ម៉ូតូ២គ្រឿងទាក់ដៃចង្កូតគ្នាដួ.លខ្ទា.តលើផ្លូវត្រូវឡានលាយបេតុងកិ.នស្លា.ប់ម្នាក់ របួ.សធ្ងន់ម្នាក់
- ភ្នំពេញ
រាជធានីភ្នំពេញ៖ យុវជនជាកម្មកររោងចក្រម្នាក់បានជិះម៉ូតូ១គ្រឿងដឹកស្ត្រីម្នាក់វ៉ាជែងយានយន្តនៅខាងមុខក៏ទាក់ដៃចង្កូតគ្នាជាមួយម៉ូតូ១គ្រឿងផ្សេងទៀត បណ្ដាលឲ្យដួលខ្ទាតលើផ្លូវ ស្របពេលនោះមានរថយន្តលាយបេតុង១គ្រឿងទៅដល់ ក៏បានកិន បណ្ដាលឲ្យយុវជននោះស្លាប់ ចំណែកស្ត្រីម្នាក់ដែលជាអ្នករួមដំណើររបួសធ្ងន់។
ឧប្បត្តិហេតុនោះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី២៨ ខែកញ្ញា ឆ្នាំ២០២៦ នៅលើផ្លូវជាតិលេខ២ ត្រង់ចំណុចខាងត្បូងរង្វង់មូលកួរស្រូវ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
យុវជនដែលស្លាប់ឈ្មោះមឿង ភារុន អាយុ២៥ កម្មកររោងចក្រ មានទីលំនៅភូមិព្រែករទាំង សង្កាត់ព្រែកកំពឹស ខណ្ឌដង្កោ ។ ចំណែកអ្នករួមដំណើរម្នាក់ទៀតជាស្ត្រីរងរបួសធ្ងន់ នៅមិនទាន់ត្រូវបានស្គាល់អត្តសញ្ញាណនោះទេ ។
ប្រជាពលរដ្ឋដែលបានឃើញហេតុការណ៍នោះបាននិយាយថា នៅមុនពេលកើតហេតុពួកគាត់បានឃើញជនរងគ្រោះជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខ ភ្នំពេញ1JJ-7156 ដឹកស្ត្រីម្នាក់ពីក្រោយ ។ ខណៈនោះបានធ្វើដំណើរតាមផ្លូវជាតិលេខ២ ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ បានវ៉ាជែងយានយន្តនៅខាងមុខ ហើយក៏បានទាក់ដៃចង្កូតគ្នាជាមួយម៉ូតូ១គ្រឿងផ្សេងទៀត បណ្ដាលឲ្យដួលខ្ទាតទៅលើផ្លូវ ។
ប្រភពដដែលបានប្រាប់ឲ្យដឹងបន្តទៀតថា ស្របពេលនោះក៏មានរថយន្តលាយបេតុង១គ្រឿង ពណ៍ស ឆ្នូតក្រហម ពាក់ស្លាកលេខ កំពង់ស្ពឺ 5A-0009 បើកបរដោយបុរសម្នាក់ ធ្វើដំណើរតាមផ្លូវជាតិលេខ២ ក្នុងទិសដៅពីត្បូងទៅជើងទៅដល់ ។ ដោយសារតែរថយន្តកំពុងលឿនគួរសមដែរ ទើបគេចចេញក៏មិនទាន់ និងជាន់ហ្វ្រាំងឈប់ក៏មិនទាន់ ក៏ជ្រុលទៅកិនយុវជនឈ្មោះមឿង ភារុន បណ្ដាលឲ្យខ្ទេចខ្លួនស្លាប់ភ្លាមៗ នៅនឹងកន្លែង ចំណែកស្ត្រីអ្នករួមដំណើររងរបួធ្ងន់ ។
ប្រភពខាងលើបានប្រាប់បន្ថែមទៀតថា រថយន្តលាយបេតុងនោះបានឈប់ស្ងៀមនៅនឹងកន្លែងដោយកង់ក្រោយខាងឆ្វេងនៃរថយន្ត បានកិនពីលើយុវជនរងគ្រោះជាប់ រីឯម៉ូតូបានជាប់នៅពីក្រោមក្បាលរថយន្តតែម្ដង ។ បន្ទាប់មកអ្នកបើកបររថយន្តខាងលើ ត្រូវបាននគរបាលឃាត់ខ្លួននាំយកទៅសាកសួរនៅប៉ុស្តិ៍នគរបាលរដ្ឋបាលព្រែកកំពឹស ដោយឡែកអ្នករងរបួសធ្ងន់ ក៏ត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ផងដែរ ។
បើតាមបុរសម្នាក់ដែលត្រូវជាឪពុករបស់យុវជនរងគ្រោះបាននិយាយថា នៅមុនពេលកើតហេតុកូនប្រុសគាត់រូបនេះបានជិះម៉ូតូចេញពីផ្ទះនៅភូមិព្រែករទាំង សង្កាត់ព្រែកកំពឹសដោយពេលចេញពីផ្ទះជិះម៉ូតូតែម្នាក់ឯងទេ ។ ប៉ុន្តែក្រោយមកគាត់ពុំដឹងថា កូនគាត់ដឹកនរណាទៀតឡើយ បន្ទាប់ពីកូនចេញពីផ្ទះបានមួយសន្ទុះ ក៏ស្រាប់តែគាត់បានទទួលដំណឹងថា កូនប្រុសត្រូវរថយន្តកិនស្លាប់ ពេលនោះគាត់ក៏បានទៅមើលឃើញកូនប្រុសស្លាប់នៅក្រោមកង់រថយន្តបាត់ទៅហើយ ។
ក្រោយពេលកើតហេតុកម្លាំងប៉ុស្តិ៍នគរបាលរដ្ឋបាលព្រែកកំពឹស និងកម្លាំងផ្នែកនគរបាលចរាចរណ៍ខណ្ឌដង្កោ បានចុះទៅសម្រួលចរាចរនៅត្រង់ចំណុចកើតហេតុនោះមិនឲ្យកកស្ទះ ព្រោះផ្លូវនោះមានការធ្វើដំណើរយ៉ាងមមាញឹក បើគ្មានការសម្រួសចរាចរទេនោះនិងមានការកកស្ទះ ។ បន្ទាប់មកបានរាយការណ៍ជូនកម្លាំងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះទៅធ្វើការវាស់វែង រួចនាំយករថយន្តនិងអ្នកបើកបរ ព្រមទាំងម៉ូតូរងគ្រោះទៅកានការិយាល័យរង់ចាំការដោះស្រាយតាមច្បាប់ ៕
ចែករំលែកព័តមាននេះ