ទីក្រុងហាណូយ៖ ថ្មីៗនេះ នគរបាលវៀតណាមចាប់ខ្លួនមនុស្សបីនាក់ ក្នុងនោះម្នាក់ដើមកំណើតវៀតណាមចូលសញ្ជាតិន័រវេ, ម្នាក់ដើមកំណើតវៀតណាមចូលសញ្ជាតិអូស្ត្រាលី និងម្នាក់ទៀតមិនបញ្ជាក់សញ្ជាតិ ប៉ុន្តែបើតាមភិនភាគឈ្មោះគឺឈ្មោះវៀតណាម។ ពួកគេត្រូវជាប់សង្ស័យពីបទប្រព្រឹត្តអំពើភេរវកម្ម។ អ្នកទាំងបីត្រូវក្រសួងសន្តិសុខសាធារណៈវៀតណាមប្រកាសកាលពីល្ងាចម្សិលមិញថាមានឈ្មោះង្វៀនឌឹកធួន (Nguyen Duc Thuan), ហូហ្វាមហ៊ាបហ៊ុយ (Ho Pham Hiep Huy) និងថៃកុងជឿងសឺន (Thai Cong Truong Son)។ ក្រសួងប្រកាសបន្តទៀតថាអ្នកទាំងនេះត្រូវបានចាប់ខ្លួនកាលពីថ្ងៃទី១៨ ខែកញ្ញានៅពេលពួកគេព្យាយាមឆ្លងដែនខុសច្បាប់ចូលវៀតណាម។
ពួកគេបានឆ្លើយសារភាពថាជាសមាជិកក្រុមវៀតតាន់ (Viet Tan) ដែលជាចលនាតស៊ូនយោបាយគាំទ្រប្រជាធិបតេយ្យមានមូលដ្ឋាននៅអាមេរិក។ រដ្ឋាភិបាលវៀតណាមចាត់ទុកថាចលនានេះជាអង្គការភេរវកម្ម។ ក្រសួងអះអាងថាអ្នកទាំងបីជ្រៀតចូលវៀតណាមដើម្បីប៉ុនប៉ងប្រព្រឹត្តអំពើភេរវកម្ម និងវិច្ឆេទកម្ម (បំផ្លិចបំផ្លាញស៊ីរូងផ្ទៃក្នុង)។ ពួកគេក៏រងការចោទប្រកាន់ផងដែរថាបានក្លែងត្រា និងឯកសារ។ ធួនកើតនៅឆ្នាំ១៩៧៤ កាន់លិខិតឆ្លងដែនន័រវេ ខណៈដែលហ៊ុយកើតឆ្នាំ១៩៧៥ កាន់លិខិតឆ្លងដែនអូស្ត្រាលី។ ក្រសួងមិនបានប្រកាសអំពីភិនភាគរបស់សឺនថាមានសញ្ជាតិអ្វីទេ ដោយគ្រាន់តែនិយាយថាគាត់កើតឆ្នាំ១៩៨០។
ចលនាវៀតតាន់សរសេររៀបរាប់នៅក្នុងសេចក្ដីប្រកាសរបស់ខ្លួនកាលពីល្ងាចម្សិលមិញថាឈ្មោះធួន និងហ៊ុយត្រូវបានចាប់បញ្ជូនទៅវៀតណាម។ ពួកគេបាត់ខ្លួនកាលពីថ្ងៃទី១៨ ខែកញ្ញា។ អ្នកសារព័ត៌មានព្យាយាមទាក់ទងទៅក្រសួងសន្តិសុខសាធារណៈវៀតណាមដើម្បីស្នើសុំការឆ្លើយបំភ្លឺ ប៉ុន្តែគ្មានចម្លើយតបទេ។ អូស្ត្រាលីចាប់ផ្ដើមបញ្ចេញប្រតិកម្មជាបណ្ដើរៗពាក់ព័ន្ធនឹងបញ្ហានេះ។ នាយករដ្ឋមន្ត្រីអូស្ត្រាលី លោកអាល់បានីស (Albanese) ថ្លែងប្រាប់អ្នកសារព័ត៌មាននៅរដ្ឋអាដឺឡេត (Adelaide) ថារដ្ឋាភិបាលរបស់លោកកំពុងជួយជ្រោមជ្រែងហ៊ុយ និងក្រុមគ្រួសាររបស់គាត់តាមមធ្យោបាយការទូត។
អ្នកសារព័ត៌មានព្យាយាមទាក់ទងទៅស្ថានទូតន័រវេប្រចាំទីក្រុងហាណូយដើម្បីចង់ដឹងអំពីសំណុំរឿងនេះ ប៉ុន្តែស្ថានទូតប្រាប់ឱ្យទាក់ទងទៅរដ្ឋាភិបាលន័រវេ។ ក្រុមវៀតតាន់អំពាវនាវឱ្យរដ្ឋាភិបាលន័រវេ, អូស្ត្រាលី និងក្រុមសិទ្ធិមនុស្សជំរុញទៅរដ្ឋាភិបាលវៀតណាមដើម្បីដោះលែងអ្នកទាំងបីជាបន្ទាន់ និងដោយឥតលក្ខខណ្ឌ។ អាជ្ញាធរវៀតណាមបញ្ជាក់ថាសំណុំរឿងនេះមិនទាន់បិទបញ្ចប់ទេ ហើយនឹងបន្តស៊ើបអង្កេតរកឫសគល់ដល់ទីបញ្ចប់។ អាជ្ញាធរប្រាប់ថាកុំព្រួយ អ្នកទាំងបីនឹងទទួលបានការជំនុំជម្រះដោយផ្អែកទៅលើច្បាប់ជាធរមាន៕
ចែករំលែកព័តមាននេះ