រាជធានីភ្នំពេញ ៖ នេះជាទស្សនកិច្ចទី១របស់លោកវុក ហ្សេរ៉េមីក រដ្ឋមន្ត្រីការបរទេសនៃសាធារណរដ្ឋស៊ែប៊ីនៅកម្ពុជាបន្ទាប់ពីមាន ទស្សនកិច្ចនៅឆ្នាំ១៩៦៨របស់សេនាប្រមុខប្រធានាធិបតីយូហ្គោស្លាវី ទីតូនៅកម្ពុជាដែលជាភ្ញៀវរបស់សម្តេចព្រះរាជបិតាពេលព្រះអង្គ ជាប្រមុខប្រទេសកម្ពុជា។
រាជធានីភ្នំពេញ ៖ នេះជាទស្សនកិច្ចទី១របស់លោកវុក ហ្សេរ៉េមីក រដ្ឋមន្ត្រីការបរទេសនៃសាធារណរដ្ឋស៊ែប៊ីនៅកម្ពុជាបន្ទាប់ពីមានទស្សនកិច្ចនៅឆ្នាំ១៩៦៨របស់សេនាប្រមុខប្រធានាធិបតីយូហ្គោស្លាវីទីតូនៅកម្ពុជាដែលជាភ្ញៀវរបស់សម្តេចព្រះរាជបិតាពេលព្រះអង្គជាប្រមុខប្រទេសកម្ពុជា។
បន្ទាប់ពីជំនួបពិភាក្សាអស់រយៈពេលមួយម៉ោងជាមួយលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិរួចមក ភាគីទាំងពីរបានធ្វើសន្និសីទសារព័ត៌មានមួយដើម្បីបញ្ជាក់ប្រាប់ដល់សារព័ត៌មានជាតិ អន្តរជាតិឱ្យបានដឹងអំពីចំណងមិត្តភាព ទំនាក់ទំនងកិច្ចសហប្រតិបត្តិការដែលប្រទេសទាំងពីរធ្លាប់មានជាយូរមកហើយរវាងកម្ពុជា និងស៊ែប៊ី រវាងព្រះករុណាព្រះវររាជបិតា និងថ្នាក់ដឹកនាំរបស់ប្រទេសស៊ែប៊ី។
ក្នុងសន្និសីទសារព័ត៌មាននោះលោកវុក ហ្សេរ៉េមីក រដ្ឋមន្ត្រីការបរទេសនៃសាធារណរដ្ឋស៊ែប៊ីមានប្រសាសន៍ថា ខ្ញុំមានសេចក្តីរីករាយណាស់សូមថ្លែងអំណរគុណចំពោះបដិសណ្ឋារកិច្ចទទួលខ្ញុំមកបំពេញទស្សនកិច្ចផ្លូវការនៅកម្ពុជាជាលើកដំបូងក្រោយពីមានទស្សនកិច្ចថ្នាក់ដឹកនាំយូហ្គោស្លាវីនៅកម្ពុជាតាំងពីយូរមកហើយ។ ទំនាក់ទំនងរវាងប្រទេសយើងទាំងពីរនៅ ក្នុងប្រវត្តិរបស់យើងនេះគឺជាទំនាក់ទំនងប្រកបទៅដោយមិត្តភាព និងកិច្ចសហប្រតិបត្តិការដ៏ល្អប្រសើរ។
លោករដ្ឋមន្ត្រីការបរទេសសាធារណរដ្ឋស៊ែប៊ីបន្តថា ថ្ងៃនេះខ្ញុំមានសេចក្តីរីករាយ និងមានការអបអរណាស់ដោយខ្ញុំអាចបន្តនូវប្រពៃណីទំនាក់ទំនងដ៏ល្អរវាងប្រទេសទាំងពីរដូចដែលលោកឧបនាយករដ្ឋមន្ត្រីហោ ណាំហុង បានមានប្រសាសន៍កាលពីឆ្នាំនេះលោកឧបនាយករដ្ឋមន្ត្រីហោ ណាំហុង បានអញ្ជើញទៅទីក្រុងបែលហ្គ្រាតបានជួបខ្ញុំនៅទីនោះក្នុងឱកាសអញ្ជើញចូលរួមកិច្ចប្រជុំុំមួយរបស់ចលនាមិនចូលបក្សសម្ព័ន្ធ។ នៅពេលនោះខ្ញុំបានសន្យាចំពោះលោកឧបនាយករដ្ឋមន្ត្រីថា ខ្ញុំនឹងមកបំពេញទស្សនកិច្ចនៅប្រទេសកម្ពុជាក្នុងពេលឆាប់ៗ។ ខ្ញុំមានសេចក្តីរីករាយណាស់ដែលខ្ញុំអាចបំពេញកិច្ចសន្យារបស់ខ្ញុំក្នុងពេលដ៏ឆាប់មកបំពេញទស្សនកិច្ចនៅកម្ពុជានៅពេលនេះ។
អ្វីដែលបញ្ជាក់នៅពេលនេះលោកវុក ហ្សេរ៉េមីក បានអះអាងថា ទំនាក់ទំនងរវាងកម្ពុជា-ស៊ែប៊ីគឺមានលក្ខណៈល្អប្រសើរណាស់ យើងគាំទ្រគ្នាទៅវិញទៅមកយ៉ាងពេញទំហឹងទៅលើបញ្ហានានា លើឆាកអន្តរជាតិ ហើយទំនាក់ទំនងល្អនេះនឹងបន្តទៅថ្ងៃអនាគតថែមទៀត។ យើងចាត់ទុកកម្ពុជាជាមិត្តដែលអាចទុកចិត្តគ្នាទៅវិញទៅមកបាន។
ថ្ងៃនេះខ្ញុំ មានអំណរគុណដ៏ខ្លាំងណាស់ ដោយខ្ញុំបានទទួលការគាំទ្រពីប្រទេសកម្ពុជាទាក់ទិននឹងការប្រឹងប្រែងរបស់ស៊ែប៊ី ក្នុងការការពារនូវអធិបតេយ្យភាពទឹកដីរបស់យើង ។ ប្រទេសស៊ែប៊ីនៅថ្ងៃនេះ កំពុងតែជួបបញ្ហាប្រឈមដោយសារមានខេត្តមួយរបស់ស៊ែប៊ី កំពុងតែទាមទារបំបែករដ្ឋ ហើយកម្ពុជាបានគាំទ្រស៊ែប៊ី នៅក្នុងបញ្ហានេះដោយកម្ពុជា បញ្ជាក់ថា នឹងមិនគាំទ្រអាជ្ញាធរដែលទាមទារបំបែករដ្ឋនៅកូសូវ៉ូទេ ។
នេះជាជំហរជាគោលការណ៍របស់កម្ពុជា។ បើសិនជាយើងអនុញ្ញាតឱ្យបំបែករដ្ឋនៅទីណាមួយនោះអំពើឧទ្ទាមបំបែករដ្ឋនេះនឹងកើតមាននៅគ្រប់ទិសទីក្នុងទូទាំងពិភពលោក ។ ក្នុងការប្រកាសមិនទទួលស្គាល់ការបំបែករដ្ឋនៅកូសូវ៉ូ ប្រទេសកម្ពុជា និងប្រទេសស៊ែប៊ីបានចូលរួមចំណែកក្នុងការទប់ស្កាត់ការបំបែករដ្ឋនៅទូទាំងពិភពលោក ។
ជាថ្មីម្តងទៀតលោកវុក ហ្សេរ៉េមីក បានថ្លែងអំណរគុណចំពោះរាជរដ្ឋាភិបាល និងប្រជាជនកម្ពុជាដែលបានគាំទ្រស៊ែប៊ីនៅលើបញ្ហានេះ ខ្ញុំនិងលោកឧបនាយករដ្ឋមន្ត្រីហោ ណាំហុង ក៏បានខំរក្សាផងដែរអំពីកិច្ចសហប្រតិបត្តិការនៅថ្ងៃអនាគតរវាងប្រទេសទាំងពីរ ។ យើងបានពិភាក្សាអំពីកិច្ចសហប្រតិបត្តិការវិស័យអប់រំ វិស័យការពារជាតិ និងវិស័យកសិកម្ម ។ យើងសង្ឃឹមថា នៅក្នុងឆ្នាំក្រោយនេះនឹងអាចមាននិស្សិតកម្ពុជាចូលរួមកម្មវិធីបណ្តុះបណ្តាលនៅស៊ែប៊ី រួមទាំងមន្ត្រីរាជការសីុវិល ព្រមទាំងមន្ត្រីខាងយោធាផង។
ខ្ញុំសង្ឃឹមថា នៅឆ្នាំ២០១២ ឆ្នាំក្រោយនេះគឺជាឆ្នាំមួយដែលទំនាក់ទំនងរវាងកម្ពុជា និងស៊ែប៊ី កាន់តែសីុជំរៅ និងមានភាពកាន់តែទូលំទូលាយ។ ជាថ្មីម្តងទៀតខ្ញុំសូមថ្លែងអំណរគុណចំពោះលោកឧបនាយករដ្ឋមន្ត្រីហោ ណាំហុង ដែលបានផ្តល់បដិសណ្ឋារកិច្ចយ៉ាងកក់ក្តៅបំផុតដល់ខ្ញុំនៅទីក្រុងភ្នំពេញនេះ។ ខ្ញុំសង្ឃឹមថា នៅថ្ងៃក្រោយខ្ញុំនឹងមកបំពេញទស្សនកិច្ចនៅកម្ពុជាម្តងទៀតដោយចំណាយពេលច្រើនជាងនេះ។
មានប្រសាសន៍ក្នុងឱកាសនោះលោកឧបនាយករដ្ឋមន្ត្រីហោ ណាំហុង បានបញ្ជាក់សាជាថ្មីថា ទំនាក់ទំនងរវាងកម្ពុជាជាមួយអតីតយូហ្គោស្លាវីនេះជាមិត្តភាពដ៏យូរអង្វែងជាប្រវត្តិសាស្ត្រ។ ចំពោះដំណើរទស្សនកិច្ចរបស់លោករដ្ឋមន្ត្រីការបរទេសស៊ែប៊ីនេះជាការតភ្ជាប់ឡើងវិញ ធ្វើឱ្យមិត្តភាពជាប្រវត្តិសាស្ត្រនេះ សហប្រតិបត្តិការដ៏យូរលង់នេះធ្វើយា៉ងណាឱ្យមានជីវភាពរស់រវើកសកម្មឡើងវិញ។
ទន្ទឹមនឹងនេះលោកឧបនាយករដ្ឋមន្ត្រីក៏បានសម្តែងនូវការអរគុណចំពោះលោករដ្ឋមន្ត្រីការបរទេសស៊ែប៊ី ពីការគាំទ្ររបស់ស៊ែប៊ី នូវបេក្ខភាពរបស់កម្ពុជា ជាសមាជិកមិនអចិន្ត្រៃយ៍ក្រុមប្រឹក្សាសន្តិសុខ ។
ភាគីទាំងពីរក៏បានពិភាក្សាផងដែរ អំពីការបង្កើតយន្តការ ការពិគ្រោះនយោបាយរវាងប្រទេសទាំងពីរ ។ បញ្ហាសហប្រតិបត្តិការសេដ្ឋកិច្ច ពាណិជ្ជកម្ម កសិកម្ម និងទេសចរណ៍ លោកឧបនាយករដ្ឋមន្ត្រី ក៏បានជំរាបផងដែរពីការរីកចម្រើនរបស់កម្ពុជា ក្រោយពីការរលំរលាយរបបខ្មែរក្រហមនៅកម្ពុជា នាឆ្នាំ១៩៧៩ ដើម្បីឱ្យលោករដ្ឋមន្ត្រីការបរទេសស៊ែប៊ី បានយល់ក្នុងការអញ្ជើញមកបំពេញទស្សនកិច្ចជាលើកដំបូងនៅកម្ពុជាយើងថា កម្ពុជាបានទទួលជោគជ័យទាំងស្រុងនូវការគ្រប់គ្រងសភាពការណ៍ក្រោយសង្គ្រាម មានការអភិវឌ្ឍលើគ្រប់វិស័យ ។
លោកឧបនាយករដ្ឋមន្ត្រីមានប្រសាសន៍ថា កម្ពុជាបានត្រៀមធ្វើការផ្លាស់ប្តូរកិច្ចព្រមព្រៀម ឬអនុស្សរណៈអំពីការលើកលែងទិដ្ឋាការទូត លិខិតឆ្លងដែនរវាងប្រទេសទាំងពីរផងដែរ ។
នៅពេលសួរអំពីការបំបែករដ្ឋរបស់ប្រទេសស៊ែប៊ី លោកឧបនាយករដ្ឋមន្ត្រី ហោ ណាំហុង បញ្ជាក់ថា កម្ពុជាមាននយោបាយជាគោលការណ៍មិនទទួលស្គាល់ មិនលើកទឹកចិត្ត ការបំបែករដ្ឋ ដូចលោករដ្ឋមន្ត្រីការបរទេសស៊ែប៊ីបានលើករួចមកហើយថា ថ្ងៃ នេះបើសិនជាមានការទទួលស្គាល់នូវការបំបែករដ្ឋប្រទេសណាមួយ ថ្ងៃស្អែក ឬឆ្នាំក្រោយ…នឹងមានការបំបែករដ្ឋនៅទូទាំងសាកលលោក ។ ការការពារឯក
រាជ្យ អធិបតេយ្យភាព បូរណភាពទឹកដីរបស់ប្រទេសនីមួយៗ គឺទទួលស្គាល់ដោយធម្មនុញ្ញរបស់អង្គការសហប្រជាជាតិ នេះជាគោលការណ៍របស់កម្ពុជា៕
ចែករំលែកព័តមាននេះ