រាជធានីភ្នំពេញ៖ នៅថ្ងៃទី១៥ សីហា ក្រុមហ៊ុនមហាហង្សបានបើកកាមេរ៉ា និងធ្វើពិធីក្រុងពាលី ដើម្បីថតខ្សែភាពយន្តភាគចំនួនពីររឿង ក្នុងអំឡុងពេលតែមួយ ដែលរឿងទី១ មានចំណងជើងថា «ម្ចាស់គំនុំម្ចាស់ស្នេហ៍» និង«រឿងទី២ពេជ្រក្នុងបេះដូង» ដែលរឿងទាំងពីរនេះ នឹងចាក់បញ្ចាំងនៅទូរទស្សន៍ប៉ុស្តិ៍លេខ៣ និងលេខ៥
រាជធានីភ្នំពេញ៖ នៅថ្ងៃទី១៥ សីហា ក្រុមហ៊ុនមហាហង្សបានបើកកាមេរ៉ា និងធ្វើពិធីក្រុងពាលី ដើម្បីថតខ្សែភាពយន្តភាគចំនួនពីររឿង ក្នុងអំឡុងពេលតែមួយ ដែលរឿងទី១ មានចំណងជើងថា «ម្ចាស់គំនុំម្ចាស់ស្នេហ៍» និង«រឿងទី២ពេជ្រក្នុងបេះដូង» ដែលរឿងទាំងពីរនេះ នឹងចាក់បញ្ចាំងនៅទូរទស្សន៍ប៉ុស្តិ៍លេខ៣ និងលេខ៥ ដូច្នេះទស្សនិកជនទាំងអស់កំពុងរង់ចាំទស្សនា។
ដោយមានការអភិវឌ្ឍខ្លួន និងមានការរីកចម្រើនឥតឈប់ឈរ ពិសេសគឺមានការគាំទ្រពីមហាជនជាច្រើនផងនោះ ក្រុមហ៊ុនមហាហង្សបានថតរឿងពេជ្រក្នុងបេះដូង ដោយយកសំឡេងដោយផ្ទាល់។ នៅក្នុងរឿងទាំងពីរនេះដែរ គឺមានការចូលរួមសម្តែងពីតារាល្បីៗជាច្រើន នៅក្នុងព្រះរាជាណាចក្រកម្ពុជារួមមានលោកជា សំណាង អ្នកស្រីចាន់ តារាទី លោកហម ឈរ៉ាអ្នកស្រីប៉ែន សុផានី លោកហម សុធានិត អ្នកនាងឈិត សុជាតា តួឯកស្រីកញ្ញាភិន សុដាលីស លោកឡុង វិរៈយុទ្ធ នៅក្នុងរឿងពេជ្រក្នុងបេះដូង តួឯកស្រីកញ្ញាចាន់ ស្រីរ័ត្ន លោកអ៊ុន សុធា នៅក្នុងរឿងម្ចាស់គំនុំម្ចាស់ស្នេហ៍ ព្រមទាំងតារាក្មេងចាស់ល្បីៗជាច្រើនរូបទៀតសុទ្ធសឹងតែជាតារាស្រីប្រុសដែលមានទេពកោសល្យក្នុងការសម្តែង។
នៅថ្ងៃក្រុងពាលីនេះដែរ តារាសម្តែងទាំងអស់បានអញ្ជើញចូលរួមយ៉ាងច្រើនកុះករ និងបង្ហាញពីភាពសប្បាយរីករាយ ព្រមទាំងបញ្ចេញមតិយោបល់ជាច្រើនទាក់ទងទៅនឹងការប្តេជ្ញាចិត្តរបស់ពួកគេទៅលើការថតខ្សែភាពយន្តទាំងពីររឿងនេះ។ ពួកគេបញ្ចេញយោបល់ថា មិនថាតែរឿងបញ្ចូលសំឡេង ឬក៏យកសំឡេងដោយផ្ទាល់ទេ តារាសម្តែងទាំងអស់ នឹងបញ្ចេញសមត្ថភាពផ្ទាល់ខ្លួនរបស់ពួកគេម្នាក់ៗ ធ្វើយ៉ាងណាសម្តែងឱ្យល្អ និងមានភាពរស់វើក និងមើលទៅមានលក្ខណៈបែបធម្មជាតិពិតៗតែម្តង ទាំងកាយវិការ និងការនិយាយស្តីនៅក្នុងសាច់រឿង។
តារាសម្តែងទាំងនោះបន្តទៀតថា ខ្សែភាពយន្តទាំងពីរនេះមើលទៅពិតជាជក់ចិត្តដិតអារម្មណ៍ណាស់ នៅពេលដែលចាក់បញ្ចាំងតាមកញ្ចក់ទូរទស្សន៍។ តើហេតុអ្វីបានជាតារាសម្តែងទាំងនោះហ៊ានអះអាងបែបនេះ? ពួកគេនិយាយថាគឺដោយសារពួកគេបានអានសាច់រឿងទាំងអស់ឃើញថា ពិតជាល្អ និងមានចំណុចចាប់អារម្មណ៍ជាច្រើនទាក់ទងនៅនឹងសាច់រឿង៕
ចែករំលែកព័តមាននេះ