ទីក្រុងចូហាន់ណេស្បឺក៖ នគរបាលអាហ្វ្រិកខាងត្បូងកំពុងតាមប្រមាញ់ជនដៃដល់នៅក្នុងអំពើបាញ់ប្រហារ២ករណីផ្សេងគ្នាបណ្ដាលឱ្យស្លាប់មនុស្ស២៧នាក់។ ការបាញ់ប្រហារទាំងនេះឃ្លាតគ្នាត្រឹមតែប៉ុន្មានម៉ោងប៉ុណ្ណោះ។ ព្រឹត្តិការណ៍ទាំងនេះរំលេចឱ្យឃើញថាប្រទេសអាហ្វ្រិកខាងត្បូងកំពុងតែកម្រើករំពើកនូវអំពើហិង្សាពាក់ព័ន្ធនឹងការប្រើប្រាស់កាំភ្លើង។ ប្រធានាធិបតីអាហ្វ្រិកខាងត្បូង លោករ៉ាម៉ាហ្វូសា (Ramaphosa) ថ្លែងថាលោកមិនបណ្ដោយឱ្យព្រឹត្តិការណ៍បែបនេះកើតឡើងជាបន្តទៀតទេ។
កាលពីមុននេះមួយថ្ងៃទើបតែមានព្រឹត្តការណ៍បាញ់ប្រហារស្លាប់មនុស្ស១១នាក់នៅឯពិធីជប់លៀងនៅក្បែរទីក្រុងដឺបាន (Durban)។ អាជ្ញាធរកំពុងតែសិក្សាអំពីមូលហេតុនៃអំពើបាញ់ប្រហារក្បែរទីក្រុងចូហាន់ណេស្បឺក និងទីក្រុងខេបថោននោះ។ លទ្ធផលស៊ើបអង្កេតបឋមបង្ហាញថាករណីបាញ់ប្រហារមួយទំនងជាកើតឡើងដោយការទំនាស់រវាងក្រុមរកស៊ីជីករ៉ែខុសច្បាប់ និងក្រុមរកស៊ីកាច់កុងគ្នា។
លោករ៉ាម៉ាហ្វូសាថ្លែងថាបទឧក្រិដ្ឋនេះមានភាពធ្ងន់ធ្ងរដែលយើងត្រូវតែលុបបំបាត់ឱ្យបាន។ កងសន្តិសុខរបស់យើងបន្តទប់ស្កាត់ករណីនេះ។ ទោះជាយ៉ាងណាក្ដី គេសង្កេតឃើញថាបទល្មើសហិង្សាបន្តកើតមានយ៉ាងពុះកញ្ជ្រោលនៅអាហ្វ្រិកខាងត្បូងទោះបីអាជ្ញាធរព្យាយាមបង្ក្រាបយ៉ាងណាក្ដី។ រដ្ឋធានីរបស់អាហ្វ្រិកខាងត្បូងជាប់ឈ្មោះជាទីក្រុងដែលមានអត្រាឃាតកកម្មខ្ពស់បំផុតមួយនៅលើសាកលលោក។
ករណីបាញ់ប្រហារនៅកន្លែងផឹកស៊ីអាចជាការវាយប្រហារបែបសងសឹក។ នៅតំបន់វេលេឡា (Weleda) ចម្ងាយ៨០គីឡូម៉ែត្រពីចូហាន់ណេស្បឺក មនុស្ស១៧នាក់បានស្លាប់ និង១៥នាក់រងរបួសដោយសារការបាញ់ប្រហារពីសំណាក់ជនសង្ស័យជាច្រើននាក់ដែលបំពាក់ដោយកាំភ្លើងអាកា៤៧។ លោករ៉ាម៉ាហ្វូសាអះអាងថានគរបាលមានរូបថតជនសង្ស័យ និងកំពុងតាមប្រមាញ់ពួកគេហើយ៕
ចែករំលែកព័តមាននេះ