រាជធានីភ្នំពេញ ៖ ស្ត្រីដៃឆើតម្នាក់ ក្នុងរយៈពេល១ម៉ោងប៉ុណ្ណោះ បានធ្វើសកម្មភាពលួចប្រាក់ និងទូរសព្ទបុរសអ្នករើសអេតចាយ១លើក និងច្របាច់កក្មេងប្រុសម្នាក់ ដណ្ដើមទូរសព្ទ១លើក ហើយត្រូវបានម្ដាយក្មេងប្រុសនោះ ឃាត់ខ្លួនបាន រួចក៏ប្រគល់ឲ្យនគរបាលយកទៅធ្វើការសួរនាំតែម្ដង ។
ហេតុការណ៍នោះ បានកើតឡើងកាលពីចន្លោះម៉ោង១និងម៉ោង២រសៀលថ្ងៃទី២៩ ខែកញ្ញា ឆ្នាំ២០២៦ នៅក្នុងភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ស្ត្រីជាជនសង្ស័យរូបនោះ មិនត្រូវបានស្គាល់អត្តសញ្ញាណនោះទេ ក្រោយឃាត់ខ្លួនបាន នគរបាលបាននាំទៅធ្វើការសាកសួរភ្លាមៗ ។ រីឯអ្នករងគ្រោះ ដោយអំពើចោរកម្មខាងលើនោះទី១ឈ្មោះ ចាន់ ធឿន ភេទប្រុស អាយុ៤៥ឆ្នាំ មុខរបររើសអេតចាយ ស្នាក់នៅក្នុងបុរីឈូកវ៉ា២ ភូមិតិក្ខបញ្ញោ សង្កាត់សំរោងក្រោម ។ ទី២ឈ្មោះ គន្ធា ភេទស្រី អាយុ៤៣ឆ្នាំ មុខរបរទិញ-លក់អេតចាយ នៅក្នុងភូមិតិក្ខបញ្ញោ សង្កាត់សំរោងក្រោម ។
បើតាមបុរសឈ្មោះ ចាន់ ធឿន បាននិយាយថា នៅវេលាម៉ោង១រសៀលថ្ងៃកើតហេតុ ខណៈដែលគាត់កំពុងរៀវចំអេតចាយនៅម្ដុំខាងក្រោយវត្តតិក្ខបញ្ញោ ស្រាប់តែឃើញស្ត្រី ដែលជាជនសង្ស័យខាងលើ ដើរទៅសុំបារីគាត់ជក់។ លុះពេលគាត់ឲ្យបារី និងអុជឲ្យរួចរាល់ នាងក៏ចេញទៅបាត់ទៅ ហើយបន្តិចក្រោយមកគាត់ក្រឡេកមើលទៅកាបូបដែលមានលុយ ៨ម៉ឺនរៀល និងទូរសព្ទម៉ាកIPhone-6 ១គ្រឿង ទុកនៅលើរទេះអេតចាយ ក៏ស្រាប់តែបាត់មិនឃើញ ។
បុរសនោះ បាននិយាយបន្តថា ក្រោយមកគាត់បានតាមរកស្ត្រីសង្ស័យខាងលើរហូតដល់ឃើញ ហើយបានឆែកឆេររកឃើញតែទូរសព្ទ១គ្រឿងវិញប៉ុណ្ណោះ ចំណែកប្រាក់ចំនួន៨ម៉ឺនរៀល មិនឃើញឡើយ។ ពេលនោះ ដោយសារតែខ្ជិលមានរឿងវែងឆ្ងាយផង ម្យ៉ាងទៀតមើលទៅនាងម្នាក់នោះ គួរឲ្យអាណិតផង គាត់ក៏មិនបានប្ដឹងផ្ដល់នោះទេ រួចក៏បានដោះលែងនាងវិញទៅ ។
ដោយឡែកស្ត្រីឈ្មោះ គន្ធា បាននិយាយថា នៅមុនពេលកើតហេតុវេលាម៉ោង២រសៀល ខណៈគាត់កំពុងលាងចាន នៅខាងក្រោយ គាត់បាន ឮសូរសំឡេងកូនប្រុសគាត់ អាយុទើបតែ៤ឆ្នាំ ស្រែកៗ ពេលនោះ ដោយមានការសង្ស័យ គាត់ក៏រត់ទៅមើល។ ស្រាប់តែឃើញជនសង្ស័យខាងលើ កំពុងច្របាច់កកូនប្រុសគាត់ ដណ្ដើមយកទូរសព្ទដៃម៉ាកសាំស៊ុង ១គ្រឿង តម្លៃជាង៥០០ដុល្លារ ទើបគាត់ឃាត់ខ្លួនជនសង្ស័យរូបនោះ ។
គាត់បាននិយាយបន្តទៀតថា ជនសង្ស័យក៏បានរើកកាយយកប្រាក់មួយចំនួន និងកូនសោម៉ូតូរស់គាត់ថែមទៀតផង ប្រសិនបើគាត់ចេញមកមិនទាន់ទេនោះ កូនប្រុសគាត់ អាចនឹងមានគ្រោះថ្នាក់មិនខានឡើយ។ មិនតែប៉ុណ្ណោះជនសង្ស័យ ក៏អាចនិងយកម៉ូតូរបស់គាត់ជិះទៅបាត់ទៀតផង ហើយក្រោយក្រោយពេលឃាត់ខ្លួនជននោះបាន គាត់ក៏ប្រគល់ឲ្យនគរបាលប៉ុស្តិ៍សំរោងក្រោម នាំទៅសាកសួរតែម្ដង ៕
ចែករំលែកព័តមាននេះ