ទីក្រុងកៀវ៖ កងទ័ពអ៊ុយក្រែនទើបតែវាយដណ្ដើមបានមកវិញពីកណ្ដាប់ដៃរុស្ស៊ីនូវទឹកដីមួយផ្នែកនៅភាគខាងជើងតំបន់ដូញែត។ នេះបើយោងតាមការបង្ហើបឱ្យដឹងពីមេបញ្ជាការកំពូលកងទ័ពអ៊ុយក្រែន។ នេះជាផ្នែកមួយនៃប្រតិបត្តិការសឹករបស់អ៊ុយក្រែនដើម្បីបង្កភាពស្មុគស្មាញសម្រាប់ផែនការវាយលុករបស់រុស្ស៊ីទៅលើទីតាំងដែលមានប្រព័ន្ធការពារដ៏រឹងមាំសំខាន់ៗជាច្រើនកន្លែងនៅប្រទេសអ៊ុយក្រែនភាគខាងកើត។
កងអង្គភាពទ័ពទីបីរបស់អ៊ុយក្រែនទើបតែវាយដណ្ដើមបានទឹកដី៥១គីឡូម៉ែត្រការ៉េពីរុស្ស៊ី។ នេះបើយោងតាមការបញ្ជាក់របស់ឧត្ដមសេនីយ៍អានឌ្រី ប៊ីឡេស្គី (Andrii Bilestskyi) ដែលបន្តដឹកនាំបញ្ជាប្រតិបត្តិការសឹកនៅតំបន់នេះចាប់តាំងពីខែសីហា។ ជាសរុប ប្រតិបត្តិការដែលមានឈ្មោះសម្ងាត់ថា «វីវ៉ាល់ឌី -Vivaldi» វាយដណ្ដើមបានដីទំហំ១៧៦គីឡូម៉ែត្រការ៉េនៅភាគខាងជើងតំបន់ដូញែត, រំដោះបានភូមិចំនួនបី និងបោះមូលដ្ឋានទ័ពឈរជើងនៅលើភូមិចំនួន២។
«វិទ្យាស្ថានសិក្សាអំពីសង្គ្រាម» ដែលជាក្រុមអ្នកវិភាគមានទីតាំងនៅវ៉ាស៊ីនតោនថ្លែងថាប្រតិបត្តិការសឹករបស់អ៊ុយក្រែនអាចសម្រេចបានគោលដៅដ៏សំខាន់គួរឱ្យកត់សម្គាល់ដោយបន្ទច់បង្អាក់កិច្ចខិតខំប្រឹងប្រែងរបស់ទីក្រុងម៉ូស្គូក្នុងការវាយប្រហារព័ទ្ធស្នែងក្របីទៅលើតំបន់បន្ទាយការពារដ៏រឹងមាំនៅជុំវិញទីក្រុងនានារបស់អ៊ុយក្រែន។ គួរកត់សម្គាល់ថានៅឆ្នាំនេះ ចលនាវាយរុលទៅមុខរបស់កងទ័ពរុស្ស៊ីមានសភាពយឺតៗ។ ប៉ុន្តែពួកគេបន្តវាយប្រហារចេញពីភាគខាងត្បូងទៅលើទីក្រុងនានារបស់អ៊ុយក្រែន ព្រមទាំងរុលកាន់តែជ្រៅទៅៗចូលទៅទីក្រុងកូស្ទីយ៉ាន់ទីនីវកា (Kostiantynivka) នៅភាគខាងកើត។
តំបន់ដូញែតគឺជាសមរភូមិស៊ីសាច់ហុតឈាមរវាងរុស្ស៊ី និងអ៊ុយក្រែន។ ទីនេះជាតំបន់ប្រទាញប្រទង់គ្នាដ៏ក្ដៅគគុកចាប់តាំងពីសង្គ្រាមផ្ទុះឡើងដំបូង។ សព្វថ្ងៃនេះ អ៊ុយក្រែនបន្តកាន់កាប់ទឹកដីប្រហែល២០%នៅដូញែត។ រុស្ស៊ីនៅតែចិញ្ចឹមចិត្តចង់វាយយកតំបន់នេះទាំងមូលមកគ្រប់គ្រង។ ដំណឹងដែលថាយោធាអ៊ុយក្រែនវាយកាន់កាប់បន្ថែមទៀតនូវតំបន់ដូញែតអាចជាសញ្ញាល្អសម្រាប់អ៊ុយក្រែនដើម្បីវាយរុញច្រានទៅភាគឦសាន។ អ៊ុយក្រែនអះអាងថាខ្លួនវាយយកបានជាង៧០០គីឡូម៉ែត្រការ៉េនៅក្នុងយុទ្ធនាការវាយបករយៈពេលជាច្រើនខែ៕ ប្រភព៖ Reuters
ចែករំលែកព័តមាននេះ