រាជធានីភ្នំពេញ ៖ ជំនួបដំបូងដ៏មានផ្លែផ្កា ! កម្ពុជា-អ៊ីរ៉ង់ ចាប់ដៃគ្នាពង្រឹងទំនាក់ទំនងទ្វេភាគី និងត្រៀមអបអរខួប ៣៥ឆ្នាំ នៃការបង្កើតទំនាក់ទំនងការទូត ។ នេះបើយោងតាមផេកលោកប្រាក់ សុខុន បានប្រកាសនាព្រឹកថ្ងៃទី២៧ ខែកញ្ញានេះ ។
នៅព្រឹកថ្ងៃទី២៦ ខែកញ្ញា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានជួបពិភាក្សាទ្វេភាគីជាមួយ ឯកឧត្តមបណ្ឌិត Seyed Abbas Araghchi រដ្ឋមន្ត្រីការបរទេសនៃសាធារណរដ្ឋអ៊ីរ៉ង់ ក្នុងឱកាសនៃការអញ្ជើញចូលរួមកិច្ចពិភាក្សាទូទៅនៃមហាសន្និបាតអ.ស.ប. លើកទី៨១ នៅទីក្រុងញូវយ៉ក សហរដ្ឋអាមេរិក ។
ជាជំនួបលើកដំបូងដែលពោរពេញដោយក្តីរីករាយ រដ្ឋមន្ត្រីការបរទេសទាំងពីរ បានគូសបញ្ជាក់អំពីការប្តេជ្ញាចិត្ត ក្នុងការរក្សាចំណងមិត្តភាពរវាងប្រទេសទាំងពីរ និងត្រៀមខ្លួនជាស្រេចដើម្បីលើកកម្ពស់ទំនាក់ទំនងទ្វេភាគីអោយកាន់តែស៊ីជម្រៅ ។
ក្នុងពេលទន្ទឹងរង់ចាំការអបអរសាទរខួបលើកទី៣៥ នៃការបង្កើតទំនាក់ទំនងការទូតនៅឆ្នាំ២០២៧ កម្ពុជា និងអ៊ីរ៉ង់បានបញ្ជាក់សារជាថ្មីនូវកិច្ចសហការរួមគ្នាក្នុងការរៀបចំកិច្ចពិគ្រោះយោបល់ទ្វេភាគីលើកទី២ នៅកាលបរិច្ឆេទ និងទីកន្លែង ដែលបានឯកភាពគ្នា ។ ឯកឧត្តមឧបនាយករដ្ឋមន្ត្រី ក៏បានជម្រាបជូនភាគីមិត្តអំពីការវិវត្តថ្មីៗ នៅតាមបណ្តោយព្រំដែនកម្ពុជា-ថៃ ផងដែរ ៕
ចែករំលែកព័តមាននេះ