រាជធានីភ្នំពេញ​ ៖ ​ព្រឹត្តិការណ៍​​​នៃការ​​​ប្រកួត​​​បាល់​ទាត់​​​ជាលក្ខណៈ​​អន្តរជាតិ​ ដណ្តើម​​​​ពាន​​រង្វាន់​​ The Bank For Investment and  Development of Cambodia Cup ​ (BIDC Cup) ​ឆ្នាំ​​២០១១​ កម្រិត​​យុវជន​​អាយុ​ក្រោម​​២១ឆ្នាំ​ នឹង​ត្រូវ​​ធ្វើ​ឡើង​​​ចាប់​ពីថ្ងៃ​​​ទី​​៨​ដល់​​​១៦​ ខែតុលាខាង​មុខនៅពហុកីឡដ្ឋាន​ជាតិ​ ។ ​ការ​ប្រកួត​​​នេះត្រូវ​បាន​ចាត់​​ទុក​ថា​ ជា​ព្រឹត្តិការណ៍​​​ដ៏​អស្ចារ្យ​​​បំផុត​និង​ពុំ​ធ្លាប់​​មាន​ពីមុន​មក ព្រោះ​​ថា​មាន​​ប្រទេស​​​​ចំនួន​៦ ​ស្ថិត​​​​នៅ​​​តាម​​ដង​ទន្លេ​មេគង្គ​​ចូលរួម​ ។

​លោក​​​ម៉ៃ តុលា ​អគ្គ​​លេខា​​ធិការ​​រង​​​សហព័ន្ធ​​​​កីឡា​​​បាល់​ទាត់​​កម្ពុជា​​ បាន​ឱ្យ​ដឹង​​នៅ​ក្នុង​​​​​ឱកាស​រៀប​ចំ​ធ្វើ​​ពិធី​​ចាប់​ឆ្នោត​​​ចែក​​ពូល និង​ការ​​ធ្វើ​​សន្និសីទ​​កាសែត​នៅ​​សណ្ឋាគារ​​​ណាហ្គាវើល​​ ​កាលពី​ថ្ងៃទី​​២៧ សីហាថា ប្រទេស​ទាំង៦​​នោះ​មាន​ កម្ពុជា​ វៀត​ណាម​ ឡាវ​ មីយ៉ាន់​ម៉ា ថៃ និង​ចិន​។ ​​នៅក្នុង​ឱកាស​​​នោះ​​ផងដែរ​ ក៏​បាន​​​ការ​អញ្ជើញ​​ចូល​រួម​ពី​លោក​នាយ​ឧត្តម​​​សេនីយ៍​​សៅ សុខា ​ប្រធាន​​សហព័ន្ធ​​កីឡា​​បាល់​ទាត់​​​កម្ពុជា​​ ធ្វើ​​​​ជាតំណាង​​ចាប់​​ឆ្នោត​​ចែក​ពូល​​ប្រកួត ។ ប្រទេស​ទាំង៦​ត្រូវ​បាន​ចែក​ចេញ​ជា​២ពូល​​ដែល​១ពូល​​មាន​​៣​ក្រុម ហើយ​ពូល​A មាន​ចិន ថៃ និងវៀត​ណាម  រីឯពូល​ B មាន​កម្ពុជា​ ឡាវ ​និង​ម៉ាយ៉ាន់​ម៉ា ។

​លោក​​សៅ សុខា មាន​ប្រសាសន៍​​​ថា សម្រាប់​​​ការ​​ប្រកួត​បាល់​ទាត់​​ដណ្តើម​​​ពាន​​រង្វាន់​ BIDC Cup ​២០១១ ​ក្នុង​ក្របខណ្ឌ​​​យុវជន​​អាយុ​​​ក្រោម​​២១ឆ្នាំ​ ​លើក​នេះ​ យើង​ពិត​ជា​​មាន​មោទនភាព​​​ខ្លាំងណាស់ ព្រោះ​ថា​មាន​ប្រទេស​​​ចំនួន​​៦​ចូលរួម ។ ចំពោះ​ភាព​រីក​ចម្រើន​​នេះ​​លោក​ក៏​មិន​ភ្លេច​ដល់​​​បណ្តា​ក្រុម​ហ៊ុន​​ធំៗ​មួយ ចំនួន​​ដែល​​បាន​ជួយ​​ដូចជា​  BIDC Cup ​និង​ Metfone ជាដើម​។ គួរ​រំលឹក​​​ផងដែរ​ថា ការ​​ប្រកួត​បាល់​ទាត់​ពាន​រង្វាន់​ BIDC Cup ​ឆ្នាំ ២០១០ មាន​​ប្រទេស​​​​​តែ៤​ប៉ុណ្ណោះ​​ចូលរួម ។ នៅក្នុង​​​ការ​​ប្រកួត​នេះ​ដែរ សម្រាប់​​​អ្នក​ឈ្នះ​​​លេខ​១​ ទទួល​​បាន​២​ម៉ឺន​ដុល្លារសហរដ្ឋអាមេរិក​ លេខ ២ បាន​១ម៉ឺន​​៥​ពាន់​ដុល្លារ​ និង​​លេខ៣​​ បាន​១ម៉ឺន​​ដុល្លារ ៕