១ថ្ងៃជំនន់ទឹកភ្លៀង វាយប្រហារចូលឃុំចំនួន០៥ ក្នុងស្រុកកំរៀង អាជ្ញាធរត្រូវបង្ខំជម្លៀសពលរដ្ឋចេញពីមូលដ្ឋាន
- បាត់ដំបង
ខេត្តបាត់ដំបង ៖ មួយថ្ងៃពេញ ចាប់ពីព្រឹករហូតទល់ល្ងាចថ្ងៃទី២៥ កញ្ញា ជំនន់ទឹកភ្លៀង បានវាយលុកយ៉ាងលឿនចូលដល់ឃុំចំនួន០៥ នៃស្រុកកំរៀង ធ្វើឲ្យលិចលំនៅឋានរាប់រយខ្នង លិចដំណាំរាប់ពាន់ហិកតា រហូតអាជ្ញាធរត្រូវបង្ខំជម្លៀសពលរដ្ឋរាប់សិបគ្រួសារទៅកាន់ទីទួលសុវត្ថិភាព ។
បើតាមព័ត៌មានបឋមដែលកោះសន្តិភាពទទួលបានកាលពីម្សិលមិញ ឃុំចំនួន០៥ ក្នុងស្រុកកំរៀង ដែលកំពុងទទួលរងនូវទឹកជំនន់រួមមាន៖ ឃុំកំរៀង ឃុំបឹងរាំង ឃុំអូរដា ឃុំត្រាង និងឃុំតាសែន ដែលមានភូមិចំនួន៣០ ដែលរងផលប៉ះពាល់ ។
របាយការណ៍បានបញ្ជាក់ទៀតថា ជំនន់ទឹកភ្លៀងបានចូលដល់លំនៅឋានរបស់ប្រជាពលរដ្ឋជាង២០០ខ្នង ។ ប្រជាពលរដ្ឋដែលកំពុងរងផលប៉ះពាល់មានសរុបជាង៦៤០នាក់។ ប៉ុន្តែអាជ្ញាធរបានជម្លៀសចេញពីតំបន់គ្រោះថ្នាក់ទៅកាន់តំបន់មានសុវត្ថិភាពអស់ជិតពាក់កណ្ដាលហើយ នៅសល់ប៉ុន្មានក្រុមសមត្ថកិច្ចនិងអាជ្ញាធរ បាននិងកំពុងជួយជម្លៀសបណ្ដើរៗជាបន្តបន្ទាប់ទៀត ។
ដោយឡែក បើនិយាយពីផលដំណាំកសិកម្មដែលរងផលប៉ះពាល់វិញ យោងលើព័ត៌មានបឋមនេះបានឲ្យដឹងថា មានដូចជាដំណាំស្វាយ ដំណាំសណ្ដែកបាយ ដំណាំតាង៉ែន និងដំណាំពោត កំពុងប្រឈមនឹងការខូចខាតរាប់ពាន់ហិកតា ជាពិសេស ដំណាំសណ្ដែក ដំណាំពោត និងដំឡូង ដែលងាយនិងរងការខូចខាតជាងគេ ។ ប៉ុន្តែរបាយការណ៍មិនបាននិយាយពីមនុស្សដែលរងគ្រោះថ្នាក់ដោយជំនន់ទឹកភ្លៀងនេះទេ ។ នេះគ្រាន់តែជារបាយការណ៍បឋម កាលពីម្សិលមិញប៉ុណ្ណោះ ប៉ុន្តែវាអាចនឹងបន្ថែមការលិចលង់បន្តទៀតនៅថ្ងៃនេះ ៕
ចែករំលែកព័តមាននេះ