ទីក្រុងកាត់ម៉ាន់ឌូ៖ ក្រុមអ្នកជួយសង្គ្រោះកំពុងស្វែងរកមនុស្ស១២នាក់ដែលបាត់ខ្លួនក្រោយហេតុការណ៍បាក់ផ្ទាំងទឹកកក។ មនុស្សយ៉ាងតិច២នាក់បានស្លាប់នៅក្នុងហេតុការណ៍នោះ។ ព្រឹត្តិការណ៍នេះកើតឡើងនៅលើភ្នំមួយរបស់នេប៉ាល់នៅពេលកើតមានអាកាសធាតុដ៏អាក្រក់មួយ។ មនុស្សដប់នាក់ទៀតត្រូវបានជួយសង្គ្រោះទាន់ពេលវេលានៅលើភ្នំហ៊ីមឡុង (Himlung) ដែលមានកម្ពស់៧១២៦ម៉ែត្រស្ថិតនៅប្រទេសនេប៉ាល់ភាគខាងជើងក្រោយហេតុការណ៍បាក់ផ្ទាំងទឹកកកកាលពីថ្ងៃអាទិត្យ។
អ្នកស្លាប់ និងអ្នកបាត់ខ្លួនទាំងនោះសុទ្ធតែជាជនជាតិនេប៉ាល់ទាំងអស់។ ហេតុការណ៍បាក់ផ្ទាំងទឹកកកកើតឡើងនៅឯកន្លែងបោះតង់សម្រាកលំហែកាយ។ ពេលនោះ ពួកគេកំពុងរង់ចាំការមកដល់នៃក្រុមអ្នកទេសចរបរទេសដើម្បីឡើងទៅលើកំពូលភ្នំទាំងអស់គ្នានៅរដូវស្លឹកឈើជ្រុះឆ្នាំនេះដែលចាប់ផ្ដើមតាំងពីដើមខែកញ្ញា។ អ្នកដែលត្រូវបានគេជួយសង្គ្រោះត្រូវបានដឹកជញ្ជូនចេញពីកន្លែងកើតហេតុតាមឧទ្ធម្ភាគចក្រ។
ដោយឡែក សាកសពជនរងគ្រោះ២នាក់ដែលបានស្លាប់ត្រូវបានដឹកទៅអាកាសយានដ្ឋាននៃរដ្ឋធានីកាត់ម៉ាន់ឌូ និងដឹកបន្តទៅមន្ទីរពេទ្យសាកលវិទ្យាល័យទ្រីភូវ៉ាន (Tribhuvan)។ ក្រុមគ្រួសារ និងមិត្តភក្តិរបស់ជនរងគ្រោះធ្វើដំណើរទៅពិនិត្យមើលសាកសពនៅទីបច្ឆា ប៉ុន្តែពួកគេសូមមិនធ្វើអត្ថាធិប្បាយអ្វីទាំងអស់។ មានសេចក្ដីរាយការណ៍អំពីទឹកជំនន់ និងការបាក់ដីជាច្រើនកន្លែងនៅស្រុកម៉ាណាង (Manang) ជាទីកន្លែងដែលភ្នំនោះតាំងនៅ។ ហេតុការណ៍ទាំងនេះសុទ្ធតែបណ្ដាលមកពីការធ្លាក់ភ្លៀងខ្លាំង។ នេះបើយោងតាមការបង្ហើបឱ្យដឹងពីមន្ត្រីរដ្ឋបាលស្រុក។
ហេតុការណ៍បាក់ផ្ទាំងទឹកកកលើកនេះកើតមានឡើងចំពេលដែលរដ្ឋាភិបាលចេញសេចក្ដីជូនដំណឹងឱ្យប្រជាជនប្រុងប្រយ័ត្នខ្ពស់ចំពោះអាកាសធាតុប្រែប្រួលដ៏អាក្រក់នៅទូទាំងប្រទេស។ គណៈកម្មជាតិគ្រប់គ្រងគ្រោះមហន្តរាយថ្លែងថាមនុស្ស២១នាក់បានស្លាប់ និង៥នាក់ទៀតបាត់ខ្លួននៅក្នុងហេតុការណ៍ផ្សេងៗគ្នាគិតចាប់ពីថ្ងៃព្រហស្បតិ៍ដល់ថ្ងៃអាទិត្យ។ នេប៉ាល់ទើបតែកើតមានគ្រោះមហន្តរាយដ៏ធំកាលពីខែសីហាដោយសារទឹកជំនន់ធ្លាក់ពីកំពូលភ្នំលិចភូមិជាច្រើននៅប៉ែកខាងក្រោម។ មនុស្សជាង១៤០០នាក់បានស្លាប់ និងជិត៦ពាន់នាក់ទៀតបន្តបាត់ខ្លួនរហូតដល់សព្វថ្ងៃ៕ ប្រភព៖ AP
ចែករំលែកព័តមាននេះ