កម្ពស់ទឹកស្ទឹងសង្កែថយចុះជិតកន្លះម៉ែត្រ ខណៈជំនន់ទឹកនៅក្នុងភូមិ និងតាមដងផ្លូវនានានៅលិចលង់នៅឡើយ
- បាត់ដំបង
ខេត្តបាត់ដំបង ៖ គិតត្រឹមម៉ោង៨ព្រឹកថ្ងៃទី២៩ កញ្ញា នេះ ស្ថានភាពទឹកស្ទឹងសង្កែ បានស្រកចុះពីកម្ពស់១៤.២០ម៉ែត្រ មកត្រឹម១៣.៨០ម៉ែត្រ ប៉ុន្តែជំនន់ទឹកដែលហូរហៀរធ្លាយចេញពីស្ទឹង ធ្វើឲ្យលិចលង់លំនៅឋាន និងតាមបណ្ដាផ្លូវនានានៅក្នុងក្រុងបាត់ដំបង ហាក់មានការស្រកចុះយឺត ខណៈលើកំណាត់ផ្លូវមួយចំនួនអាជ្ញាធរនៅបន្តបិទការឆ្លងកាត់នៅឡើយ ។
បើតាមការពិនិត្យជាក់ស្ដែង ជំំនន់ទឹកដែលលិចលង់លើដងផ្លូវមួយចំនួន នៅរ៉បមាត់ស្ទឹង បានស្រកចុះច្រើន ប៉ុន្តែតាមបណ្ដាផ្លូវដទៃទៀតនៅក្នុងភូមិ ដែលនៅឆ្ងាយពីដងស្ទឹងបន្តិច ហាក់នៅលិចលង់នៅឡើយ ។ កំណាត់ផ្លូវមួយចំនួនបាននិងបន្តបិទការឆ្លងកាត់នៅឡើយ ។ លំនៅឋានរបស់ប្រជាពលរដ្ឋ សាលារៀនមួយចំនួនស្ថិតនៅក្នុងទឹកជំនន់ ដែលកំពុងស្រកសន្សឹមៗទៅតាមប្រព័ន្ធលូ ដែលមានទំហំមិនបរិមាណនឹងទំហំទឹក ។
ដោយឡែក នៅតំបន់បែកខាងលើនៃដងស្ទឹងសង្កែឯណោះវិញ ។ ជាពិសេស ស្រុកសំឡូត ស្រុករតនមណ្ឌល និងស្រុកបាណន់ ។ បើតាមអាជ្ញាធរតាមបណ្ដាស្រុកបានផ្ដល់ដំណឺងបឋមថា ជំនន់ទឹកបានស្រកចុះស្ទើរពីតាមបណ្ដា អូរ ព្រែក និងតាមដងស្ទឹងនានាផង ហើយភ្លៀងក៏ធូរស្បើយច្រើនដែរ ដូច្នេះ សន្ទុះទឹកជំនន់ ហាក់បានធូរស្រាលអស់ហើយនៅតំបន់ប៉ែកខាងលើ ។ រីឯ«ទំនប់ទឹកពហុបំណងបាត់ដំបង» ដែលជាប្រភពស្ដុកទឹកដ៏ធំនៅស្រុករតនមណ្ឌល ក៏បានស្រកចុះច្រើនណាស់ដែរ ។ នេះបើតាមមន្ត្រីជំនាញបាននិយាយ ។
បើទោះជាតាមបណ្ដាស្រុកនានានៅប៉ែកខាងលើ បានថមថយនៃជំនន់ទឹកភ្លៀងនេះក្ដី ប៉ុន្តែនៅក្នុងភូមិសាស្ត្រស្រុកឯកភ្នំ ជំនន់ទឹកស្ទឹងនៅតែបន្តលិចលង់នៅឡើយ ព្រោះស្រុកឯកភ្នំ ជាតំបន់ទំនាប និងស្ថិតនៅប៉ែកខាងក្រោម នៃដងស្ទឹងសង្កែ ។ ដូច្នេះ ជំនន់ទឹកដែលហូរធ្លាក់ចុះពីតំបន់ខាងលើ វានឹងសំយ៉ុងធ្លាក់ទៅកាន់ស្រុកឯកភ្នំ ទើបជំនន់ទឹកស្ទឹងនៅក្នុងស្រុកមួយនេះ រងគ្រោះធ្ងន់ធ្ងរជាងគេ ។ ប៉ុន្តែយ៉ាងណា ជំនន់ទឹកស្ទឹងសង្កែ បានថយចុះច្រើនហើយ តែបើភ្លៀងនៅតែបន្ថែមមកទៀត ទឹកស្ទឹងនឹងហក់ឡើងវិញភ្លាមដែរ ៕
ចែករំលែកព័តមាននេះ