ក្រសួងធនធានទឹកដាក់បទបញ្ជាឱ្យខេត្តកំពង់ស្ពឺត្រៀមខ្លួនជានិច្ច ទប់ស្កាត់ទឹកជំនន់ និងគ្រោះរាំងស្ងួតចុងឆ្នាំ២០២៦
- កំពង់ស្ពឺ
ខេត្តកំពង់ស្ពឺ ៖ លោក ពេជ្រ វាសនា អនុរដ្ឋលេខាធិការ ក្រសួងធនធានទឹក បានណែនាំដល់មន្ទីរធនធានទឹក និងឧតុនិយមខេត្តកំពង់ស្ពឺ ឱ្យបន្តយកចិត្តទុកដាក់ខ្ពស់លើការតាមដានស្ថានភាពទឹកនៅតាមបណ្តាអាងទឹកសំខាន់ៗទាំងអស់ និងត្រូវត្រៀមលក្ខណៈជាស្រេចសម្រាប់ការងារអន្តរាគមន៍សង្គ្រោះ បង្ការ និងឆ្លើយតបចំពោះគ្រោះទឹកជំនន់ ឬគ្រោះរាំងស្ងួត ដែលអាចកើតមានឡើងជាយថាហេតុនៅចុងឆ្នាំ២០២៦ នេះ។
ការណែនាំបែបនេះ គ្រាដែលលោក ពេជ្រ វាសនា អនុរដ្ឋលេខាធិការ និងជាប្រធានក្រុមការងារសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តកំពង់ស្ពឺ បានអញ្ជើញចុះពិនិត្យស្ថានភាពទឹកនៅអាងស្តុកទឹកតាសាល និងអាងទឹកពាមល្វា-អូរតោង ស្ថិតក្នុងភូមិសាស្ត្រខេត្តកំពង់ស្ពឺ នៅថ្ងៃទី២៨ ខែកញ្ញា ឆ្នាំ២០២៦ ។
លោកអនុរដ្ឋលេខាធិការបានបញ្ជាក់ថា គិតត្រឹមថ្ងៃទី២៨ ខែកញ្ញា ឆ្នាំ២០២៦ នេះ បរិមាណទឹកភ្លៀងសរុបចំនួន៨៥០,៨ មីលី
ម៉ែត្រ តិចជាងចំនួន១៦២,១ មីលីម៉ែត្រ (បើធៀបជាមួយបរិមាណទឹកភ្លៀងសរុបឆ្នាំ២០២៥ មានចំនួន ១.០១២,៩ មីលីម៉ែត្រ)។ ដោយឡែក ចំពោះស្ថានភាពទឹកនៅតាមអាងស្តុកទឹកសំខាន់ៗនៅទូទាំងខេត្ត និងកម្ពស់ទឹកនៅតាមបណ្តោយស្ទឹងព្រែកត្នោត នាពេលនេះគឺពុំទាន់មានចោទជាបញ្ហានៅឡើយទេ ។
យោងតាមរបាយការណ៍របស់មន្ទីរធនធានទឹក និងឧតុនិយមខេត្តកំពង់ស្ពឺ ឱ្យដឹងថា នៅក្នុងភូមិសាស្ត្រខេត្តកំពង់ស្ពឺ មានអាងទឹកសរុបចំនួន៣៧៥កន្លែង ក្នុងនោះ រួមមាន៖ អាងស្តុកទឹកធំចំនួន០៦កន្លែង អាងស្តុកទឹកមធ្យមចំនួន១៧កន្លែង និងអាងស្តុកទឹកតូចចំនួន៣៥២កន្លែងផងដែរ ៕
ចែករំលែកព័តមាននេះ