រាជធានីភ្នំពេញ ៖ ថ្វីបើកើតក្នុងត្រកូលកងទ័ពមិនមានឈាមជ័រជាអ្នកសិល្បៈចំរៀងក៏ដោយ ក៏ចាប់តាំងពីអាយុ៧ឆ្នាំ មកកុមារាពេជ្រ រតនា មានចិត្តស្រឡាញ់សិល្បៈចំរៀង ហើយចូលចិត្តស្តាប់បទចម្រៀងរៀងរាល់ថ្ងៃ ។ ពេលគេអាយុ១១ឆ្នាំក៏ចេះច្រៀងជាច្រើនបទ ហើយថែមទាំងមានទឹកដមសម្លេងពីរោះគួរឱ្យចង់ស្តាប់ទៀតផង។ កន្លងមកកុមារានេះតែងតែចេញច្រៀងនៅតាមពិធីមង្គលការក្នុងស្រុកត្រពាំងប្រាសាទជាមួយក្រុមតន្ត្រីសម័យប្រចាំស្រុក។
កុមារាពេជ្រ រតនា អាយុ១១ឆ្នាំ មានឪពុកឈ្មោះហែម ពេជ្រ ជាយុទ្ធជននៅវរសេនាតូចលេខ២៦២ ឈរជើងនៅព្រំដែនជួរភ្នំដងរែកត្រង់ចំណុចក្បាលទន្សោង ស្រុកអន្លង់វែង។ រតនានិយាយថា កន្លងមកគេច្រៀងតាមរោងការនៅតាមស្រុកភូមិ ហើយបានថវិកាបន្តិចបន្តួចចំណាយទៅលើការសិក្សាខ្លះ និងមួយចំណែកទៀតសន្សំទិញត្រីងៀត ត្រីខកំប៉ុង និងគ្រឿងឧបភោគ បរិភោគផ្ញើជូនទៅឪពុក និងកងទ័ពជាមិត្តរួមអាវុធរបស់ឪពុកគេដែលនៅការពារព្រំដែន។
ដោយសារតែឃើញកុមារាពេជ្រ រតនា មានចិត្តស្រឡាញ់សិល្បៈមិនអាចកាត់ផ្តាច់បាន ហើយមានសមត្ថភាពច្រៀងពីរោះ ស្ថានីយទូរទស្សន៍អប្សរាតែងតែផ្តល់ឱកាសឱ្យឡើងច្រៀងជាកិត្តិយសជាញឹកញាប់នៅក្នុងកម្មវិធីប្រគំតន្ត្រីចុងសប្តាហ៍ ដូចជាកម្មវិធីតារាមាស ជាក់ស្តែងកាលពីថ្ងៃទី៦ ខែសីហា ឆ្នាំ២០១១ កន្លងទៅគេច្រៀងយ៉ាងពីរោះតាមរយៈបទ«មនុស្សចិត្តព្រះ» និងបទ«ស្រឡាញ់គ្នាម្តងទៀតបានទេ»។
កុមារាពេជ្រ រតនា និយាយថា គេមានមហិច្ឆតាចង់ថតសំលេងចូលសីុឌីឱ្យផលិតកម្ម ហើយបើគេច្រៀងរកលុយបានគេនឹងឧបត្ថម្ភដល់កងទ័ពជួរមុខ ។
កុមារាពេជ្រ រតនា អាយុ១១ឆ្នាំ រៀនថ្នាក់ទី៤នៅសាលាបឋមសិក្សាឈូកស ត្រពាំងប្រាសាទ ឪពុកឈ្មោះហែម ពេជ្រ ម្តាយឈ្មោះវង្ស ណារី។ រតនា មានបងប្អូន៥នាក់ ក្នុងនោះស្រី៤នាក់ ឯរូបគេជាកូនពៅ។ កុមារានេះប្តេជ្ញាថា នឹងតស៊ូរៀនផង ច្រៀងផងដើម្បីក្លាយខ្លួនជាអ្នកចម្រៀងមានកេរ្តិ៍ឈ្មោះល្បីនាពេលខាងមុខ ៕
ចែករំលែកព័តមាននេះ