មូលនិធិរូបិយវត្ថុអន្តរជាតិ (IMF) បានឱ្យដឹងកាលពីថ្ងៃអង្គារ៍ថា កំណើនសេដ្ឋកិច្ចរបស់កម្ពុជាត្រូវបានព្យាករថា នឹងថយចុះមកនៅត្រឹម៣ភាគរយ ក្នុងឆ្នាំ២០២៦ ធៀបនឹង៥,៣% ក្នុងឆ្នាំ ២០២៥ ដោយសារការកើនឡើងយ៉ាងគំហុកនៃថ្លៃថាមពល ការធ្លាក់ចុះនៃវិស័យទេសចរណ៍ និងការថយចុះនៃប្រាក់ ដែលពលករផ្ញើមកពីក្រៅប្រទេស ។
ជាទូទៅ កំណើនសេដ្ឋកិច្ចកម្ពុជា ត្រូវបានវាយតម្លៃដោយផ្តោតសំខាន់លើទេសចរណ៍ អចលនទ្រព្យ ការនាំចេញជាពិសេស គឺសម្លៀកបំពាក់ ស្បែកជើង និងផលិតផលធ្វើដំណើរ និងវិស័យកសិកម្ម ប៉ុន្តែនៅពេលនេះទេសចរណ៍កំពុងតែមានការធ្លាក់ចុះ ហើយពាណិជ្ជកម្មកំពុងតែរងសំពាធដោយសារតែតម្លៃដើម ដោយសារតែសំពាធនៃតម្លៃថាមពល និងស្ថានភាពនៃសង្គ្រាមអន្តរជាតិ ។
ពាក់ព័ន្ធនឹងបញ្ហាកំណើនសេដ្ឋកិច្ចនេះ IMF បានបញ្ជាក់ថា កំណើនត្រូវបានព្យាករថា នឹងថយចុះមកនៅត្រឹម៣ភាគរយ ក្នុងឆ្នាំ២០២៦ មុននឹងងើបឡើងវិញដល់៤ភាគរយ ក្នុងឆ្នាំ២០២៧ ដោយឆ្លុះបញ្ចាំងពីថ្លៃថាមពលខ្ពស់ ការធ្លាក់ចុះនៃវិស័យទេសចរណ៍ និងប្រាក់ដែលពលករផ្ញើមកពីក្រៅប្រទេស ការថយចុះល្បឿន នៃការនាំចេញសម្លៀកបំពាក់ តម្រូវការក្នុងស្រុកនៅកម្រិតទាប និងលក្ខខណ្ឌហិរញ្ញវត្ថុដែលតឹងរ៉ឹងជាងមុន ។
ស្ថាប័ននេះបានបន្ថែមថា អត្រាអតិផរណាត្រូវបានរំពឹងថា នឹងនៅតែមានកម្រិតខ្ពស់ គឺ៥,៦% ក្នុងឆ្នាំ២០២៦ មុននឹងថយចុះមកវិញនៅពេលដែលតម្លៃថាមពលវិលត្រឡប់ទៅរកភាពប្រក្រតី។
IMF បានលើកឡើងថា ហានិភ័យចំពោះកំណើនសេដ្ឋកិច្ច មានទំនោរទៅរកការធ្លាក់ចុះ ដែលរួមមានការរំខានជាថ្មីលើវិស័យថាមពល និងពាណិជ្ជកម្ម សកម្មភាពឆបោកដែលនៅតែបន្តកើតមាន និងការធ្លាក់ចុះខ្លាំងនៃតម្លៃអចលនទ្រព្យ ។
ស្ថាប័ននេះបានបន្ថែមថា ការរំខានដែលអាចកើតមានពីបាតុភូតអែលនីញ៉ូ ក៏អាចបន្តដាក់សម្ពាធលើផលិតផលកសិកម្មផងដែរ ៕
ចែករំលែកព័តមាននេះ