មានសេចក្តីរាយការណ៍ថា សត្វក្រពើចំនួន ៤ក្បាល ដែលមួយក្បាលៗមានប្រវែងប្រហែល២ ម៉ែត្រ បានរួចពីទ្រុងក្នុងខេត្តស្រះកែវ ដែលកំពុងរងគ្រោះដោយទឹកជំនន់ ដែលហេតុការណ៍នេះបានធ្វើឱ្យប្រជាពលរដ្ឋថៃ ភ័យខ្លាចរត់គេចខ្លួន និងខ្លះទៀតបានឡើងលើដើមឈើដើម្បីសុវត្ថិភាព ។ នេះបើតាមសេចក្តីរាយការណ៍របស់សារព័ត៌មាន Khaosod English ។
ប្រភពដដែលបានបន្តថា ប្រជាពលរដ្ឋបានរាយការណ៍ថា បានឃើញសត្វក្រពើទាំងនោះ នៅក្បែរតំបន់កសិដ្ឋានមួយក្នុងស្រុក ខាវ ចាកាន ( Khao Chakan) ហើយនៅពេលនេះ អាជ្ញាធរកំពុងសម្របសម្រួលការដោះស្រាយបញ្ហានេះ និងបានអំពាវនាវដល់ប្រជាពលរដ្ឋកុំឱ្យចុះទៅក្នុងទឹក ឬព្យាយាមចូលទៅជិត និងចាប់សត្វទាំងនោះ ។
មកដល់ពេលនេះ ស្ថានភាពទឹកជំនន់នៅខេត្តនេះកំពុងតែធ្ងន់ធ្ងរ ដោយផ្លូវហាយវេមួយចំនួននៅក្នុងខេត្ត ក៏កំពុងរងការជន់លិចយ៉ាងខ្លាំងផងដែរ ដោយផ្នែកខ្លះមិនអាចឱ្យយានយន្តគ្រប់ប្រភេទធ្វើដំណើរឆ្លងកាត់បានឡើយ ។ អ្នកបើកបរត្រូវបានណែនាំឱ្យជៀសវាងផ្លូវដែលមានទឹកជំនន់ និងអនុវត្តតាមការណែនាំរបស់អាជ្ញាធរ ។
រឿងនេះ វាកើតនៅថៃឯណោះទេ ប៉ុន្តែដោយភូមិសាស្ត្រខេត្តនេះជាប់ផ្នែកខ្លះនៃខេត្តបន្ទាយមានជ័យ ហើយក៏អាចមានប្រភពទឹកតភ្ជាប់គ្នា ពលរដ្ឋយើងក៏គួរប្រុងប្រយ័ត្នផងដែរខ្លាចវារសាត់អណ្តែតមកដល់ស្រុកយើង ៕
ចែករំលែកព័តមាននេះ