សហរដ្ឋអាមេរិក ៖ កញ្ញា Kylie Jenner បានបង្ហាញខ្លួនជាលើកដំបូងនៅលើកម្រាលព្រំបង្ហាញម៉ូដនៃកម្មវិធី Victoria’s Secret Fashion Show ឆ្នាំ ២០២៦ កាលពីថ្ងៃទី១៨ ខែតុលា នៅក្នុងទីក្រុងឡូសអាន់ជឺលេស រដ្ឋកាលីហ្វ័រញ៉ា ដោយបានគ្រងអាវក្នុង «The Angel Fantasy Bra» ដ៏ពិសេស តម្លៃរហូតដល់ ៥០ លានដុល្លារអាមេរិក ដែលជាតម្លៃកំណត់ត្រាថ្លៃបំផុតលើពិភពលោក។
សេដ្ឋិនីជំនួញគ្រឿងសម្អាងដ៏ល្បីវ័យ២៩ឆ្នាំរូបនេះ បានធ្វើឱ្យទស្សនិកជនភ្ញាក់ផ្អើលនៅក្នុងកម្មវិធីប្រចាំឆ្នាំរបស់ក្រុមហ៊ុន Victoria’s Secret ខណៈដែលនាងពាក់អាវក្នុងដ៏ល្បីល្បាញ ធ្វើឡើងពីមាស ១៨ ការ៉ាត់ និងពេជ្រ ៤ ៤១០គ្រាប់។ អាវក្នុងនេះ គឺជាចំណុចក៏លេចធ្លោនៃកម្មវិធីដែលមានតារាបង្ហាញម៉ូដ និងបុគ្គលល្បីក្នុងវិស័យសិល្បៈផ្សេងៗទៀតជាច្រើននាក់បានមកចូលរួមផ្ទាល់មួយនេះ នៅក្នុងរយៈពេលជាច្រើនឆ្នាំមកហើយ ហើយការគ្រងវាទៀតសោត ត្រូវបានចាត់ទុកថាជាកិត្តិយស និងពេលវេលាដ៏អស្ចារ្យសម្រាប់តារាបង្ហាញម៉ូដដែលត្រូវបានជ្រើសរើស។
«The Angel Fantasy Bra» ត្រូវបានរចនាឡើងដោយសហការជាមួយហាងត្បូងពេជ្រប្រណិត Jacob & Co. ដោយមានពេជ្រធម្មជាតិ ៤ ៤១០ គ្រាប់ និងត្បូងពណ៌លឿងទុំភ្លឺចែងចាំងទំហំ ៧៥,៥៤ ការ៉ាត់ នៅចំណុចកណ្តាលដ៏ទាក់ទាញបំផុត។ ការផលិតត្រូវការជាងទងជំនាញ ១៥ នាក់ និងចាយពេលច្រើនជាង១ពាន់ម៉ោង ដោយរចនាសម្ព័ន្ធទាំងមូលធ្វើពីពេជ្រ មាសសុទ្ធ ដោយគ្មានប្រើសាច់ក្រណាត់ទាល់តែសោះ។
គួរបញ្ជាក់ថា កម្មវិធីបង្ហាញម៉ូដរបស់ក្រមហ៊ុន Victoria’s Secret បានធ្វើដំណើរទៅកាន់ទីក្រុងនានា រួមមាន ទីក្រុងឡុងដ៍ (London) បារីស (Paris) សៀងហៃ (Shanghai) និងកាន (Cannes) តាំងពីការចាប់ផ្តើមដំបូងក្នុងឆ្នាំ ១៩៩៥។ ទោះយ៉ាងណាក៏ដោយ កម្មវិធីបង្ហាញម៉ូដដ៏ល្បីល្បាញ និងមានទស្សនិកជនទស្សនានៅជុំវិញពិភពលោកយ៉ាងច្រើនមួយនេះ បានត្រឡប់មកកាន់ទីក្រុងឡូសអាន់ជឺលេសវិញ ដែលនេះជាព្រឹត្តិការណ៍ដ៏កម្រមួយ ព្រោះជាធម្មតាកម្មវិធីនេះ តែងតែធ្វើឡើងនៅទីក្រុងញូវយ៉ក (New York)៕ ប្រភព ៖ Reuters, BBC និង Vogue
ចែករំលែកព័តមាននេះ