ខេត្តកំពង់ឆ្នាំង ៖ សាឡង់ដឹកទំនិញមួយគ្រឿងបានលិចទៅក្នុងទឹកទន្លេសាបនាំយកទៅជាមួយអង្ករជាង១០តោន មី និងត្រីខកំប៉ុងជាច្រើនកេស ដោយគ្មានអ្នកណាជួយស្រង់ ឬផ្ទេរផ្ទូរទាន់ពេលវេលាឡើយ បានត្រឹមតែបង្កឱ្យមានការសោកស្តាយតែប៉ុណ្ណោះ កាលពីវេលាម៉ោង៥ល្ងាច ថ្ងៃទី១ ធ្នូ ២០១១ នៅចំណុចក្បាលកោះឫស្សីដង្កួច ភូមិឫស្សីដង្កួច ឃុំជលសា ស្រុកជលគិរី ។
តាមមន្ត្រីខេត្តកំពង់ឆ្នាំង បានឱ្យដឹងថា អង្ករជាង១០តោន មី និងត្រីខកំប៉ុងជាច្រើនកេសនេះ គឺត្រូវដឹកតាមសាឡង់ទៅកាន់សាលាស្រុកជលគិរី ដើម្បីត្រៀមចែកអំណោយដល់ជនរងគ្រោះដោយសារទឹកជំនន់ចំនួន១.៣៨៩គ្រួសារ ដែលមកពីបណ្តាឃុំនានាក្នុងស្រុកជលគិរី នៅថ្ងៃទី២ ធ្នូ ២០១១ នេះ តែស្តាយណាស់ឥឡូវអំណោយអង្ករ មី និងត្រីខកំប៉ុងបានលិចចូលទៅក្នុងទន្លេសាបបាត់អស់ទៅហើយ រីឯការចែកអំណោយក៏ត្រូវលើកពេលផងដែរ ប៉ុន្តែមិនទាន់កំណត់នៅថ្ងៃណានៅឡយទេ ។
សូមបញ្ជាក់ថា សាឡង់នេះបានលិចដោយសារតែរយះដែកធ្លាយចូលទឹក ហើយបន្តិចម្តងៗក៏លិចភ្លឹបបាត់តែម្តង ប៉ុន្តែគ្មាននរណាម្នាក់រងរបួស ឬស្លាប់បាត់បង់ជីវិតនោះទេ ។ ម្ចាស់សាឡង់ឈ្មោះឃុន ម៉េង បានឱ្យដឹងថា អង្ករត្រូវខូចខាតទាំងស្រុង ចំណែកមី និងត្រីខកំប៉ុងត្រូវស្រង់យកបានមកវិញ ប៉ុន្តែកេសក្រដាសខាងក្រៅខូចខាតអស់ហើយ យើងអាចច្រកថង់វេចខ្ចប់ចែកជូនប្រជាពលរដ្ឋបាន ។ ដោយឡែកអង្ករដែលខូចខាតជាង១០តោន រូបគាត់ជាម្ចាស់សាឡង់ធានាចេញសងទាំងអស់…៕
ចែករំលែកព័តមាននេះ