រាជធានីភ្នំពេញ ៖ បុរសជនជាតិបង់ក្លាដេសម្នាក់ បានបោកក្បាលស្លាប់នៅនឹងកន្លែង ខណៈពេលជិះម៉ូតូមួយគ្រឿង ក្នុងល្បឿនលឿន ទៅបុកចំទ្វាររថយន្តម៉ាក់ឡិចស៊ីស មួយគ្រឿង នៅចំណុចផ្លូវបំបែកពេញទំហឹង ។
គ្រោះថ្នាក់ចរាចរណ៍នេះ បានកើតឡើងនៅវេលាម៉ោង០៧និង៣០នាទីព្រឹកថ្ងៃទី២៦ ខែកញ្ញា ឆ្នាំ២០២៦ នៅចំណុចផ្លូវបំបែក ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ ។
ជនរងគ្រោះ ដែលបានស្លាប់បាត់បង់ជីវិតឈ្មោះ VILIVO MALA MALA ភេទប្រុស អាយុ៣៣ឆ្នាំ ជាជនជាតិបង់ក្លាដេស ស្នាក់នៅសង្កាត់គោកឃ្លាំង ខណ្ឌសែនសុខ រាជធានីភ្នំពេញ ជិះម៉ូតូម៉ាក ហុងដា FTR ពាក់ស្លាកលេខ ភ្នំពេញ 1FQ-5452 ។
ចំណែករថយន្តម៉ាកឡិចស៊ីស RX៣០០ ពណ៌ស្ករ ពាក់ស្លាកលេខភ្នំពេញ 2O-8669 បើកបរដោយស្ត្រីម្នាក់ ពុំស្គាល់អត្តសញ្ញាណ ត្រូវសមត្ថកិច្ចឃាត់ខ្លួន ។
តាមសាក្សីបានឲ្យដឹងថា នៅមុនពេលកើតហេតុ គេឃើញជនរងគ្រោះ បានជិះម៉ូតូមួយគ្រឿងខាងលើ ក្នុងល្បឿនលឿន ធ្វើដំណើរតាមផ្លូវបេតុង ក្នុងទិសដៅពីត្បូងទៅជើង នៅពេលធ្វើដំណើរមកដល់ចំណុចកើតហេតុ ដែលជាផ្លូវបំបែក ក៏បានបុកចំទ្វារមុខរថយន្តម៉ាកឡិចស៊ិស ដែលធ្វើដំណើរក្នុងទិសដៅពីលិចទៅកើត ។
តាមសាក្សីបានឲ្យដឹងទៀតថា គ្រោះថ្នាក់នេះ គឺបុកពេញទំហឹងបណ្ដាឲ្យជនជាតិបរទេសខាងលើ បោកក្បាលស្លាប់នៅនឹងកន្លែង។ ចំណែករថយន្ត បានរេចង្កូតទៅឆ្វេងដៃឡើងចិញ្ចើមផ្លូវ។ បន្ទាប់ពីកើតមានគ្រោះថ្នាក់ អ្នកបើកបររថយន្ត ត្រូវបានសមត្ថកិច្ចឃាត់ខ្លួន។ រថយន្តនិងអ្នកបើកបរ រួមនិងម៉ូតូ ត្រូវបានសមត្ថកិច្ចនគរបាលចរាចរណ៍ ចុះមកវាស់វែងរួចបញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយតាមច្បាប់ ៕
ចែករំលែកព័តមាននេះ