ទឹកស្ទឹងសង្កែនឹងចាប់ផ្ដើមថយចុះនៅល្ងាចនេះ ខណៈនៅតំបន់«អាងស្ដុកទឹកពហុបំណង»ស្រកចុះ២ម៉ែត្រ និងស្បើយទឹកភ្លៀង
- បាត់ដំបង
ខេត្តបាត់ដំបង ៖ ពិតមែនតែកម្ពស់ទឹកស្ទឹងសង្កែ នៅរសៀលថ្ងៃទី២៨ កញ្ញានេះ នៅ«ទ្រឹង»ស្មើនឹងកម្ពស់កាលពីម្សិលមិញ «១៤.២០ម៉» ប៉ុន្តែវានឹងចាប់ផ្ដើមថមថយចុះជាបណ្ដើរៗចាប់ពីពេលល្ងាចនេះតទៅ ព្រោះកម្ពស់ទឹកនៅតំបន់ «អាងស្ដុកទឹកពហុបំណងបាត់ដំបង»បានស្រកចុះប្រហែល០២ម៉ែត្រហើយ ហើយតាមបណ្ដាអូរ ព្រែក ឬស្ទឹង នៅក្នុងស្រុកសំឡូតក៏ស្រកចុះអស់ ហើយក៏ស្បើយទឹកភ្លៀងដែរ ។ នេះបើតាមដំណឹងពីប្រធានមន្ទីរធនធានទឹក និងឧតុនិយមខេត្ត ។
លោក ខៃ សុដា ប្រធានមន្ទីរធនធានទឹក និងឧតុនិយមបាននិយាយថា កម្ពស់ទឹកនៅ«ទំនប់អាងពហុបំណងបាត់ដំបង» បានថយចុះប្រហែល០២ម៉ែត្រហើយ រីឯនៅប៉ែកខាងលើ នៃតំបន់ស្រុកសំឡូត ក៏ស្បើយទឹកភ្លៀងដែរ ។ ដូច្នេះ ស្ថានភាពទឹកនៅប៉ែកខាងលើនៃដងស្ទឹងសង្កែបានថយចុះជាបណ្ដើរៗ ស្រកចុះមកកាន់ប៉ែកខាងក្រោម ។
លោកថា ពេលនេះ កម្ពស់ទឹកស្ទឹងសង្កែ នៅចំកណ្ដាលក្រុងបាត់ដំបង ស្ថិតនៅ «ទ្រឹង»នៅឡើយ តែវាអាចនឹងចាប់ផ្ដើមស្រកចុះជាបណ្ដើរៗនៅល្ងាចនេះ និងថ្ងៃស្អែក។ ជំនន់ទឹកភ្លៀងប៉ុន្មានថ្ងៃកន្លងទៅនេះ បានគ្របដណ្ដប់ទូទាំងខេត្តបាត់ដំបង ។ នេះបើយោងលើរបាយការណ៍ប្រចាំថ្ងៃរបស់មន្ត្រីមូលដ្ឋាន និងតាមការឲ្យដឹងពីមន្ទីរធនធានទឹកនិងឧតុនិយមខេត្តផង ។
ជំនន់ទឹកភ្លៀងដ៏អាក្រក់នេះ បានធ្វើឲ្យលិចលង់ផ្លូវថ្នល់ លំនៅឋាន សាលារៀន វត្តអារាម ស្ទើរគ្រប់កន្លែង នៅតាមបណ្ដាក្រុង និងស្រុកនានា ។ នៅតាមបណ្ដាស្រុកខ្លះ ត្រូវអាជ្ញាធរ និងសមត្ថកិច្ច ប្រើប្រាសគ្រប់មធ្យោបាយ ដើម្បីជម្លៀសពលរដ្ខចេញពីតំបន់គ្រោះថ្នាក់ ទៅកាន់តំបន់មានសុវត្ថិភាព ។
កំណាត់ផ្លូវមួយចំនួនត្រូវទឹកហូរកាត់ផ្ដាច់ និងរងផលប៉ះពាល់ រីឯស្ពានក៏រងការខូចខាចច្រើនកន្លែងផងដែរ រហូតអាជ្ញាធរ ត្រូវបិទការឆ្លងកាត់ជាបណ្ដោះអាសន្នតែម្ដង ។ ដោយឡែក បើក្រឡេកមកមើលក្រុងបាត់ដំបងវិញ ដែលសំបូរដោយអគារបេតិកណ្ឌ នៅតំបន់រ៉បមាត់ស្ទឹងសង្កែ ក៏រងការលិចលង់ដោយជំនន់ទឹកភ្លៀងនេះយ៉ាងធ្ងន់ធ្ងរដែរ ។ ស្ទើរគ្រប់ផ្លូវទាំងអស់នៅក្នុងក្រុងបានរងការផលប៉ះពាល់ និងខូចខាតតែម្ដង ។
អភិបាលក្រុងបាត់ដំបង លោក លាង វាសនា បានថ្លែងប្រាប់កោះសន្តិភាព នៅរសៀលថ្ងៃទី២៨ កញ្ញា នេះដែរថា ជំនន់ទឹកភ្លៀងប៉ុន្មានថ្ងៃកន្លងមកនេះ បានធ្វើឲ្យលិចលង់ហេដ្ឋារចនាផ្លូវថ្នល់ និងលំនៅឋានរបស់ប្រជាពលរដ្ឋប្រមាណ៥០% នៃផ្ទៃដីក្រុងបាត់ដំបងទាំងមូល ។ ពេលនេះ កម្ពស់ទឹកនៅចំកណ្ដាលក្រុង នៅ«ទ្រឹង»ដដែល ប៉ុន្តែបើតាមមន្ទីរធនធានទឹកដែលបានលើកឡើង ទឹកនឹងថយចុះជាបណ្ដើរៗ ប្រសិនបើនៅប៉ែកខាងលើ ពុំមានភ្លៀងធ្លាក់បន្ថែម ។ ជំំនន់ទឹកភ្លៀងនេះមួយផ្នែកធំ បានហូរហៀបែកធ្លាយចេញដងស្ទឹងសង្កែ ធ្វើឲ្យប៉ះពាល់ខ្លាំងទៅលើលំនៅឋានប្រជាពលរដ្ឋ ។
ជាពិសេស ប្រជាពលរដ្ឋដែលរស់នៅតាមបណ្ដាស្រុក និងក្រុង ដែលស្ទឹងសង្កែឆ្លងកាត់ ។ ប៉ុន្តែយ៉ាងណា បើតាមការពិនិត្យជាក់ស្ដែង ស្រុកដែលកំពុងរងគ្រោះដោយជំនន់ទឹកភ្លៀងនេះធ្ងន់ធ្ងរជាងគេ ក្នុងពេលនេះ គឺស្រុកឯកភ្នំ ដែលស្ថិតនៅតំបន់ទំនាបខ្លាំង ហើយនៅប៉ែកខាងក្រោមនៃដងស្ទឹងសង្កែទៀត ៕
ចែករំលែកព័តមាននេះ