រាជធានីភ្នំពេញ ៖ នៅទូរទស្សន៍ជាតិកម្ពុជាកាលពីថ្ងៃទី១៤ សីហា មានរៀបចំការប្រគំតន្ត្រីសប្បុរសធម៌តាមរយៈការសម្តែងរួមគ្នា រវាងសិស្សសាលាតូរ្យតន្ត្រីស៊ីមហ្វូនី និស្សិតតូរ្យតន្ត្រីមកពីសាកលវិទ្យាល័យភូមិន្ទវិចិត្រសិល្បៈ និងក្រុមតន្ត្រីករ VIVACE YOUTH SYMPHONY ORECHESTRA មកពីហុងកុង។
រាជធានីភ្នំពេញ ៖ នៅទូរទស្សន៍ជាតិកម្ពុជាកាលពីថ្ងៃទី១៤ សីហា មានរៀបចំការប្រគំតន្ត្រីសប្បុរសធម៌តាមរយៈការសម្តែងរួមគ្នារវាងសិស្សសាលាតូរ្យតន្ត្រីស៊ីមហ្វូនី និស្សិតតូរ្យតន្ត្រីមកពីសាកលវិទ្យាល័យភូមិន្ទវិចិត្រសិល្បៈ និងក្រុមតន្ត្រីករ VIVACE YOUTH SYMPHONY ORECHESTRA មកពីហុងកុង។
លោកហ៊ុន ឡាក់ អគ្គនាយកសាលាតូរ្យតន្ត្រីសីុមហ្វូនីបានថ្លែងថា គោលបំណងក្នុងការរៀបចំកម្មវិធីប្រគំតន្ត្រីនេះ គឺដើម្បីស្វះស្វែងរកថវិកាជួយដល់វិទ្យាស្ថានL-CDIដែលនៅមានបញ្ហាខ្វះខាត។ កន្លងមកវិទ្យាស្ថាននេះបានផ្តល់ការបណ្តុះបណ្តាលភាសាខ្មែរ ភាសាអង់គ្លេស និងវិជ្ជាជីវៈជំនាញផ្សេងៗដល់សិស្សដែលបោះបង់ចោលការសិក្សា។ ដូចនេះថវិកាដែលបានមកពីការប្រគំតន្ត្រីនឹងត្រូវប្រគល់ជូនទៅដល់វិទ្យាស្ថាននេះដើម្បីចាត់ចែង។ ដោយឡែកការប្រគំតន្ត្រីនេះមានសិស្សសាលាតូរ្យតន្ត្រីស៊ីមហ្វូនី និស្សិតសាកលវិទ្យាល័យភូមិន្ទវិចិត្រសិល្បៈ និងតន្ត្រីករ VIVACE Youth Symphony Orehestra រួមនឹងម្ចាស់ជ័យលាភីការប្រគំតន្ត្រីពិភពលោក Rhythmie Wong និង Melodie Wong (ផ្នែកព្យ៉ាណូ) សែឡូ និងវីយូឡា) ព្រមទាំងតន្ត្រីករនៃក្រុម Hong Kong Wind Philharmonic ដែលសំដែង និងច្រៀងរួមគ្នានូវបទចំរៀងដែលមានចំណងជើងថា ម៉ូនីកា និងបទភ្នំពេញដែលជាព្រះរាជនិពន្ធរបស់សម្តេចតា សម្តេចតាទួត ព្រះមហាវីរក្សត្រ ព្រះវររាជបិតាជាតិខ្មែរ។ នេះជាឱកាសមួយដើម្បីបង្ហាញពីភាពប៉ិនប្រសប់ និងទេពកោសល្យដ៏អស្ចារ្យនៃវិស័យសិល្បៈតូរ្យតន្ត្រី ក្រុមហុងកុងដើម្បីចែករំលែកដល់ប្រជាជនកម្ពុជា។
លោកហ៊ុន ឡាក់ ថ្លែងអំណរគុណដល់សិស្សសាលាតូរ្យតន្ត្រីស៊ីមហ្វូនី និស្សិតសាកលវិទ្យាល័យភូមិន្ទវិចិត្រសិល្បៈ និងក្រុមតន្ត្រីករហុងកុងទាំងអស់ដែលបានខិតខំប្រឹងប្រែងហ្វឹកហាត់សំដែងរួមគ្នាក្នុងរយៈពេលដ៏ខ្លី និងសូមអរគុណដល់លោកលូ ម៉េង អគ្គនាយក Almond Group ដែលបានជួយឧបត្ថម្ភក្នុងកម្មវិធីនេះ ជាពិសេសថ្លែងអំណរគុណដល់លោកកឹម គុណវឌ្ឍន៍ ប្រតិភូរាជរដ្ឋាភិបាល និងជាអគ្គនាយកទូរទស្សន៍ជាតិកម្ពុជា ដែលបានគាំទ្រ និងជួយជ្រោមជ្រែងឱ្យកម្មវិធីនេះដំណើរការបានប្រកបដោយជោគជ័យ ៕
ចែករំលែកព័តមាននេះ