សាឡាត់ ស្រីឡាង ត្អូញត្អែរពីជីវិតសិល្បៈ
- ភ្នំពេញ
រាជធានីភ្នំពេញ៖ សាឡាត់ ស្រីឡាង ជាតារាមានឈ្មោះបោះសំឡេងម្នាក់ដែរនាពេលកន្លងមក ប៉ុន្តែនាងស្ងប់ស្ងាត់ពីអាជីពសិល្បៈ បន្ទាប់ពីមានរឿងអាស្រូវជាប់បំណុលគេ ។
កាលពីពេល ថ្មីៗកន្លងមក តារាស្រីរូបនេះបង្ហាញបំណងចង់វិលមកអាជីពសិល្បៈវិញ ។
សាឡាត់ ស្រីឡាង ថា«សោកស្តាយចំពោះទេពកោសល្យសិល្បៈរបស់នាងខ្ញុំណាស់ ប៉ុន្តែនាងខ្ញុំស្ទើរតែគ្មានឱកាសនៅក្នុងការសម្តែង បើទោះបីជានាងខ្ញុំមិនទាន់បោះបង់អាជីពមួយនេះក៏ដោយ» ។
សាឡាត់ ស្រីឡាង បានបង្ហោះវីដេអូខ្លីមួយដែលនាងសម្ដែងជាមួយតារាចម្រៀងលោក នេនទុំ ហើយទទួលបានការចាប់អារម្មណ៍ និងលើកទឹកចិត្តពីអ្នកទស្សនាជាច្រើន ។
ចំណុចនេះហើយសាឡាត់ ស្រីឡាង បានស្នើសុំដោយត្រង់ទៅលោកនេនទុំ ដើម្បីមានឱកាសបានថតMV ជាមួយតារាចម្រៀងរូបនេះម្តងទៀត ។ នាងសរសើរលោកនេនទុំ គឺជាអ្នកសិល្បៈម្នាក់ដែលពូកែ សូម្បីកញ្ញាអ្នកលក់ពងក្រួចកូន ក៏អាចយកមកថតMV ចេញជាសាច់រឿងមួយល្អដែរ ។
ឃើញការលើកឡើងពី សាឡាត់ ស្រីឡាង បែបនេះ លោកនេនទុំ បានលើកឡើងថា កន្លងមកលោកធ្លាប់ឃើញការសម្តែងរបស់សាឡាត់ ស្រីឡាង ហើយលោកពេញចិត្តការសម្តែងរបស់នាង ។
ស្រីឡាង បានបាត់មុខពីសិល្បៈ បន្ទាប់ពិផ្ទុះរឿងរ៉ាវមិនល្អ តែពេលនេះនាងមានបំណងចង់វិលរកការសម្តែងជាថ្មីឡើងវិញ ប៉ុន្តែមិនមានអ្នកផ្តល់ឱកាស ហេតុនេះលោកក៏ផ្តល់ឱ្យនាង ព្រោះនាងក៏នៅស្តាយទេពកោសល្យសិល្បៈរបស់ខ្លួនផងដែរ ។
សាឡាត់ ស្រីឡាង មានក្តីរំភើបរហូតស្រក់ទឹកភ្នែក និងចាត់ទុកថា ការផ្ដល់ឱកាសពីនេនទុំនេះជាជំហានថ្មីដំបូងក្នុងដំណើរវិលមកអាជីពសិល្បៈម្តងទៀត ។
សាឡាត់ ស្រីឡាង រំពឹងថា ទស្សនិកជនដែលធ្លាប់មើលការសម្តែងរបស់នាងនាពេលកន្លងមកនឹងនៅតែបន្តគាំទ្ររូបនាងជាថ្មីទៀត៕
ចែករំលែកព័តមាននេះ