ទីក្រុងកៀវ៖ សង្គ្រាមអ៊ុយក្រែននៅតែបន្តឆាបឆេះយ៉ាងក្ដៅគគុកទោះបីលោកហ្សេឡិនស្គី និងលោកដូណាល់ត្រាំថ្លែងកាលពីមុននេះថាអស់លោកចង់ឃើញសង្គ្រាមបិទបញ្ចប់ទៅវិញនៅមុនរដូវរងាឆ្នាំនេះយ៉ាងណាក្ដី។ ថ្មីៗនេះ ដ្រូនរបស់រុស្ស៊ីវាយប្រហារបណ្ដាលឱ្យឆេះផ្សារមួយកន្លែងនៅខាងក្រៅរដ្ឋធានីកៀវ និងបណ្ដាលឱ្យស្លាប់មនុស្ស២នាក់។ រដ្ឋធានីរបស់អ៊ុយក្រែនក៏រងការវាយប្រហារដូចគ្នា។ នេះបើយោងតាមមន្ត្រីមូលដ្ឋាន។
រដ្ឋអាជ្ញាអ៊ុយក្រែនថ្លែងថាការវាយប្រហារដោយដ្រូនរុស្ស៊ីទៅលើផ្សារនៅតំបន់សូហ្វ៊ីសស្កា បោះឆាហ៊ីវកា (Sofiska Borshchahivka) ខាងលិចទីក្រុងកៀវបណ្ដាលឱ្យស្លាប់មនុស្ស២នាក់ និងរបួស១០នាក់។ តាមរយៈរូបថតដែលគេបង្ហោះផ្សព្វផ្សាយតាមអនឡាញ គេឃើញរូបអគារ និងរថយន្តឆេះយ៉ាងសន្ធោសន្ធៅ។ នៅលើដីរាយប៉ាយដោយកម្ទេចកម្ទី។ នៅរដ្ឋធានីកៀវ អភិបាលនៃគណៈអភិបាលទីក្រុងនេះគឺលោកវ៉ាទីលី គ្លីតឆ្កូ ថ្លែងថាមនុស្ស៩នាក់រងរបួស រួមទាំងកុមារម្នាក់ផងដែរ។ កាលពីមុននេះ រុស្ស៊ីច្រើនវាយប្រហារតាមអាកាសទៅលើទីក្រុងតូចធំនានារបស់អ៊ុយក្រែននៅពេលយប់។
ប៉ុន្តែប៉ុន្មានសប្ដាហ៍ចុងក្រោយនេះ រុស្ស៊ីសម្រុកវាយប្រហារពេលថ្ងៃវិញម្ដងសឹងតែរៀងរាល់ថ្ងៃ។ លោកហ្សេឡិនស្គីប្រកាសថ្កោលទោសការវាយប្រហារលើកចុងក្រោយដោយអះអាងថានោះជាទីតាំងជនស៊ីវិលរស់នៅ។ ដូច្នេះវាប្រៀបបាននឹងអំពើភេរវកម្មដូច្នោះដែរ។ លោកបង្ហោះសារនៅលើបណ្ដាញអ៊ិចថារុស្ស៊ីគ្មានគោលដៅយោធាដែលត្រូវវាយប្រហារទីនោះទេ។ នេះជាការប៉ុនប៉ងបំបាក់ស្មារតីរបស់ប្រជាជនអ៊ុយក្រែន និងជាការព្យាយាមបង្កការខូចខាតយ៉ាងធ្ងន់ធ្ងរបំផុតចំពោះសង្គមរបស់យើង។
ក្រឡេកទៅមើលទីក្រុងស៊ូមីនៅភាគខាងត្បូងដែលជាគោលដៅរុស្ស៊ីវាយប្រហារជារឿយៗ គ្រាប់បែកមានប្រព័ន្ធនាំផ្លូវបានធ្លាក់ក្បែរមជ្ឈមណ្ឌលជួយគាំទ្រជនស៊ីវិលបណ្ដាលឱ្យស្លាប់មនុស្ស២នាក់។ នេះបើយោងតាមអភិបាលនៃគណៈអភិបាលតំបន់ លោកអូឡេ រីហូរ៉ូវ។ នៅខាគីវដែលជាទីក្រុងធំទី២របស់អ៊ុយក្រែន ដ្រូនរបស់រុស្ស៊ីវាយប្រហាររថយន្តមួយគ្រឿងបណ្ដាលឱ្យស្លាប់អ្នកបើកបរ។ លោកហ្សេឡិនស្គីអះអាងថារុស្ស៊ីបញ្ជូនដ្រូន២៧៧គ្រឿងទៅវាយប្រហារ ក្នុងនោះ១៥៥គ្រឿងប្រើប្រាស់គ្រឿងម៉ាស៊ីនកម្លាំងខ្លាំង៕ ប្រភព៖ Reuters
ចែករំលែកព័តមាននេះ