រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌកំរិតធ្ងន់ សហការជាមួយកម្លាំងអធិការដ្ឋាននគរបាលបឹងកេងកងឃាត់ខ្លួន បន្ទាប់ពីធ្វើសកម្មភាពឆក់កាបូបជនជាតិបរទេស ។
ជនសង្ស័យរូបនោះ ឈ្មោះ ស្រី សុខសិរីរាពង្សវឌ្ឍនៈ ភេទប្រុស អាយុ២៦ឆ្នាំ មុខរបរ មិនពិតប្រាកដ ។
តាមនគរបាលការិយាល័យព្រហ្មទណ្ឌកំរិតធ្ងន់ បានអោយដឹងថា ដោយអនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី២៥ ខែកញ្ញា ឆ្នាំ២០២៦ កម្លាំងការិយាល័យនគរបាលព្រហ្មទណ្ឌកំរិតធ្ងន់ បានសហការជាមួយកម្លាំងអធិការដ្ឋាននគរបាលបឹងកេងកង ដឹកនាំដោយលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកឧត្តមសេនីយ៍ទោ ញ៉ុង រស់មេត្តា ទទួលដឹកនាំការិយាល័យនគរបាលព្រហ្មទណ្ឌកំរិតធ្ងន់ និងលោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកំរិតធ្ងន់ បានស្រាវជ្រាវឃាត់ខ្លួនជនសង្ស័យម្នាក់ ពាក់ព័ន្ធករណីឆក់កាបូបជនបរទេស ប្រព្រឹត្តបទល្មើសកាលពីថ្ងៃទី២១ ខែកញ្ញា ឆ្នាំ២០២៦ នៅចំណុចផ្លូវលេខ៦៣ កែងផ្លូវ៣០៦ ភូមិ២ សង្កាត់បឹងកេងកងទី១ ខណ្ឌបឹងកេងកង ។
បន្ទាប់ពីឃាត់ខ្លួន សមត្ថកិច្ចដកហូតសម្ភាររួមមាន ៖ ម៉ូតូម៉ាក Honda dream ពណ៌ខ្មៅ ផ្លាកលេខ ភ្នំពេញ 1IC-4258 ជារបស់ជនសង្ស័យធ្វើសកម្មភាព និងសម្ភាររបស់ជនរងគ្រោះរួមមាន លិខិតឆ្លងដែនចំនួន០១ក្បាល, កាបូបយួរដៃម៉ាក Wallet ចំនួន០១, កាបូបលុយម៉ាក់ Boss ចំនួន១, កាតការងារ ចំនួន០២, កាតធនាគារ ចំនួន០១, ក្បាលនាឡិកា១ ម៉ាក់ Tissot, លុយមួយចំនួនយកមក ប្រគល់ម្ចាស់វិញ ។
បច្ចប្បន្នជនសង្ស័យខាងលើ ត្រូវបានកម្លាំងជំនាញការិយាល័យ កសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ