ទីក្រុងតេអេរ៉ង់៖ ប្រទេសអុីរ៉ង់បញ្ជាក់ជំហរជាថ្មីថាមានតែមធ្យោបាយការទូតប៉ុណ្ណោះដែលអាចដោះស្រាយជម្លោះប្រដាប់អាវុធរវាងខ្លួនជាមួយអាមេរិក និងអុីស្រាអែល។ អុីរ៉ង់ប្រកាសដូច្នេះបន្ទាប់ពីលោកដូណាល់ត្រាំថ្លែងថាលោកសូមបដិសេធលក្ខខណ្ឌរបស់អុីរ៉ង់ដែលបញ្ជូនទៅឱ្យលោកដើម្បីជាថ្នូរនឹងការបើកច្រកសមុទ្រហ័រម៉ូសឡើងវិញ និងបិទបញ្ចប់សង្គ្រាមជាស្ថាពរ។ ការប្រកាសនេះក៏ធ្វើឡើងបន្ទាប់ពីសង្គ្រាមអូសបន្លាយពេលជាងកន្លះឆ្នាំ។
រដ្ឋមន្ត្រីការបរទេសអុីរ៉ង់ លោកអាបាស់ អារ៉ាក់ឈី ថ្លែងថាលក្ខខណ្ឌរបស់យើងមានភាពច្បាស់លាស់ ហើយលទ្ធភាពនៃការបើកច្រកសមុទ្រហ័រម៉ូសឡើងវិញវាទាល់តែអនុវត្តទៅតាមលក្ខខណ្ឌទាំងនោះជាដាច់ខាត។ លោកថ្លែងបន្តទៀតថាមានតែការចរចាគ្នាដើម្បីដោះស្រាយបញ្ហាប៉ុណ្ណោះទើបអាចទម្លុះទម្លាយភាពទាល់ច្រកនេះបាន។ សូមរំលឹកថាកាលពីសប្ដាហ៍មុន អុីរ៉ង់ប្រកាសថាខ្លួនបានបញ្ជូនផែនការសន្តិភាពនោះទៅទីក្រុងវ៉ាស៊ីនតោនតាមរយៈប្រទេសកាតាដែលជាអន្តរការី។
អុីរ៉ង់ប្រកាសអំពីការបញ្ជូនសំណើនោះនៅឯមហាសន្និបាតអង្គការសហប្រជាជាតិ។ លោកត្រាំប្រកាសកាលពីថ្ងៃសៅរ៍ថាលោកសូមជំទាស់នឹងសំណើនោះ។ លោកលើកទឡ្ហីករណ៍ថាអុីរ៉ង់កំពុងអន្ទះអន្ទែងចង់បានកិច្ចព្រមព្រៀងជាខ្លាំង។ លោកថាពួកគេ (អុីរ៉ង់) ចង់បើកច្រកហ័រម៉ូសជាបន្ទាន់ព្រោះពួកគេខាតបង់ធ្ងន់ណាស់។ ថ្វីដ្បិតលោកបដិសេធសំណើនេះ ប៉ុន្តែលោកនៅតែបើកទ្វារចំហជានិច្ចសម្រាប់ការដោះស្រាយបញ្ហាតាមមធ្យោបាយការទូត។
លោកថ្លែងប្រាប់គេហទំព័រអាក់សឺស (Axios) តាមទូរស័ព្ទកាលពីយប់មិញថាការចរចាគ្នាអាចនឹងចាប់ផ្ដើមនៅសប្ដាហ៍នេះ។ រដ្ឋមន្ត្រីការបរទេសអុីរ៉ង់ លោកអារ៉ាក់ឈី ថ្លែងថាក្រុមប្រទេសអន្តរការីមិនទាន់ពាំនាំនូវពាក្យពេចន៍ថាអាមេរិកបដិសេធសំណើនោះជាផ្លូវការទៅអុីរ៉ង់នៅឡើយទេ។ លោកថាយើងកំពុងរង់ចាំស្ដាប់ចម្លើយពីក្រុមប្រទេសសម្របសម្រួល ហើយយើងនឹងធ្វើសេចក្ដីសម្រេចចិត្តដោយផ្អែកទៅលើទស្សនៈរបស់អាមេរិកចំពោះសំណើនោះ៕ ប្រភព៖ Reuters
ចែករំលែកព័តមាននេះ