រដ្ឋមន្ត្រីក្រសួងមហាផ្ទៃបានចេញបទបញ្ជាឱ្យកម្លាំងនគរបាលចរាចរណ៍ទូទាំងប្រទេស ផ្អាកការចាប់ផាកពិន័យបទល្មើសចរាចរណ៍មួយចំនួននៅលើដងផ្លូវក្នុងរដូវភ្ជុំបិណ្ឌ
- ភ្នំពេញ
រាជធានីភ្នំពេញ៖ រដូវកាលបុណ្យភ្ជុំបិណ្ឌ ឯកឧត្តមឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានចេញបទបញ្ជាឲ្យកម្លាំងនគរបាលចរាចរណ៍ទូទាំងប្រទេស ត្រូវផ្អាកការចាប់ផាកពិន័យបទល្មើសចរាចរណ៍មួយចំនួននៅលើដងផ្លូវ ។
នៅក្នុងចំណោមបទល្មើសចរាចរណ៍ដែលតម្រូវឲ្យផ្អាកនោះ រួមមានទាំងការចាប់ល្បឿនហួសកំណត់ ដែលនៅលើបណ្តាញសង្គម តែងតែឃើញបងប្អូនបានចែកចាយជាច្រើន ។
លោក ទូច សុខ: អ្នកនាំពាក្យរងក្រសួងមហាផ្ទៃបានបញ្ជាក់ថា ក្រោយពិភាក្សាជាមួយថ្នាក់ដឹកនាំក្រសួង និងជំនាញ, អភិសន្តិបណ្ឌិត ស សុខា បានណែនាំឲ្យផ្អាកបណ្តោះអាសន្នចំពោះការចាប់ផាកពិន័យបទល្មើសចរាចរណ៍លើដងផ្លូវមួយចំនួន ពោលទុកតែ ២បទ ល្មើសប៉ុណ្ណោះ ដែលនគរបាលចរាចរណ៍នៅបន្តចាប់ផាក គឺបើកបញ្ច្រាសទិសចរាចរណ៍ និងការរំលោភភ្លើងសញ្ញាចរាចរណ៍ ។
អ្នកនាំពាក្យរងក៏សូមបងប្អូនដែលធ្វើដំណើរទៅតាមខេត្ត នារដូវកាលបុណ្យភ្ជុំបិណ្ឌនេះ ត្រូវបង្កើនការប្រុងប្រយ័ត្ន ចៀសវាងកើតគ្រោះថ្នាក់ ហើយត្រូវរួមគ្នាគោរពច្បាប់ចរាចរណ៍ឲ្យបានម៉ឺងម៉ាត់ និងប្រសិទ្ធភាព បើទោះបីបទល្មើសចរាចរណ៍មួយចំនួន ត្រូវបានផ្អាកក៏ដោយសំខាន់បើកបរឲ្យមានសុវត្ថិភាព ដើម្បីខ្លួនឯង គ្រួសារ និងអ្នកដទៃ ។
ជាមួយគ្នានោះដែរ អ្នកនាំពាក្យរងបានលើកឡើងថា នៅលើផ្លូវជាតិដែលបងប្អូនធ្វើដំណើរទៅតាមខេត្ត, បើសិនឃើញគោលដៅណាមួយដាក់ប៉ុស្តិ៍ត្រួតពិនិត្យចាប់ផាកល្បឿនទៀត សូមបងប្អូនយកវីដេអូនេះ ឲ្យនគរបាលចរាចរណ៍ស្តាប់ និងប្រាប់ថា នេះជាការណែនាំរបស់រដ្ឋមន្ត្រីមហាផ្ទៃ ចៀសវាងមន្ត្រីខ្លះនៅបន្លំ និងធ្វើខុសគោលការណ៍របស់ថ្នាក់ដឹកនាំ។
ជាងនេះ សូមជូនពរបងប្អូនមានសុវត្ថិភាពតាមផ្លូវ និងជួបតែសំណាងល្អ ក្នុងឱកាសបុណ្យភ្ជុំបិណ្ឌនេះ ៕
ចែករំលែកព័តមាននេះ