ប្រទេសថៃ ៖ មនុស្សយ៉ាងតិច៨នាក់បានស្លាប់នៅថៃ ចាប់តាំងពីថ្ងៃទី១៦ កញ្ញា មក ដោយសារទឹកជំនន់មកពីភ្លៀងធ្លាក់ខ្លាំង។ នេះជាការអះអាង នាថ្ងៃទី២៨ កញ្ញា របស់រដ្ឋាភិបាលថៃ ។ ក្រុងបាងកក ត្រូវទឹកជន់លិចហើយប្រកាសពីគ្រោះមហន្តរ៉ាយ តែមិនទាន់មានសេចក្ដីប្រកាសពីមនុស្សណាម្នាក់ស្លាប់បន្តទៀតនៅឡើយទេ ។ បណ្ដាអ្នកកាសែតកំណត់ឃើញភ្លៀងធ្លាក់ខ្លាំងបំផុត និងទឹកជន់លិច យ៉ាងហោចណាស់ ក្នុងសង្កាត់៤ នាភាគខាងកើតក្រុងនេះ។ ប្រជាជនត្រូវដើរឆ្លងកាត់ទឹកដែលមានជម្រៅដល់ត្រឹមចង្គេះ ។
មនុស្ស៨នាក់ស្លាប់នៅបណ្ដាខេត្តភាគខាងកើតប្រទេស (៥នាក់ស្លាប់នៅខេត្តសាកែវ ២នាក់នៅចាន់ថាប៊ូរី និងម្នាក់នៅសារ៉ាប៊ូរី) តែអាជ្ញាធរមិនបានផ្ដល់ភាពកម្អិតឡើយ ។ នៅក្រុងបាងកក មនុស្សជាង៥០០.០០០គ្រួសារ និងមនុស្ស១,៧លាននាក់ក្នុងខេត្ត២៧របស់ប្រទេស រងការប៉ះពាល់ដោយទឹកជំនន់ ។ ក្រោយរយៈពេល៤៨ម៉ោងនៃភ្លៀងធ្លាក់យ៉ាងខ្លាំង បណ្ដាលឲ្យលិចផ្ទះសម្បែង ហាងទំនិញ និងផ្លូវថ្នល់ទាំងឡាយនៃក្រុងបាងកក ហើយអាជ្ញាធរក្រុងនោះ នាថ្ងៃទី២៦ កញ្ញា បានប្រកាសអាសន្នគ្រោះមហន្តរាយធម្មជាតិក្នុងរាជធានីទាំងមូល ។ បណ្ដាសាលារៀនត្រូវបិទទ្វារ ហើយការងារត្រូវធ្វើតាមអនឡាញ ។
ភ្លៀងធ្លាក់ខ្លាំងក្នុងកម្រិតដល់៣០០មីល្លីម៉ែត្រក្នុងរាជធានី រវាងរសៀលថ្ងៃទី២៤ កញ្ញា និងព្រឹកថ្ងៃទី២៦ កញ្ញា។ គេមិនដែលឃើញទឹកជំនន់់ខ្លាំងបែបនេះ ទាល់តែសោះនៅបាងកក ចាប់តាំងពី១៥ឆ្នាំមកហើយ ។ ក្នុងសន្និសីទសារព័ត៌មានមួយអ្នក នាំពាក្យរដ្ឋាភិបាលថៃថ្លែងថា តំបន់មួយចំនួននៃក្រុងបាងកក នៅប្រឈមមុខ នឹងទឹកជំនន់កម្រិតខ្ពស់នៅឡើយ។
គួររំឭកថា កាលពីឆ្នាំ២០១១ នៅប្រទេសថៃទាំងមូលជួបប្រទះទឹកជំនន់អាក្រក់បំផុត បណ្ដាលឲ្យមនុស្សស្លាប់ដល់ជាង៥០០នាក់ ហើយផ្ទះសម្បែងច្រើនលានខ្នងរងការខូចខាត។
រដ្ឋបាលក្រុងបាងកកបានប្រកាសពីគ្រោះមហន្តរាយធម្មជាតិក្នុងស្រុក៥០នៃក្រុងនេះ។ ផ្លូវទាំងឡាយនៃក្រុងបាងកក ត្រូវទឹកជន់លិច ហើយមនុស្សម្នាដើរកាត់ទឹកត្រឹមជង្គង់ និងកន្លែងខ្លះដល់ត្រឹមចង្កេះ ៕
ចែករំលែកព័តមាននេះ