ខេត្តកំពង់ស្ពឺ៖ បុរសម្នាក់ត្រូវបានកម្លាំងនគរបាលស្រុកសំរោងទងឃាត់ខ្លួន បន្ទាប់ពីយកដុំថ្មគប់ម្តាយបង្កើត និងបងថ្លៃបណ្តាលឱ្យរងរបួសមិនទាន់ដឹងមូលហេតុច្បាស់លាស់ សង្ស័យប្រើប្រាស់គ្រឿងញៀនលើសកំរិត។
ករណីហិង្សាដោយចេតនា កូនប្រុសបង្កើតយកដុំថ្មគប់ម្តាយ និងបងថ្លៃបណ្តាលឲ្យរងរបួស បានធ្វើឡើងកាលពីវេលាម៉ោង៨និង៥០នាទីយប់ ថ្ងៃទី២៦ ខែកញ្ញា ឆ្នាំ២០២៦ ស្ថិតនៅក្នុងភូមិព្រៃកន្ទ្រង់ ឃុំធម្មតាអរ ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឲ្យដឹងថា បុរសជាកូន និងជាប្អូនថ្លៃដៃដល់ ត្រូវឃាត់ខ្លួនមានឈ្មោះ ស៊ីម ដារ៉ា ភេទប្រុស អាយុ៣០ឆ្នាំមុខរបរមិនពិតប្រាកដ រស់នៅក្នុងភូមិព្រៃកន្ទ្រង់ ឃុំធម្មតាអរ ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបានបន្តឲ្យដឹងទៀតថា នៅមុនពេលឃាត់ខ្លួន ជនសង្ស័យដៃដល់ខាងលើ នៅវេលាម៉ោង៨និង២៥នាទីយប់ ថ្ងៃទី២៦ ខែកញ្ញា ឆ្នាំ២០២៦ វេលាម៉ោង ២០និង ២៥នាទី មានឈ្មោះ ឡុង សំនៀង ភេទប្រុស អាយុ៣៥ឆ្នាំ រស់នៅក្នុងភូមិព្រៃកន្ទ្រង់ ឃុំធម្មតាអរ ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្ដឹងលើឈ្មោះ ស៊ីម ដារ៉ា ភេទប្រុស អាយុ៣០ឆ្នាំ ជាប្អូនថ្លៃ នៅភូមិជាមួយគ្នា។ បុរសជាបងថ្លៃបានរៀបរាប់ថានៅវេលាម៉ោង ៧និង៤៥នាទីយប់ ថ្ងៃទី២៦ ខែកញ្ញា ឆ្នាំ២០២៦ ឈ្មោះ ស៊ីម ដារ៉ា(ជាប្អូនថ្លៃ) ខ្លួនកំពុងអង្គុយក្រោមផ្ទះ ស្រាប់តែប្អូនថ្លៃដើរមក ជេរប្រមាថរូបខ្លួន មិនដឹងមូលហេតុ ហើយបានឈ្លោះប្រកែកគ្នា ប្អូនថ្លៃរូបនោះ ក៏បានយកដុំថ្មគប់ត្រូវចំក្បាល បណ្តាលឱ្យរងរបួសហូរឈាម ពេលនោះឈ្មោះ គួន ឈួន អាយុ៥៨ឆ្នាំ ជាម្តាយ បានចូលទៅឃាត់ ត្រូវបានកូនប្រុស បង្កើតឈ្មោះ(ស៊ីម ដារ៉ា ) យកដុំថ្មគប់បណ្ដាលឱ្យរងរបួសក្បាល ហូរឈាមដេរច្រើនថ្នេរ។
នគរបាលស្រុកសំរោងទងបានបន្តឲ្យដឹងទៀតថា ក្រោយពីទទួលបានពាក្យបណ្តឹងរបស់ បុរសជាបងថ្លៃរួចមក កម្លាំងព្រហ្មទណ្ឌស្រុកសំរោងទង បានសហការជាមួយកម្លាំងប៉ុស្ដិនគរបាលរដ្ឋបាលឃុំធម្មតាអរ បានហៅឈ្មោះ ស៊ីម ដារ៉ា មកសាកសួរឆ្លើយថាខ្លួនពិតជាបានយកដុំថ្មគប់បងថ្លៃ និងម្ដាយ បង្កើតពិតប្រាកដមែន។ ក្រោយឃាត់ខ្លួននគរបាលដកហូតបាន ដុំថ្មចំនួន២ដុំ ។ ចំពោះជនរងគ្រោះបងថ្លៃ និងម្តាយបង្កើត ត្រូវបានសាច់ញាតិក្រុមគ្រួសារយកទៅ ព្យាបាលនៅមន្ទីរពេទ្យភ្លាមៗ។
បច្ចុប្បន្នជនសង្ស័យរួមជាមួយនឹងវត្ថុតាមនគរបាលបានកសាងខ្ញុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ