រាជធានីភ្នំពេញ ៖ នាថ្ងៃទី១៧ ខែសីហា ឆ្នាំ២០១១កន្លងទៅនេះ ក្រុមនិស្សិតពេទ្យជប៉ុនចំនួន១៥នាក់ បានមកធ្វើទស្សនកិច្ចសិក្សាសែ្វងយល់ពីកម្មវិធីសិក្សា ការងារសង្គមកិច្ច និងផ្នែកថែទាំសុខភាពនៅសាលារៀនវ៉េស្ទឡាញន៍សាខាច្បារអំពៅ។ នៅក្នុងឱកាសនោះផងដែរ និស្សិតទាំងនោះបានចែករំលែកនូវចំណេះដឹងផ្នែកថែទាំសុខភាព ដោយបានធ្វើបទបង្ហាញអំពីសុខភាពមាត់ធ្មេញ និងផលប៉ះពាល់នៃការជក់បារី។
ក្នុងដំណើរមកដល់របស់និស្សិតជប៉ុននាឱកាសនោះ មានការទទួលស្វាគមន៍ដោយក្តីរីករាយ និងដោយមោទនភាពពីសំណាក់គណៈនាយកសាលា បុគ្កលិក គ្រូបង្រៀន ព្រមទាំងសិស្សានុសិស្សផងដែរ។ បន្ទាប់មក និស្សិតជប៉ុនទាំងអស់បានដើរទស្សនាការរៀបចំរបស់សាលាដូចជា៖ ស្ទង់ដាបន្ទប់រៀន អាហារដ្ឋាន បន្ទប់ពិសោធន៍ បន្ទប់តន្ត្រី បណ្ណាល័យ និងបន្ទប់សុខភាព។ កញ្ញាណូហ្សូមិ តុដាតិ ដែលជាប្រធានក្រុមនិស្សិត មានក្តីរភើបរីករាយចំពោះការស្វាគមន៍ និងបានកោតសរសើរយ៉ាងខ្លាំងចំពោះការរៀបចំដែលមានលក្ខណៈបទដ្ឋានស្តង់ដារបស់សាលា។
លោកប៉ិច បូឡែន អគ្គនាយកសាលារៀនវ៉េស្ទឡាញន៍ និងសាលារៀនណត្សឡាញន៍ បានមានប្រសាសន៍ទៅកាន់ក្រុមនិស្សិតជប៉ុនថា សាលារៀនវ៉េស្ទឡាញន៍ និងសាលារៀនណត្សឡាញន៍ត្រូវបានបង្កើតឡើងក្នុងឆ្នាំ២០០៨ ដោយក្រុមបញ្ញវន្តខ្មែរក្នុងស្រុក និងនៅប្រទេសបារាំង ក្នុងគោលបំណងរួមចំណែកជាមួយរដ្ឋាភិបាល នៅក្នុងការអភិវឌ្ឍវិស័យអប់រំដែលជាកត្តាដ៏សំខាន់ចំពោះការបណ្តុះបណ្តាលធនធានមនុស្សនៅក្នុងប្រទេសយើង។
លោកអគ្គនាយកបានបង្ហាញអំពីសកម្មភាពការងារសង្គមកិច្ចរបស់សាលាដូចជា ការធ្វើអណ្តូងទឹក សម្អាតទីក្រុង ទិវាក្តីស្រឡាញ់ចំពោះអ្នកមានគុណ កម្មវិធីអប់រំតាមវិទ្យុ ការនិពន្ធបទចម្រៀងអប់រំ ការប្រគំតន្ត្រីអប់រំ ការប្រគល់សម្ភារសិក្សា សម្លៀកបំពាក់ និងថវិកាជូនដល់ប្រជាជនក្រីក្រនិងអង្គការកុមារកំព្រា ព្រមទាំងផ្តល់អាហារូបករណ៍ដល់សិស្សអង្គការដែលមកសិក្សានៅសាលារៀន ។ លោកអគ្គនាយកបានបញ្ជាក់ថា សាលារៀនគ្រប់សាខាបានបង្កើតក្រុមយុវជនស្ម័គ្រចិត្តចូលរួមការងារសហគមន៍ (YCI)ក្នុងទិសដៅអនុវត្តគម្រោងមានដូចជា សុវត្ថិភាពចរាចរណ៍ផ្លូវគោក ការងារអប់រំសុខ ភាព ការងារបរិស្ថាន ការងារអភិវឌ្ឍតម្លៃនៃ ការរស់នៅតាមសហគហគមន៍ ព្រមទាំងបណ្តុះ គំនិតស្មារតីរបស់ប្អូនៗសិស្សានុសិស្សឱ្យមានទឹកចិត្តអាណិតអាសូរ និងបានស្វែងយល់ពីជីវភាពប្រជាជនរស់នៅតាមសហគមន៍ និងតំបន់ជនបទ ។
ទន្ទឹមនឹងនោះដែរ និស្សិតពេទ្យជប៉ុនបានធ្វើការចែករំលែកបទពិសោធន៍ និងចំណេះដឹងផ្ទាល់ខ្លួនតាមរយៈការធ្វើបទបង្ហាញ ដែលទាក់ ទងនឹងការថែរក្សាសុខភាពមាត់ធ្មេញ ការយល់ដឹងពីប្រភេទចំណីអាហារដែលអាចធ្វើឱ្យប៉ះពាល់សុខភាពមាត់ធ្មេញ និងការប៉ះពាល់អវិជ្ជមានដែលបណ្តាមកពីការជក់បារីដល់ប្អូនៗសិស្សានុសិស្ស។
តាមរយៈទស្សនកិច្ចសិក្សានេះ និស្សិតជប៉ុនបានស្វែងយល់កាន់តែច្បាស់អំពីគុណភាពរបស់សាលា ជាពិសេសគឺការងារសង្គមកិច្ចរបស់សាលាដែលជាគំរូដ៏ល្អសម្រាប់ស្ថាប័នឯកជនដទៃទៀតនៅក្នុងការចូលរួមលើកកម្ពស់ការងារសង្គមកិច្ច ដូចដែលសាលារៀនវ៉េស្ទឡាញន៍ និងសាលារៀនណត្សឡាញន៍បាននិងកំពុងតែដឹកនាំធ្វើនាពេលបច្ចុប្បន្ន ដែលមានបណ្ណាល័យចល័តជាដើម។
ជាទីបញ្ចប់ សាលារៀនវ៉េស្ទឡាញន៍ និងសាលារៀនណត្សឡាញន៍ជាមួយក្រុមនិស្សិតជប៉ុន បានធ្វើការប្តេជ្ញាចិត្តនៅក្នុងការរួមសហការយ៉ាងល្អជាមួយគ្នាតាមរយៈរូបភាពផ្សេៗ ដែលមានការងារសង្គមកិច្ចជាអាទិភាព ៕
ចែករំលែកព័តមាននេះ