រាជធានីភ្នំពេញ ៖ នៅលើសង្វៀនប៉ុស្តិ៍បាយ័នថ្ងៃអាទិត្យ ទី២៨ សីហា មានការប្រកួតប្រដាល់ដណ្តើមខ្សែក្រវាត់ក្រុមហ៊ុនជីបម៉ុង ទម្ងន់៦៣,៥គីឡូក្រាម។ សម្រាប់ពូល A វគ្គជម្រុះវិលជុំបានឈានចូលដល់សប្តាហ៍ទី៣ហើយ ភុន សោភ័ណ្ឌ មកពីក្លឹបយុវកីឡាខេត្តកណ្តាល ជួបនន់ ជំនិត មកពីក្លឹបស៊ីម៉ាក់ ខណៈស៊ីវ ឌីណា មកពីក្លឹបកងទ័ពឆត្រយោង៩១១ ជួបរ៉ាក់ វិឆ័យ មកពីក្លឹបកងពលតូចលេខ៧០ ។
ភុន សោភ័ណ្ឌ និងនន់ ជំនិត សុទ្ធតែបានឆ្លងកាត់ការប្រកួត២លើកម្នាក់រួចមកហើយ ក្នុងនោះភុន សោភ័ណ្ឌ ឈ្នះ១ ចាញ់១ និងមាន៤ពិន្ទុ ។ រីឯនន់ ជំនិត អត់ដែលចាញ់មាន៦ពិន្ទុ នាំមុខគេក្នុងពូល ។ ប៉ុន្តែជំនិត បើទោះបីជាមានពិន្ទុលើសគេក៏ដោយ ក៏គេនៅតែត្រូវការឈ្នះដែរ ព្រោះពិន្ទុនេះនៅមិនទាន់រក្សាលំនឹងបានឡើយ ។ ចំណែកសោភ័ណ្ឌ ពេលនេះគេមាន៤ពិន្ទុ ដូច្នេះគេក៏ត្រូវការឈ្នះដូចគ្នា បើគេឈ្នះទើបអាចគេចផុតពីការជម្រុះចោលបាន។ រវាងគូនេះ បើធ្វើការប្រៀបធៀបលើល្បិចប្រយុទ្ធ សោភ័ណ្ឌល្អ ស្នៀតជើង និងស្នៀតដៃ ប៉ុន្តែចិត្តរបស់គេតូចបន្តិច ហើយរាល់ការវាយចេញតែងមានការប្រយ័ត្នប្រយែង ព្រោះថា ជំនិតល្អស្នៀតកែង និងជង្គង់ បើសោភ័ណ្ឌហ៊ានតែធ្វេសប្រហែសបន្តិចច្បាស់ជាប្រហោងមិនខាន ។
ស៊ីវ ឌីណា និងរ៉ាក់ វិឆ័យ ក៏ត្រូវការឈ្នះដូចគ្នា ឌីណា ពេលនេះ មាន៤ពិន្ទុលើសវិឆ័យ ២ពិន្ទុ។ ប៉ុន្តែទោះបីជាយ៉ាងណាឌីណាក៏មិនអាចប្រហែសបានដែរ បើគេចាញ់អាចហាលខោ ព្រោះថាវិឆ័យ ប្រកួត២លើកចាញ់ទាំង២លើកមាន២ពិន្ទុ តែបើសិនជាគេឈ្នះអាចឡើងដល់៥ពិន្ទុ ។ គូនេះមានល្បិចប្រយុទ្ធនៅលើសង្វៀនប្រហាក់ប្រហែលគ្នា និងមានការកោតញញើតគ្នាទៅវិញទៅមក ដូច្នេះការចាញ់ ឬឈ្នះនៅមិនទាន់អាចដឹងមុនបានឡើយ ។ សប្តាហ៍នេះជាសប្តាហ៍សំខាន់បំផុត សម្រាប់កីឡាករទាំង៤រូប ព្រោះថា ក្នុងចំណោមពួកគេត្រូវជម្រុះចោល២រូប ហើយមិនទាន់ដឹងថា នរណាមានសំណាងអាចគេចផុតពីវគ្គជម្រុះចុងក្រោយនេះបានទេ ។ គូប្រកួតមិត្តភាព កីឡាការិនី សូយ សុធា មកពីក្លឹបអូដឹមកីឡា ជួបកីឡាការិនី MAELL ជនជាតិបារាំង និងកីឡាករ អ៊ុំ ចំរើន មកពីក្លឹបតាឡីដំរីមានឫទ្ធិ ជួបហេង វណ្ណនី មកពីក្លឹបវីអាយភី ៕
ចែករំលែកព័តមាននេះ