាប់អាជីពសិល្បៈជាថ្មីនេះហើយដែលធ្វើឱ្យគេមានមន្ទិលសង្ស័យថាចំណងអាពាហ៍ពិពាហ៍របស់តារាទាំង២ដួងនេះកំពុងតែឈានបន្តិចម្តងៗទៅរកការបែកបាក់ ។ ម្យ៉ាងទៀត ខណៈពេលការមន្ទិលសង្ស័យរឿងបែកបាក់នេះនៅមិនទាន់បានលាងឱ្យជ្រះស្រឡះផងនោះ ស្រាប់តែគេឃើញ នាង សឿ សុធារ៉ា ងាកទៅចាប់ដៃគូជាមួយលោកអ៊ែន ឌី សាជាថ្មី ដោយមានទាំងថតរូបឱបរឹតគ្នាដែលគេមិនធ្លាប់ឃើញនាងធ្លាប់ធ្វើបែបនេះពីមុនមកឡើយ ។ បញ្ហានេះធ្វើឱ្យគេកាន់តែមានការសង្ស័យខ្លាំងឡើង ខណៈពេលដែលចំណងស្នេហ៍ជាមួយស្វាមីហាក់មិនសូវផ្អែមល្ហែមដូចមុន ។
ជុំវិញបញ្ហានេះ លោកសាពូន មីដាដា អះអាងថាការវិលត្រឡប់ចូលសិល្បៈជាថ្មីរបស់នាង សឿ សុធារ៉ា វិញនោះ សម្រាប់លោកគឺមិនជំទាស់ឡើយ ព្រោះនេះគឺជាគោលបំណងរបស់ភរិយា ។ ផ្ទុយទៅវិញ គឺលោកសប្បាយចិត្តដែលក្រុមគ្រួសាររបស់លោកបានរួមគ្នាក្នុងការជួយលើកស្ទួយវិស័យសិល្បៈឱ្យកាន់តែមានភាពរីកចម្រើនថែមទៀត ស្របពេលដែលនៅមានទស្សនិកជនគាំទ្រនោះ។
ចំពោះពាក្យគេនិយាយថា លោកប្រច័ណ្ឌភរិយាជាមួយលោកអ៊ែន ឌី នោះគឺរឹតតែមិនអាចទៅរួចឡើយ ម្យ៉ាងភរិយារបស់លោកបានបកស្រាយបញ្ហានេះរួចហើយថានាងចាប់ដៃគូជាមួយលោកអ៊ែន ឌី ជាយូរមកហើយ គឺតាំងពីនៅតូចៗម៉្លេះ ។ អ្នកទាំង២ស្គាល់គ្នាមុនស្គាល់លោកទៅទៀត ហើយពួកគេគ្រាន់តែរាប់អានគ្នាជាបងប្អូនប៉ុណ្ណោះមិនមានអ្វីលើសពីនេះឡើយ ។
នាងសឿ សុធារ៉ា និងលោកសាពូន មីដាដា បានរៀបអាពាហ៍ពិពាហ៍ជាមួយគ្នាកាលពីថ្ងៃទី១៣ ខែវិច្ឆិកា ឆ្នាំ២០០៩ នៅណាហ្គាវើល ដោយអះអាងថាបានចំណាយប្រាក់រៀបចំរាប់ម៉ឺនដុល្លារ ។ ចំណងដៃនៃគូស្នេហ៍នេះគឺកូនស្រីឈ្មោះសាពូន តារាពិមាន ដែលពេលនេះមានអាយុជាង១ខួបហើយ ។
បើទោះបីជាមានការអះអាងការពារចំណងស្នេហ៍របស់ខ្លួនពីលោកសាពូន មីដាដា ក៏ដោយក៏មហាជនខ្លះនៅមិនទាន់ជឿទាំងស្រុងទេ ព្រោះព័ត៌មាននៃការប្រេះឆាចេះតែលេចឮជាបន្តបន្ទាប់ ដូច្នេះនឹងរង់ចាំតាមដានតទៅទៀត ៕
ចែករំលែកព័តមាននេះ