អន្តរជាតិ ៖ ការនាំចេញប្រេងឆៅចេញពីបណ្តាប្រទេសផលិតធំៗនៅមជ្ឈិមបូព៌ាបានងើបឡើងវិញក្នុងខែកញ្ញានេះ ដល់ទៅ ១២,៨ លានបារ៉ែលក្នុងមួយថ្ងៃ ជាកម្រិតខ្ពស់បំផុតចាប់តាំងពីសង្គ្រាមរវាងសហរដ្ឋអាមេរិក-អ៊ីស្រាអែលជាមួយនឹងអ៊ីរ៉ង់ បានចាប់ផ្តើមកាលពីខែកុម្ភៈកន្លងទៅ ខណៈអារ៉ាប៊ីសាអូឌីត និងអេមីរ៉ាតអារ៉ាប់រួម បានជម្រុញការនាំចេញរៀងខ្លួន។ នេះបើតាមការចេញផ្សាយពី Reuters នៅថ្ងៃទី២៨ ខែកញ្ញា ដោយផ្អែកលើទិន្នន័យពីក្រុមហ៊ុន Kpler។
ការងើបឡើងវិញនេះ កើតឡើងបន្ទាប់ពីការចាប់ផ្តើមឡើងវិញនូវការនាំចេញតាមរយៈច្រកសមុទ្រហ័រមូស (Hormuz) ដែលត្រូវបានរំពឹងថានឹងកើនឡើងដល់ប្រហែល ៧,៤ លានបារ៉ែលក្នុងមួយថ្ងៃក្នុងខែនេះ ដោយសារអារ៉ាប៊ីសាអូឌីតបានបង្វែរទិសដៅនាំចេញពីកំពង់ផែយ៉ានប៊ូ (Yanbu) នៅសមុទ្រក្រហម ក្រោយការវាយប្រហារបានបំផ្លាញប្រព័ន្ធបំពង់បង្ហូរប្រេងពីភាគខាងកើតទៅខាងលិចរបស់ខ្លួន។
ខណៈពេលការនាំចេញប្រេងឆៅពីតំបន់ ដែលរួមមានអារ៉ាប៊ីសាអូឌីត អេមីរ៉ាតអារ៉ាប់រួម អ៊ីរ៉ាក់ អូម៉ង់ កាតា កូវែត និងអ៊ីរ៉ង់ បានងើបឡើងវិញក៏ដោយ ក៏ការនាំចេញទាំងនោះនៅតែមានកម្រិតទាបជាងមុនប្រមាណ ៦ លានបារ៉ែលក្នុងមួយថ្ងៃ បើធៀបនឹងចំនួន ១៨,៨ លានបារ៉ែលក្នុងមួយថ្ងៃ កាលពីខែកុម្ភៈ។
ប្រទេសនាំចេញច្រើនជាងគេប្រចាំតំបន់គឺអារ៉ាប៊ីសាអូឌីត ប្រមាណ ៥,៤ លានបារ៉ែលក្នុងមួយថ្ងៃក្នុងខែនេះ ដែលងើបឡើងវិញយ៉ាងខ្លាំងពីចំនួនត្រឹមជាង ២,៤ លានបារ៉ែលក្នុងមួយថ្ងៃ កាលពីខែសីហា។ ទិន្នន័យពី Kpler ក៏បានបង្ហាញទៀតថា កប៉ាល់ដឹកប្រេងឆៅខ្នាតយក្សសរុបចំនួន ១៩ គ្រឿង ដែល១គ្រឿងៗដឹកប្រេងរបស់អារ៉ាប៊ីសាអូឌីតចំនួន ២ លានបារ៉ែល បានចាកចេញពីច្រកសមុទ្រ Hormuz កាលពីសប្តាហ៍មុន។ ទិន្នន័យទាំងនេះ មិនបានរាប់បញ្ចូលបណ្តាកប៉ាល ដែលបានឆ្លងកាត់ច្រកសមុទ្រហ័រមូស ដោយបិទឧបករណ៍បញ្ជូនសញ្ញាស្វ័យប្រវត្តិ (AIS) ដើម្បីគេចវេសពីការតាមដាននោះទេ។
មុនពេលសង្គ្រាមអ៊ីរ៉ង់ ចាប់ផ្តើមកាលពីថ្ងៃទី២៨ ខែកុម្ភៈ ឆ្នាំ២០២៦ ច្រកសមុទ្រហ័រមូស ធ្លាប់ជាផ្លូវដឹកជញ្ជូនពាណិជ្ជកម្មខ្នាតធំប្រហែល ១២៥ គ្រឿងក្នុងមួយថ្ងៃ ដែលរួមមានកប៉ាល់ដឹកប្រេង ឧស្ម័ន ទំនិញស្ងួត និងកុងតឺន័រ ដែលមានចំណែក ប្រហែល ២០% នៃការផ្គត់ផ្គង់ប្រេងឆៅ និងឧស្ម័នធម្មជាតិរាវ (LNG) ប្រចាំថ្ងៃរបស់ពិភពលោក។
ទោះជាយ៉ាងណាក៏ដោយ គិតត្រឹមម៉ោង ២ រសៀល ថ្ងៃទី២៨ ខែកញ្ញា (ម៉ោងនៅកម្ពុជា) ប្រេងឆៅ Brent ស្តង់ដាអន្តរជាតិ ឈរនៅតម្លៃ ១០៦,៦ ដុល្លារអាមេរិកក្នុង១បារ៉ែល កើនឡើងជាង ២,២៦ ដុល្លារ ឬ ២,១៧% ខណៈប្រេងឆៅ WTI របស់សហរដ្ឋអាមេរិក កើនឡើង ១,១៧ ដុល្លារ ឬ ១,២៧% តម្លៃ ៩៣,៥៨ ដុល្លារ/បារ៉ែល។ ការកើនឡើងនេះ កើតឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានបដិសេធលក្ខខណ្ឌនៃកិច្ចព្រមព្រៀងសន្តិភាពពីប្រទេសអ៊ីរ៉ង់៕
ចែករំលែកព័តមាននេះ