ការងារស្តារទំនប់អាងទឹកម្រះព្រៅ ស្ថិតក្នុងខេត្តកំពង់ស្ពឺ សម្រេចបានជាង ៨០%
- កំពង់ស្ពឺ
ខេត្តកំពង់ស្ពឺ ៖ ទំនប់អាងទឹកម្រះព្រៅ មានសមត្ថភាពស្រោចស្រពស្រូវវស្សា និងស្រូវប្រាំងចំនួន ៣០០ ហិកតា ដំណាំរួមផ្សំ៣០០ហិកតា និងផ្តល់ទឹកសម្រាប់ប្រើប្រាស់ក្នុង ស្រុកសំរោងទង នៅថ្ងៃទី២៦ ខែកញ្ញា ឆ្នាំ២០២៦នេះ លោក ថាំង វីយុទ្ធដា ប្រធាននាយកដ្ឋានវិស្វកម្ម បានដឹកនាំមន្ត្រីជំនាញបច្ចេកទេស ចុះពិនិត្យវឌ្ឍនភាពការងារស្តារទំនប់អាងទឹកម្រះព្រៅ ស្ថិតក្នុងឃុំក្រាំងអំពិល ស្រុកសំរោងទង ខេត្តកំពង់ស្ពឺ ។
លោកប្រធាននាយកដ្ឋានបានបញ្ជាក់ថា គម្រោងស្តារទំនប់អាងទឹកម្រះព្រៅនេះសម្រេចបានប្រមាណ ៨៥% ហើយ ដោយទំហំការងាររួមមាន៖ ការស្តារទំនប់ប្រវែង ៩៣៥ ម៉ែត្រ និងការសាងសង់សំណង់សិល្បការ្យចំនួន ៣ កន្លែង ដើម្បីប្រមូលស្តុកទឹកភ្លៀង សម្រាប់ផ្គត់ផ្គង់ទឹកស្អាតជូនមូលដ្ឋានកងយោធពលខេមរភូមិន្ទតេជោសែន ភ្នំធំម្រះព្រៅ។
លោកប្រធាននាយកដ្ឋាន បានបន្ថែមថា ក្រោយពេលសាងសង់រួចរាល់ជាស្ថាពរ អាងទឹកនេះនឹងមានសមត្ថភាពស្រោចស្រពស្រូវវស្សាបានចំនួន ១៥០ ហិកតា ស្រូវប្រាំងចំនួន ១៥០ ហិកតា និងដំណាំរួមផ្សំចំនួន ៣០០ ហិកតា ព្រមទាំងផ្តល់ទឹកសម្រាប់ប្រើប្រាស់ជូនប្រជាពលរដ្ឋចំនួន ២ ភូមិ (ស្មើនឹង ២៥៧ គ្រួសារ ឬ ១ ២៥៣ នាក់) ស្ថិតក្នុងឃុំក្រាំងអំពិល ស្រុកសំរោងទង ខេត្តកំពង់ស្ពឺ។
លោកប្រធាន ព្រមទាំងណែនាំដល់ក្រុមការងារឱ្យបន្តគ្រប់គ្រងគ្រឿងចក្រ និងអនុវត្តតាមបទដ្ឋានបច្ចេកទេសឱ្យបានម៉ឺងម៉ាត់បំផុត ដើម្បីធានាគុណភាពសំណង់រឹងមាំ យូរអង្វែង និងសម្រេចតាមផែនការកំណត់៕
ចែករំលែកព័តមាននេះ