សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរ ពូទីន ពេលនេះ បានពង្រឹងកាន់តែខ្លាំងលើការពង្រីកកងទ័ព។ កាលពីថ្ងៃទី២៨ កញ្ញា លោកបានចុះហត្ថលេខាលើក្រិត្យមួយពីការបង្កើនចំនួនទាហានថែម១៥.៥០០នាក់ទៀត បញ្ចូលក្នុងជួរកងទ័ព។ វាជាការសម្រេចចិត្តបែបនោះលើកទី៤ហើយក្នុងឆ្នាំនេះ ។
បទបញ្ជារបស់លោកពូទីន កើតមានពេលដែលរុស្ស៊ី ក៏ដូចជាអ៊ុយក្រែនដែរ រងការបាត់បង់ទាហានកាន់តែច្រើន ក្នុងសង្គ្រាមដែលមានរយៈពេលជាង៤ឆ្នាំកន្លះមកហើយ។ ប៉ុន្តែក្រិត្យនោះមិនបានផ្ដល់ហេតុផលណាមួយនៃការបង្កើនចំនួនកងទ័ពឡើយ។ ការវាយរុលទៅមុខរបស់កងទ័ពរុស្ស៊ីក្នុងឆ្នាំនេះនៅអ៊ុយក្រែន ហាក់ដូចជាយឺតបំផុត ។ តាមក្រិត្យថ្មីនោះថា កងទ័ពរុស្ស៊ីនាពេលនេះ កម្រិតចំនួនទាហានត្រឹម១.៥៥០៥០០នាក់ ។ ចាប់តាំងពីខែមីនា មក ការបង្កើនចំនួនទាហានរុស្ស៊ី មានដល់៤៧៨០០នាក់ ។
ក្នុងឆ្នាំនេះ ការវាយរុលទៅមុខរបស់កងទ័ពរុស្ស៊ីនៅតាមខ្សែរណសិរ្សមានយឺតបំផុត ។ ការប្រើប្រាស់ដ្រូនកាន់តែច្រើនលើរណសិរ្ស នាំឲ្យការធ្វើចលនាទ័ពមិនអាចធ្វើលឿនទៅបាននិងមិនអាចប្រើកងទាហានច្រើនឡើយ ។ កងទ័ពរុស្ស៊ី កាលពីថ្ងៃទី២៨កញ្ញា បានវាប្រហារបណ្ឌិតសភាវិទ្យាសាស្ត្រអ៊ុយក្រែន ស្ថិតនៅកណ្ដាលក្រុងគៀវ ខណៈក្រុងមូស្គូបើករលកថ្មីនៃការវាយប្រហារបង្ហូរឈាមក្នុងប្រទេសនេះ។ យោងតាមអាជ្ញាធរមូលដ្ឋានថា ការវាយប្រហាររបស់រុស្ស៊ីចុងក្រោយទាំងនោះ បណ្ដាលឲ្យមនុស្សស្លាប់យ៉ាងតិច៧នាក់ និងរបួសច្រើនសិបនាក់ ។
អ្នកនាំពាក្យផ្នែកសភាពការណ៍បន្ទាន់អ៊ុយក្រែនរាយការណ៍ថា ដ្រូនប្រតិកម្មមួយគ្រឿងរបស់រុស្ស៊ី បានវាយប្រហារចំអគារបណ្ឌិតសភាវិទ្យាសាស្ត្រនេះ ដោយនៅក្បែរអគារនេះ មិនមានទីតាំងយោធាណាមួយឡើយ។ ការវាយប្រហារនេះបណ្ដាលឲ្យមនុស្សម្នាក់ស្លាប់ហើយ៦នាក់ទៀតរងរបួស ។ អគារបណ្ឌិតសភានោះ ត្រូវភ្លើងឆេះបញ្ចេញផ្សែងខ្មៅខ្មួលខ្មាញ់ ។
ចំណែកអភិបាលក្រុងគៀវ លោកវីតាលីគ្លីតស្កូគូសបញ្ជាក់ថា ការវាយប្រហាររបស់រុស្ស៊ី ប្រឆាំងរដ្ឋធានីអ៊ុយក្រែន បណ្ដាលឲ្យមនុស្ស១៩នាក់រងរបួស ក្នុងនោះមានកុមារ៣នាក់ ។ ចំណែកមនុស្ស៣នាក់ ក៏ត្រូវស្លាប់ដែរ ក្នុងការវាយប្រហាររបស់រុស្ស៊ី លើតំបន់ដទៃទៀតនៃក្រុងគៀវនាពេលយប់ ។ ការវាយប្រហារទាំងនោះ ក៏បណ្ដាលឲ្យមនុស្ស៨នាក់ទៀតរងរបួសដែរ។ ម្យ៉ាងវិញទៀតមនុស្ស៣នាក់ ស្លាប់និង១២នាក់រងរបួស ក្នុងការវាយប្រហារដោយដ្រូនប្រឆាំងក្រុងឌីនីប្រូ ។ ការវាយប្រហារនេះបណ្ដាលឲ្យឆេះអគាររដ្ឋបាលមួយ ។
ចំណែកកងទ័ពអ៊ុយក្រែនវិញ នាថ្ងៃទី២៨ កញ្ញា បានវាយប្រហាររោងចក្រការពារ២របស់រុស្ស៊ី នៅតំបន់ទូឡា និងតំបន់វ៉ារ៉ូនីយ៉េវ កាលពីយប់ថ្ងៃទី២៧ កញ្ញា ។ អ៊ុយក្រែននៅវាយប្រហារបណ្ដាទីតាំងប្រេងរុស្ស៊ីនៅតំបន់ក្រាស្នូដាផងដែរ ៕
ចែករំលែកព័តមាននេះ