ខេត្តក្រចេះ ៖ នារសៀលថ្ងៃទី២៨ ខែកញ្ញា ឆ្នាំ២០២៦ ទូកចម្លងប្រជាពលរដ្ឋ មួយគ្រឿង បានជួបហេតុការណ៍ផ្កាប់លិចនៅក្នុងទឹក នៅចំណុចអូរគ្រៀង ស្ថិតក្នុងភូមិរវៀង ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ បណ្តាលមកពីផ្ទុកលើសចំណុះ ។
យោងតាមប្រភពព័ត៌មាន និងវីដេអូឃ្លីបជាក់ស្តែងនៅកន្លែងកើតហេតុ បានបង្ហាញឱ្យឃើញពីទូកពណ៌ក្រហម មួយគ្រឿងបានលិចផ្កាប់ក្នុងទឹកអូរ ដែលមានចរន្តហូរយ៉ាងគំហុក ខណៈដែលអ្នកដំណើរជាច្រើននាក់ បានខិតខំប្រឹងហែលទឹកឆ្លងកាត់ចរន្តទឹកហូរឡើងមកកាន់ច្រាំងវិញ ។
តាមការបញ្ជាក់បឋម មនុស្សដែលជិះនៅលើទូកទាំងអស់ បានរួចផុតពីគ្រោះថ្នាក់ដល់អាយុជីវិត ដោយអាចហែលទឹកឡើងដល់ទីសុវត្ថិភាព ប៉ុន្តែម៉ូតូ ចំនួន ៤គ្រឿង ត្រូវបានរាយការណ៍ថា បានធ្លាក់ចូលក្នុងទឹក លិចបាត់ ។
ជុំវិញទីតាំងកើតហេតុនេះ ជាធម្មតានៅរដូវប្រាំង ប្រជាពលរដ្ឋអាចបើកបរឆ្លងកាត់បានធម្មតា ប៉ុន្តែក្នុងរដូវវស្សាទឹកជំនន់លិចលង់ខ្លាំងរហូតដល់កម្រិតទឹកឡើងខ្ពស់ ប្រមាណ ៥ម៉ែត្រ ទើបតម្រូវឱ្យប្រើប្រាស់ទូកចម្លងចំនួន ២គ្រឿង (ទៅ និងមកម្ខាងម្នាក់) ជាមធ្យោបាយឆ្លងកាត់ពីត្រើយម្ខាងទៅម្ខាងទៀត ។
លោក ឈា ផល្លី អភិបាលស្រុកអូរគ្រៀងសែនជ័យ បានមានប្រសាសន៍ នាល្ងាចថ្ងៃទី២៨ ខែកញ្ញា ឆ្នាំ២០២៦នេះថា ស្ថានភាពទឹកជំនន់នេះ បង្កឡើងដោយសារទឹកភ្លៀងធ្លាក់ខ្លាំងជាប់ៗគ្នាជាច្រើនថ្ងៃ ដែលបានបង្កការលិចលង់អូរមួយនេះ ប៉ុន្តែជាធម្មតាវានិងស្រកទៅវិញ ក្នុងរយៈពេល៣ទៅ៤ថ្ងៃ បើមេឃស្រឡះ មិនធ្លាក់ភ្លៀង ។
លោកបន្តថា ចំណុចអូរគ្រៀងនោះ មានទទឹងពីម្ខាងទៅម្ខាងប្រហែលជាង៥០ម៉ែត្រ បើស្ថិតក្នុងស្ថានភាពពេលនេះកម្ពស់ទឹកនៅចំណុចអូរនោះ អាចមានកម្ពស់៥ម៉ែត្រ តែហេតុការណ៍នេះ ពុំបណ្តាលឱ្យមានគ្រោះថ្នាក់ដល់អាយុជីវិតប្រជាពលរដ្ឋនោះឡើយ ។
បច្ចុប្បន្ន ក្រុមការងារក្នុងមូលដ្ឋាន រួមមាន អាជ្ញាធរស្រុក មេឃុំ មេភូមិ និងកម្លាំងសមត្ថកិច្ច បានចុះប្រជុំត្រៀមលក្ខណៈអន្តរាគមន៍ដោះស្រាយ ក៏ដូចជាចុះត្រួតពិនិត្យមើលសកម្មភាពជាក់ស្តែង និងការខូចខាតទ្រព្យសម្បត្តិរបស់ប្រជាពលរដ្ឋផងដែរ ៕
ចែករំលែកព័តមាននេះ