រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាហ្គោលរីជេន ក្នុងប្រភេទទម្ងន់៦៣គីឡូក្រាម នៅលើសង្វៀនស្ថានីយទូរទស្សន៍ប៉ុស្តិ៍លេខ៣ នាថ្ងៃសៅរ៍ ទី២០ សីហា ខាងមុខនេះ គឺឈានចូលដល់សប្តាហ៍ទី២ហើយ ហើយសម្រាប់ការប្រកួតលើកនេះមានរហូតដល់ទៅ៣គូ។ តាមការរៀបចំរបស់គណៈកម្មការរៀបចំការប្រកួតគឺក្នុង១សប្តាហ៍គូប្រកួតខ្សែក្រវាត់តម្រូវឱ្យមានតែ២គូប៉ុណ្ណោះ ប៉ុន្តែសប្តាហ៍មុនអវត្តមានកីឡាករ Shey mon ជនជាតិប្រេស៊ីល ដែលត្រូវជួបជាមួយហេង សំរាំង មកពីក្លឹបព្រៃទទឹង។
Shey mon តាមពិតគេធ្លាប់មកកម្ពុជាច្រើនលើកមកហើយ ប៉ុន្តែមិនសូវមានសំណាងប៉ុន្មានឡើយ ចំណែកឯការមកប៉ះហេង សំរាំង លើកនេះក៏មិនដឹងថា ជាយ៉ាងណាដែរ ព្រោះស្នៀតប្រយុទ្ធរបស់គេមិនសូវខ្លាំងប៉ុន្មានឡើយ ទាំងស្នៀតជើង និងស្នៀតកណ្តាប់ដៃ។ ចំណែកហេង សំរាំងវិញ មិនមានអ្វីដែលអស្ចារ្យដូចគ្នា ព្រោះសំរាំង អន់ស្បែកមុខបន្តិច ឯចិត្តក៏តូចថែមទៀត គូនេះអាចស៊ីសងគ្នាបានតែត្រង់ថា អ្នកណាចាញ់ ឬឈ្នះនោះ មិនហ៊ានទស្សន៍ទាយទុកមុនឡើយ។
ឡុង សុភី មកពីក្លឹបសាលវ័ន្តកីឡា ជួប Abass មកពីប្រទេសអ៊ីរ៉ង់ ។ សុភី ស្នៀតកែង និងជង្គង់របស់គេសាហាវគួរសម បើទោះជាការវាយចេញមានសភាពយឺតយ៉ាវបន្តិចមែន ហើយសម្រាប់ការមកប៉ះ Abbass លើកនេះ ក៏មិនមានអ្វីដែលគួរឱ្យបារម្ភប៉ុន្មានដែរ ព្រោះថា អ្នកប្រដាល់សញ្ជាតិអ៊ីរ៉ង់ម្នាក់នេះអត់មានអ្វីដែលពូកែឡើយ។ ម្យ៉ាងវិញទៀត Abass ធ្លាប់មកកម្ពុជាច្រើនលើកច្រើនសាមែន តែភាគតិចណាស់ដែលគេមានសំណាងបានឈ្នះត្រឡប់ទៅវិញនោះ ហើយលើកនេះមិនដឹងជាសុភី ត្រូវហាលខោ ឬក៏ Abass នោះទេ។
ពេជ្រ សីហា ជើងខ្លាំងខាងប្រើកែង និងជង្គង់ មកពីក្លឹបកីឡាប្រដាល់ក្រសួងការពារជាតិ ជួប ANVA មកពីអ៊ូសបេគីស្ថាន។ សីហា ជាកំពូលអ្នកប្រយុទ្ធដែលមានចិត្តសឿងបំផុត ហើយថែមទាំងមានក្បាច់ប្រយុទ្ធយ៉ាងសំបូរបែបទៀតផង ឯចរិតរបស់គេក៏មិនសូវចេះច្រឡោតផ្តាសដែរ ។ ចំណែក ANVA គេក៏មិនស្គាល់ប្រវត្តិច្បាស់ដែរ មិនដឹងថា កីឡាករបរទេសរូបនេះមានល្បិចប្រយុទ្ធនៅលើសង្វៀនយ៉ាងណានោះទេ ដូច្នេះមានតែការមកសាកកម្លាំងគ្នានៅលើសង្វៀននាថ្ងៃសៅរ៍នោះទេ ទើបអាចដឹងបាន ។
រីឯគូប្រកួតប្រដាល់សាកលអាជីពដណ្តើមខ្សែក្រវាត់ក្នុងប្រភេទទម្ងន់៦៣គីឡូក្រាមនៅសប្តាហ៍នេះដែរ ផល សុផាត មកពីក្លឹបកងរាជអាវុធហត្ថរាជធានីភ្នំពេញ ជួបភុំ សារ៉ាយ មកពីក្លឹបអាជ្ញាធរជាតិអាវុធគីមី ។ ចំណែកគូប្រកួតមិត្តភាព មៀច សុខរ៉ា មកពីក្លឹបតាព្រហ្មមានជ័យ ជួបសិង្ហ សាវ៉ន មកពីក្លឹបសិង្ហកីឡា ៕
ចែករំលែកព័តមាននេះ